މިހާރު ފަށާފައިވަނީ އިޤްތިޞާދު އެންމެ ބޮޑަށް ފުޅާކުރެވޭނެ މަސައްކަތްތައް، ވަރަށް އަވަހަށް ނަތީޖާ ފެންނާނެ

އިޤްތިޞާދު ރަނގަޅުކުރުމަށް ފަށާފައިވާ މަސައްކަތްތަކަކީ ރާއްޖޭގެ އިޤްތިޞާދު އެންމެ ފުޅާކޮށް އެންމެ ބާރަށް ކުރިއަށް ގެންދެވޭނެ މަސައްކަތް ކަމަށާއި، އެމަސައްކަތްތަކުގެ ނަތީޖާ ވަރަށް އަވަހަށް ފެނި ތަރައްޤީގެ ބާރު ސްޕީޑެއް ފެންނާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ކޮޅުމަޑުލަށް ފަށްޓަވާފައިވާ ދަތުރުފުޅުގެ ތެރެއިން ދިޔަމިގިއްޔަށް ވަޑައިގެން ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނު މަސައްކަތްކުރައްވަން ބޭނުންފުޅުވަނީ ރައްޔިތުންނާ ވީހާވެސް ގާތުންކަމަށާއި، ރައްޔިތުންނާ މަޝްވަރާކޮށް ކުރިއަށްދާ އުސޫލުންކަމަށެވެ. ރަށްރަށުގެ ތަރައްޤީއަށް ގިނަ މަސައްކަތްތަކެއް ކުރަން ހުރިކަމަށާއި، އެހެންނަމަވެސް ތަރައްޤީއަށް ކުރަންޖެހޭކަންކަމަށް ސަމާލުކަން ދެއްވާނެ ކަމުގެ ޔަޤީންކަން ރައީސް ދެއްވިއެވެ.

ރައީސް ވަނީ ރާއްޖޭގެ އިޤްތިޞާދުގެ މިހާރުގެ ހާލަތަށް އަލިއަޅުއްވާލައްވާފައެވެ. އެގޮތުން ކުރީ ސަރުކާރުގައި ހުއްޓިފައިވާ މަޝްރޫޢުތަކާއި އަލަށް ފަށަން ހުރި މަސައްކަތްތައް ކުރިއަށް ގެންދިއުމަށް، މިހާރުގެ އިޤްތިޞާދުގެ ޙާލަތު ހުރަހަކަށްވާކަމަށް ވިދާޅުވިއެވެ. ނަމަވެސް އިޤްތިޞާދު ރަނގަޅުކުރުމަށް މިހާރު ފަށްޓަވާފައިވާ މަސައްކަތްތަކަކީ އެމަސައްކަތް ގެންދެވޭނެ އެންމެ ފުޅާ އަދި އަވަސް މިނުގައި ކުރިއަށްގެންދާ މަސައްކަތްތަކެއްކަމަށާއި، ނަތީޖާއަކީ މާ ލަސްތަކެއް ނުވެ އިޤްތިޞާދީ ޙާލަތު ރަނގަޅުވެ ރަށްރަށުގެ ތަރައްޤީއަށް ބޭނުންވާ ކަންކަމަށް އާމްދަނީ އިތުރުވުން ކަމަށް ރައީސް ވިދާޅުވިއެވެ.

"މިދިޔަ ނޮވެމްބަރު މަހުގެ 17 ވަނަ ދުވަހު ސަރުކާރާ ހަވާލުވީއިރު ދުވަހަކުވެސް ރާއްޖޭގެ ދަރަނި ނުދާހާ ވަރަށް ވަނީ މައްޗަށް ގޮސްފައި. ރައްޔިތުންގެ ބޮލަށް ޖެހޭ ދަރަނި ވަނީ ދުވަހަކުވެސް މައްޗަށް ނުދާވަރަށް ގޮސްފައި. ކުންފުނިތަކުގެ ދަރަނި ވަރަށް ބޮޑު. ކޮންޓެކްޓަރުން ގިނަ ރަށްތަކުގައި ވަނީ މަސައްކަތް ފަށާ ހުއްޓިފައި. ނަމަވެސް މި ދެމަހު އެ މަސައްކަތްތައް ކުރިއަށް ގެންދިއުމަށް ވަނީ ފެށިފައި". ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ހާލަތު މިހެން އޮތްނަމަވެސް އެކަމުން އަރައި ގަންނާނެކަމަށެވެ. އިޤްތިޞާދީ ހާލަތު ރައްޔިތުންނާ ހިއްސާކުރެއްވީ އެއްވެސް ކަމެއް އޮޅުވާލަން ބޭނުން ފުޅު ނުވާތީކަމަށާއި، މަޝްރޫޢުތަކުގެ ބިންގާ އަޅުއްވާ "ކަޑަޖަހާ" އުސޫލުން ކަންކަންކަން ކުރަން ބޭނުންފުޅު ނުވާކަމަށެވެ.

