ވަޒީރު ދެއްވި ޔަޤީންކަމަކީ ގަވާއިދު އިސްލާހުކޮށް، ކްރޫޒްލައިނާތަކަށް ދިމާވާ ދަތިތައް ޙައްލުކޮށްދޭނެކަން
-
ކޮންމެ ކޮޓަރިއެއްގައި ފަސިންޖަރުން ހޭދަކުރާ ދުވަހެއްގެ ރޭޓުން ޖީއެސްޓީ އަށް %16 ދައްކަންޖެހޭ
-
ގިނަ ކްރޫޒްލައިންތަކަކުން ދަނީ ދަތުރުތައް ކެންސަލްކުރަމުން
ކްރޫޒްލައިނާތަކާއި ގުޅޭގޮތުން މިދިޔަ ސަރުކާރުން ހަދާފައިވާ ޤާނޫނު އިސްލާހުކުރުމުގެ މަސައްކަތް ކުރަމުންދާކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.
ވަޒީރު މިހެން ވިދާޅުވީ، ކްރޫޒްޝިޕްތަކުގެ ވަކިވަކި ފަސިންޖަރުން ހޭދަކުރާ ކޮޓަރިތަކުން ޖީއެސްޓީ ނެގޭ ގޮތަށް މިދިޔަ ސެޕްޓެމްބަރު މަހު ގަވައިދަށް ގެނައި ބަދަލަށް އަމަލުކުރަން ފެށުމުން ކްރޫޒްލައިންތައް ރާއްޖެ އައުމަށް ހުރަސްއެޅުމުންނެވެ.
މިދިޔަ ސެޕްޓެމްބަރު މަހު އާންމުކުރި އައު ގަވައިދާއެކު، ކޮންމެ ކޮޓަރިއެއްގައި ފަސިންޖަރުން ހޭދަކުރާ ދުވަހެއްގެ ރޭޓުން ޖީއެސްޓީއަށް 16 ޕަސެންޓު ދައްކަން ޖެހެއެވެ. މިއާއެކު ރާއްޖެ އަންނަން ބުކިން ހައްދާފައިވާ ބޮޑެތި ކްރޫޒްލައިންތަކުން ދަނީ އެހެން މަންޒިލްތަކަށް ޑައިވަރޓްކުރަމުންނެވެ.
މިކަމާއި ގުޅިގެން ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވީ، ކްރޫޒްލައިނާތަކާ ގުޅޭގޮތުން މިދިޔަ ސަރުކާރުން ހަދާފައިވާ ޤާނޫނު އިސްލާހު ކުރުމުގެ މަސައްކަތް މިހާރު ކުރަމުންދާކަމަށެވެ. އަދި ދާދިއަވަހަށް މިހާރު ކުރިމަތިވެފައިވާ ދަތިތަކަށް ހައްލެއް ލިބިގެންދާނެކަމުގެ ޔަޤީންކަންވެސް ވަޒީރު ވަނީ ދެއްވާފައެވެ.
ގިނަ އަދަދެއްގެ ކްރޫޒްލައިންތައް ރާއްޖެ ނައިސް އެހެން މަންޒިލްތަކަށް ދަތުރުތައް ބަދަލުކުރަމުންދާތީ ދާއިރާގެ ފަރާތްތަކުންވެސް ދަނީ އެކަމުގެ ކަންބޮޑުވުން ފާޅުކުރަމުންނެވެ. އެގޮތުން ގިނަ އަދަދެއްގެ ފަތުރުވެރިންގެ ބުކިންތައް ގެއްލި ގެއްލުން ވަމުން އަންނަކަމަށް އެ ފަރާތްތަކުން ބުނެއެވެ.
މިދިޔަ އަހަރުވެސް 6 ކްރޫޒްލައިނެއް ރާއްޖެ އައިސްފައިވެއެވެ. ކްރޫޒްލައިންތަކުން ގިނަ އަދަދެއްގެ ފަތުރުވެރިން އަންނައިރު މިއީ ރާއްޖޭގެ އިޤްތިޞާދަށްވެސް އޭގެ ސަބަބުން ނުހަނު ފައިދާވާ ކަމެކެވެ. މި އުޅަނދުތަކުން ފައިބާ މީހުން ރިސޯޓްތަކާއި، ގެސްޓްހައުސްތަކުގައި މަޑުވެސް ކުރެއެވެ. އަދި ރަށްރަށުގެ ފިހާރަތަކުން ވިޔަފާރިކޮށްވެސް ހަދައެވެ.