ކުންފުނިތަކަށް މުވައްޒަފުން ނެގުމާއި ވަކިކުރުމަށް ޚާއްޞަ އުސޫލެއް އެކުލަވާލަނީ

ސަރުކާރުގެ ކުންފުނިތަކަށް މުވައްޒަފުން ނެގުމާއި މުވައްޒަފުން ވަޒީފާއިން ވަކިކުރުމާބެހޭ ޚާއްޞަ އުސޫލެއް އެކުލަވާލުމުގެ މަސައްކަތް ކުރައްވަމުން ގެންދަވާކަމަށް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ)ގެ ރައީސް ޙަމްދީ އަޤީލް ވިދާޅުވެއްޖެއެވެ.

ޙަމްދީ މިހެން ވިދާޅުވީ ނިމިދިޔަ ސަރުކާރުގެ ފަހު ދުވަސްކޮޅު، ޚާއްސަކޮށް ރިޔާސީ އިންތިޚާބުގެ ކެމްޕެއިނާ ގުޅުވައިގެން އެއްވެސް އުސޫލެއްނެތި ގިނަ ޢަދަދެއްގެ މުވައްޒަފުން ބައެއް ކުންފުނިތަކަށް ނަގާފައިވާ މައްސަލައާއި ބައެއް މުވައްޒަފުން ވަކިކުރިކަމަށް ކުރެވޭ ޝަކުވާތަކާ ގުޅިގެންނެވެ. މިގޮތަށް ނަގާފައިވާ ބައެއް މުވައްޒަފުން ވަކިކުރާކަމަށްބުނެ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް ވަނީ މައްސަލައެއްވެސް ހުށަހަޅާފައެވެ. މިމައްސަލައާ ގުޅިގެން ޙަމްދީ އަޤީލްވަނީ ކޮމިޓީގައި ވާހަކަފުޅުދައްކަވާފައެވެ.

ކުންފުނިތަކުން މުވައްޒަފުން އުސޫލުން ބޭރުން ވަކިކުރާކަމަށްބުނެ މަޖިލީހުގެ އެސްއޯއީ ކޮމިޓީއަށް ހުށައަޅާފައިވާ ޝަކުވާތަކާއި ގުޅިގެން އެކޮމިޓީން ވަނީ ޕީސީބީއާ ބައްދަލުކޮށްފައެވެ. އެ ކޮމިޓީގެ ބައްދަލުވުމުގައި އިހަވަންދޫ ދާއިރާގެ މެންބަރު މުޙައްމަދު ޝިފާއުވަނީ އެއްވެސް ކުށެއްނެތި، ނަމަވެސް ވަކި ސިޔާސީ ފިކުރަކަށް ނިސްބަތްވާތީ ވަޒީފާއިން ވަކިކުރާކަމަށް ތުހުމަތުކުރައްވާ އެކަމަށް އޮތް ޙައްލާގުޅޭގޮތުން ސުވާލުކުރައްވާފައެވެ.

އެ ސުވާލަށް ޖަވާބުދެއްވަމުން ޕީސީބީގެ ރައީސް ޙަމްދީ އަޤީލް ވިދާޅުވީ، ކޯޑް އޮފް ކޯޕަރޭޓް ގަވަރނަންސް ނުވަތ ކުންފުނިތައް ހިންގުމުގެ ޤަވާއިދާ އެއްގޮތައް، އެޗްއާރު ޕޮލިސީގެ ސްޓޭންޑަޑެއް މިހާރު އެކުލަވާލާ ޑްރާފްޓް ކުރައްވާފައިވާކަމަށެވެ. އެ ޤަވާއިދު ތަންފީޒްކުރެވުމުން އުސޫލުން ބޭރުން މުވައްޒަފުން ވަކިކުރުމާއި ވަޒީފާއަށް ވެއްދުމުގެ މައްސަލައަށް ހައްލެއް ލިބިގެންދާނެކަމަށް އަޤީލް ވިދާޅުވިއެވެ.

"އެޗްއާރު ޕޮލިސީގެ ސްޓޭންޑާރޑްއެއް ސީޖީ ކޯޑާއި އެއްގޮތައް މިހާރު އޮތީ ޑްރާފްޓް ކުރެވިފައި. ބޯޑަށް ހުށައަޅައިގެން ބޯޑުން ކުރިއަށްދިޔައީމަ ދެން ކުންފުނިތަކާއި ހިއްސާކުރެވޭނެ. އޭރުން ދެން އަޅުގަނޑު ގަބޫލުކުރަނީ ކުންފުނިތަކުގައި މިހާރު ހުރި ޕޮލިސީތައް އެ ގައިޑްލައިނާއި އެއްގޮތައް ހަމަހަމަ ކުރެވިގެންދާނެ. އެއިރުން ތި ފާހަގަކުރި ކަންކަމަށް ހައްލެއް ލިބިގެންދާނެ. އަޅުގަނޑުމެންގެ މޮނިޓަރިންގެ ތެރެއިން އެކަން ބަލަމުންވެސް ގެންދާނަން." ޕީސީބީގެ ރައީސް ޙަމްދީ އަޤީލް ވިދާޅުވިއެވެ.

ސަރުކާރު ހިއްސާވާ ކުންފުނިތަކާ ގުޅޭގޮތުން ލިބެމުންދާ ޝަކުވާތައް ދިރާސާކުރުމަށް، ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީއިން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާ ބައްދަލުކުރުން pic.twitter.com/TMXoANNRmJ

— People's Majlis (@mvpeoplesmajlis) December 11, 2023

އަޤީލް ވަނީ ސަރުކާރުގެ ކުންފުނިތަކަށް މެނޭޖިން ޑިރެކްޓަރުންނާއި އަދި ބޯޑު މެންބަރުން އައްޔަންކުރައްވާފައިވަނީ އުސޫލުތަކުގެ ތެރެއިންކަން ފާހަގަކުރައްވާފައެވެ. އަދި ބައެއް މެންބަރުންނަށް އިންޓަވިއުވެސް ކޮށްފައިވާކަމަށް އޭނާ ވިދާޅުވިއެވެ. ހަމްދީ އަޤީލް ވިދާޅުވީ، ޕީސީބީން އެއްވެސް ކުންފުންޏަކަށް އުނދަގޫވާގޮތަށް ޢަމަލުކުރަމުން ނުދާނެކަމަށެވެ.

ނަމަވެސް ސަރުކާރު ހިއްސާވާ ކުންފުނިތަކާ އަލަށް ގުޅިވަޑައިގެންނެވި މެނޭޖިންގ ޑިރެކްޓަރުންނާއި ބޯޑުން ވަނީ، ކުރީ ސަރުކާރުން ރިޔާސީ އިންތިޚާބާ ދިމާކޮށް، އުސޫލުން ބޭރުން، ކުންފުނިތަކަށް ބުރަ ބޮޑުވާގޮތަށް ގިނަ ބަޔަކަށް ވަޒީފާ ދީފައިވާކަމަށް ވިދާޅުވެފައެވެ. އަދި އޭގެތެރެއިން ގިނަ މުވައްޒަފުންތަކަކީ ކޮންޓްރެކްޓް މުވައްޒަފުންކަމަށާއި، ބައެއް މުވައްޒަފުންގެ ކޮންޓްރެކްޓް ނުވަތަ ވަޒީފާގެ އެއްބަސްވުން މިދިޔަ މަހުގެ ނިޔަލަށް ހަމަވެފައިވާކަމަށްވެސް ބައެއް ކުންފުނިތަކުން ވަނީ ހާމަކުރައްވާފައެވެ.