ރައްޔިތުންގެ އެއްބާރުލުމާއެކު މި ފެށި އިޤްތިޞާދުގެ ބޮޑު މަސައްކަތުގެ ނަތީޖާ ފެންނާނެކަމަށާއި، ސަރުކާރުން ބޭނުންވަނީ ކޮންމެ ރައްޔިތަކަށް މުއްސަނދިކަން ލިބި، ކޮންމެ މިހަކީވެސް އިޤްތިޞާދީ ބާރުވެރި މީހަކަށް ހެދުމަށް ކަމަށް ރައީސް ވިދާޅުވިއެވެ.

އިޤްތިޞާދީ މަސައްކަތްތަކާއެކު ކުދި އައު ވިޔަފާރިތައް އުފަންވެ، މެދު ފަންތީގެ ވިޔަފާރިތައް އިތުރަށް ފުޅާވެ، އައު އިންވެސްޓްމަންޓްތައް ރާއްޖެއަށް އަންނާނެ ކަމަށާއި، އިޤްތިޞާދީ ކަންކަން ބައްޓަން ކުރައްވާނީ އެގޮތަށްކަމަށް ރައީސް ވިދާޅުވިއެވެ.

ދިޔަމިގިލީގައި ކުރައްވާނެ ކަންކަމަށް އިޝާރާތްކުރައްވާ ރައީސް ވަނީ އެރަށުގެ ތަރައްޤީއަށް ރައްޔިތުން ބޭނުންވާ ކަންކަމުގެ ތަރުތީބެއް ކައުންސިލާ ވުޒާރާތައް ގުޅިގެން ކުރެއްވުމަށް އެދިވަޑައިގެންފައެވެ.

ރައީސް ވަނީ މިއަހަރު ބޮޑެތި މަޝްރޫޢުތައް ކުރިއަށް ގެންދިއުމަށް މަސައްކަތްކުރައްވާކަމަށާއި، ދިޔަމިގިއްޔާއި، މަޑިފުށި ކޯޒްވޭއަކުން ގުޅުވާލުމުގެ މަސައްކަތް ހަޤީގަތަށް ހައްދަވާނެކަމަށެވެ. ނަމަވެސް އެމަޝްރޫޢު ފެށޭނެ ތާރީޚު އިޤްތިޞާދީ ހާލަތު ރަނގަޅުވާ މިންވަރަކުން އެނގޭނެކަމަށްވެސް ވިދާޅުވިއެވެ.

އެމަނިކުފާނު ދައްކަވާ ވާހަކަތަކަށް ޒިންމާ ވާނެކަން ތަކުރާރުކުރައްވާ ރައީސް ވިދާޅުވީ ޤައުމުގެ ހާލަތު ރަނގަޅުކުރުމަށް ފަށްޓަވާފައިވާ އިޤްތިޞާދީ މަސައްކަތްތައް ބައިނަލްއަޤްވާމީ މާލީ އިދަރާތަކުންވެސް ބަލައިގަންނަކަމަށެވެ. އެތަންތަނުގެ އެހީ ލިބޭނެކަމުގެ ޔަޤީންކަން ލިބިފައިވާކަމަށްވެސް ރައީސް ވިދާޅުވިއެވެ.

މީގެ އިތުރުން ދިޔަމިގިލީގެ މަގު ހެދުމުގެ މަޝްރޫޢު ހިމެނޭހެން އެހެންވެސް ރައްޔިތުންނަށް ބޭނުންވާ މުހިންމު މަޝްރޫޢުތައް ވެވަޑައިގެންފައިވާ ވަޢުދާ އެއްގޮތަށް ކުރިއަށް ގެންދަވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދިޔަމިގިލީގެ ރައްޔިތުންނަށް ދެއްވާފައެވެ.