ރާއްޖޭގައި މިހާރު ލިބެން ނެތް ސްޕެޝަލިސްޓް އަދި ސުޕަރ ސްޕެޝަލިސްޓުންގެ ޚިދުމަތްތަކާއި، ލިބެން ހުރި ބައެއް ސުޕަރ ސްޕެޝަލިޓީގެ ޚިދުމަތްތައް، ފޯރުކޮށްދިނުމުގެ ގޮތުން ރާއްޖެއިން ބޭރުގެ 2 ޑޮކްޓަރަކަށް އަންނަ އަންގާރަ އަދި ބުދަދުވަހު ހުޅުމާލެ ހޮސްޕިޓަލްގައި ޑޮކްޓަރަށް ދައްކައި ފަރުވާ ލިބިގަނެވޭނެ އިންތިޒާމު ހަމަޖައްސާފައިވާ ކަމަށް އާސަންދަ ކުންފުނިން ބުނެފިއެވެ.
މިއީ އާސަންދައިގެ ދަށުން އެންޕެނަލްވެފައިވާ ރާއްޖެއިން ބޭރުގެ ހޮސްޕިޓަލްތަކުގެ އެހީއާއެކު ކުރިއަށްގެންދާ ޕްރޮގްރާމްގެ ދަށުން ކުރިއަށް ގެންދާކަމެއްކަމަށް އާސަންދަ ކުންފުނިން ބުނެއެވެ. އެގޮތުން މި ދެދުވަހު ހުޅުމާލެ ހޮސްޕިޓަލްގައި ބައްލަވާނީ އަންހެނުންގެ ބަލިތަކަށް ޚާއްޞަ ޑޮކްޓަރަކާއި، ލޮލުގެ ބަލިތަކަށް ޚާއްޞަ ޑޮކްޓަރެއްކަމަށް އާސަންދަ ކުންފުނިން ބުނެއެވެ.
އަންހެނުންގެ ޚާއްޞަ ޑޮކްޓަރ ފަރުވާދެއްވާނީ އަންހެނުންގެ ދަރިމައިވުމުގެ ނިޒާމުގެ ބަލިތަކާއި މާބަނޑުވުމާއި ވިހެއުމާ ގުޅިގެން ދިމާވާ މައްސަލަތަކަށެވެ. މީގެތެރޭގައި ގިނައިން ލޭ އައުމާއި، ރަޙިމް އަދި އޯވަރީއާއި ގުޅިފައިވާ އެކިއެކި ގުނަވަންތަކަށް ދިމާވާ މައްސަލަތައް ބަލައި ފަރުވާކުރުން ހިމެނެއެވެ.
ލޮލުގެ ޑޮކްޓަރު ބައްލަވާނީ ލޮލުގެ ނަމްބަރު ނެގުމާއި ލޮލުގެ އޮޕްރޭޝަންތަކާއި، ސްކްރީނުކުރެވޭނެ ކަމަށްވެސް އާސަންދަ އިން ވިދާޅުވެއެވެ. ޑޮކްޓަރުންނަށް ދައްކަން 3350037 ނަމްބަރާ ގުޅައިގެން އެޕޮއިންޓްމަންޓް ހެދޭނެ އިންތިޒާމު ހަމަޖެހިފައިވާކަމަށް އާސަންދަ ކުންފުނިން ބުނެއެވެ.