މޯލްޑިވްސް އެއަރޕޯޓްސް ކޮމްޕެނީން ހިންގާ އިބްރާހިމް ނާޞީރު އިންޓަނޭޝަނަލް އެއަރޕޯޓުގެ ފަންސާސްވަނަ އަހަރީ ދުވަހުގެ މުނާސަބަތާ ގުޅުވައިގެން، އެ ކުންފުނިން ހުޅުމާލޭގައި ހުންނަ ފިޔަވަތީގައި ކޮމްޕިއުޓަރ ލެބެއް ޤާއިމް ކޮށްފިއެވެ.
ދައުލަތުގެ ބެލުމުގެ ދަށުގައި ތިބޭ ކުދިން ތިބޭ ފިޔަވަތީގައި ޤާއިމްކުރި މިކޮމްޕިއުޓަރ ލެބަކީ، އެމް.އޭ.ސީ.އެލްގެ ޢާއްމު އިޖްތިމާޢީ ޒިންމާގެ ދަށުން ޤާއިމްކުރި ލެބެއް ކަމަށް އެމް.އޭ.ސީއެލްއިން ބުނެއެވެ.
ދައުލަތުގެ ބެލުމުގެ ދަށުގައި ތިބޭ ކުޑަކުދިން ބެލެހެއްޓުމަށް ދައުލަތުގެ ފަރާތުން ވިލިމާލޭގައި ހިންގާ ކުޑަކުދިންގެ ހިޔާ އަށް ކުރިމަތިވެފައިވާ ޖާގައިގެ ދަތިކަން ޙައްލު ކުރުމަށް ކުރި މަސައްކަތުގެ ދަށުން،ބޭރުގެ ދީލަތި ފަރާތެއްގެ މާލީ އެހީގެ ދަށުން ހުޅުމާލޭގައި ބިނާކޮށްފައިވާ ކުޑަކުދިންގެ ހިޔާ ،ފިޔަވަތީގައި ، މިހާރުވެސް 77 ކުދިން އެބަތިއްބެވެ. ނުވަ އަހަރުން ދަށުގެ އެކި އުމުރު ފުރާގެ ކުދިން ފިޔަވަތީގައި ބަލަހައްޓަމުންދާއިރު، މިކުދިންނަށް ބޭނުންވާ ތައްލީމާއި އުގެނުމުގެ ފުރުޞަތުގެ އިތުރުން،އެކުދިންނަށް ކުޅިވަރާއި، މުނިފޫހި ފިލުވުމާއި، އިޖްތިމާއީ އެކި ޚިދްމަތްތައް ފޯރުކޮށްދިނުމަށް ގިނަ މަސައްކަތްތަކެއް ކުރަމުންދާކަމަށް ފިޔަވަތި ގެ ސީ.އީ.އޯ ޒީނާޒް އަދްނާން ވިދާޅުވިއެވެ.
މޯލްޑިވްސް އެއަރޕޯޓްކޮމްޕެނީ ލިމިޓެޑްގެ އާއްމު އިޖްތިމާއީ ޒިންމާގެ ދަށުން މިއަދު ފިޔަވަތީގައި ޤާއިމް ކުރި 15 ކޮމްޕިއުޓަރުގެ މިލެބް އިފްތިތާޙް ކޮށްދެއްވީ ރައީސުލް ޖުމްހޫރިއްޔާގެ އަބިކަނބަލުން ،ފާޠިމަތު އިބްރާހީމެވެ. މި އަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެމް.އޭސީ.އެލްގެ މެނޭޖިންގް ޑިރެކްޓަރ އާދިލް މޫސާ ވިދާޅުވީ، ކޮމްޕިއުޓަރ ލެބެއް ޤާއިމް ކުރުމަށް އެކުންފުނިން ނިންމީ މީގެ ދެދުވަސް ކުރިން ކަމަށާއި، ކޮމްޕިއުޓަރ ލެބްގެ ހުރިހައި ކަމެއް ނިންމާފައިވަނީ ޖުމްލަ ބާރަ ގަޑިއިރުގެ މަސައްކަތުން ކަމަށެވެ. އަދި ލެބްގެ މެއިންޓެނެންސްއާއި ލެބަށް ބޭނުންވާ އެހެނިހެން ފަންނީ އެހީތެރިކަން އެކުންފުނިން މެދު ނުކެނޑި ފޯރުކޮށްދޭނެ ކަމުގެ ޔަޤީންކަން ދެއްވިއެވެ. އާދިލް ވިދާޅުވީ ކޮމްޕިއުޓަރ ލެބްގެ އިތުރުން، މުސްތަޤްބަލުގައި ފިޔަވަތީގައި ތިބި ކުދިންނަށް އިތުރު ޚިދްމަތްތަކެއް ފޯރުކޮށްދިނުމަށް އެކުންފުނިން ވިސްނާކަމަށެވެ.
މި ޙަފްލާގައި ވާހަކަފުޅު ދައްކަވަމުން ބަންޑާރަ ނައިބު އަލްއުސްތާޛް މުޙައްމަދު އަނިލް ވިދާޅުވީ، އެއަރޕޯޓް ދިވެހިންގެ މިލްކިއްޔާތެއްގެ ގޮތުގައި އޮވެ ފަންސަވީސް އަހަރު ވޭތުވެގެން ދިޔަކަމީ، ދިވެހިންނަށް ލިބިދޭ ވަރަށް ބޮޑު ފަޚްރެއް ކަމަށެވެ. އަދި އެއަޕޯޓް ހިންގާ އެމް.އޭ.ސީ އެލް ކުންފުންޏަކީ ދައުލަތުގެ ކުންފުނިތަކުގެ ތެރެއިން، އެންމެ ބޮޑު އާމްދަނީއެއް ހޯދާ ކުންފުނިކަން ފާހަގަ ކުރައްވާ، އެމް.އޭ.ސީ އެލް އިން ފިޔަވަތި ފަދަ އެހީއަށް ބޭނުންވެފައިވާ ކުދިންނަށް މިފަދަ ޚިދްމަތެއް ފަހިކޮށްދެއްވީތީ އެކަމަށް ޝުކުރު އަދާ ކުރެއްވިއެވެ.
ޔޫއޭއީގެ ރައްޔިތެއް ކަމަށްވާ މަޙުމޫދު އަލް ހާޖާގެ އާއިލާގެ ހިލޭ އެހީގެ ދަށުން ހުޅުމާލޭގައި އިމާރާތް ކޮށްފައިވާ ކުޑަކުދިންގެ ހިޔާއަކީ 120 ކުދިންގެ ޖާގައިގެ، ޒަމާނީ ފެންވަރަށް ޢިމާރާތްކޮށްފައި ހުރި ތަނެކެވެ.