އަގު އެއްކުރި މަހުގެ ބާވަތްތައް އުފެއްދުމުގެ މަސައްކަތް 3 ރަށެއްގައި ފަށަނީ

އަގު އެއްކުރި މަހުގެ ބާވަތްތައް ތައްޔާރުކުރުމުގެ މަސައްކަތް ރާއްޖޭގެ 3 ރަށެއްގައި ފެށުމަށް ތައްޔާރުވަމުން އަންނަކަމަށް މަސްވެރިކަމާއި، ކަނޑުގެ ވަސީލަތްތަކާބެހޭ ވުޒާރާއިން ވިދާޅުވެއްޖެއެވެ.

ވެލިއު އެޑަޑް ޕްރޮޑަކްޓް ނުވަތަ އަގު އެއްކުރި މަހުގެ ބާވަތްތަކަކީ ދަޅުގައާއި ޕޯޗްގައި އެކި ގޮތްގޮތަށް ބަންދުކޮށްފައި ހުންނަ މަހުގެ އުފެއްދުންތަކެވެ. އޭގެތެރޭގައި ދަޅުމަހާއި ހިކިމަހާއި، މަހުގެ އެކި ބައިތަކުން އުފައްދާ ތަފާތު ބާވަތްތައް ހުރެއެވެ. ނަމަވެސް ރާއްޖެއިން އާއްމުގޮތެއްގައި މަސް ބޭރުކުރަނީ އަގު އެއްކުރި މަހުގެ އުފެއްދުންތަކުގެ ބަދަލުގައި ގަނޑުކުރި ރޯމަހުގެ ގޮތުގައެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މަސްވެރިކަމާއި، ކަނޑުގެ ވަސީލަތްތަކާބެހޭ ވުޒާރާގެ ޑެޕިއުޓީ ޑިރެކްޓަރ ޖެނެރަލް އާދަމް މަނިކު ވިދާޅުވީ، ރާއްޖެއިން މިހާރު އެކްސްޕޯޓްކުރާ މަހުގެ ބޮޑުބަޔަކީ ރޯމަހުގެ ގޮތުގައި އެކްސްޕޯޓްކުރާ މަސްކަމަށްވިޔަސް، ސަރުކާރުން މަސައްކަތްކުރައްވަމުން ގެންދަވަނީ އަގު އެއްކުރި މަހުގެ ގޮތުގައި އެކްސްޕޯޓްކުރެވޭނެ ބަވަތްތަކަކީ ކޮބާތޯ ބަލައި އެ މަސައްކަތް ކުރެއްވުމަށްކަމަށެވެ.

އާދަމް މަނިކު ވިދާޅުވީ، އަގު އެއްކުރި މަހުގެ ބާވަތްތައް އުފެއްދުމަށް ހުރި ފުރުސަތުތައް ދެނެގަތުމަށް ރާއްޖޭގެ 8 ރަށަކަށް އެ ވުޒާރާއިން ދަތުރުކޮށް ބަލާފައިވާކަމަށެވެ. މީގެތެރެއިން ރަށްރަށުގެ ބިމުގެ ޖާގައާއި އެހެނިހެން ކަންކަމަށް ބެލުމަށްފަހު މި މަސައްކަތް ކުރުމަށް 3 ރަށެއް މިހާރު ކަނޑައަޅާފައިވާކަމަށް އޭނާ ވިދާޅުވިއެވެ. އެ 3 ރަށަކީ މ.ދިއްގަރު، ފ.ނިލަންދޫ އަދި ރ.މަޑުއްވަރީއެވެ.

"އަގު އެއްކުރި މަހުގެ ބާވަތައް ބަލާއިރު ހަމައެކަނި ހިކި ކަނޑުމަހެއް ނޫން. ވަޅޯމަހެއް ނޫން. އަދި މިދެންނެވި ރަށްތަކަށް ބައެއް އިކުއިޕްމަންޓްވެސް ދީގެން އެބޭފުޅުންނަށް މި ތަމްރީންތައް ދީފަ ދެން އަޅުގަނޑުމެން މިކުރާ ކަމަކީ އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ނުވަތަ ރަށު ކައުންސިލްތަކަށް މި ހަވާލުކުރަނީ އިކުއިޕްމަންޓްސް ބަލަހައްޓަން. އެއިރުން އެރަށެއްގައި އެއުޅޭ ބަންދުކުރަން ބޭނުންވާ ކޮންމެ ބަޔަކަށް އެކަން ކުރެވިގެންދާނެ." އާދަމް މަނިކު ވިދާޅުވިއެވެ.

އާދަމް މަނިކު ވިދާޅުވީ، މި 3 ރަށުގައި އަގު އެއްކުރި މަހުގެ ބާވަތްތައް ތައްޔާރުކުރުމަށް ތަމްރީން ހޯދުމަށްޓަކައި އަންނަ ފެބްރުއަރީމަހު ޖަޕާނަށް ދަތުރެއް ކުރުމަށް ހަމަޖެހިފައިވާކަމަށެވެ. މީގެއިތުރުން އަގު އެއްކުރި މަހުގެ ބާވަތްތައް އުފެއްދުމާއި ގުޅޭ ތަމްރީން ބޭނުންވާ ކޮންމެ ރަށަކަށްވެސް އެ ވުޒާރާއިން މައުލޫމާތު ފޯރުކޮށްދޭނެކަމަށް އޭނާ ވިދާޅުވިއެވެ.

މަސްވެރިކަމުގެ އުފެއްދުންތައް އުފެއްދުމުގައި މީގެކުރިން ރަށްރަށުގައި ހަރަކާތްތެރިވަމުން އައީ ދިވެހި ކަނބަލުންނެވެ. ނަމަވެސް މިހާރު މި މަސައްކަތުގައި ގިނައިން ހަރަކާތްތެރިވަމުން އަންނަނީ ބިދޭސީންކަން ފާހަގަކުރައްވައި އާދަމް މަނިކު ވިދާޅުވީ އެ ވުޒާރާގެ އަމާޒަކީ މި މަސައްކަތުގައި އުޅޭ ދިވެހިންގެ އަދަދު އިތުރުކުރުންކަމަށެވެ. މިއީ އުފެއްދުމުގެ ފެންވަރުވެސް މަތިވެގެންދާނެކަމެއްގެ ގޮތުގައި އޭނާ ފާހަގަކުރެއްވިއެވެ.

މަސްވެރިންގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަނީ ދިވެހި މަސްވެރިން ބާނާ މަސް އެހެން ޤައުމުތަކުގެ މަސް ކުންފުނިތަކުން ގަނެގެން، އަގު އެއްކުރި މަހުގެ އުފެއްދުންތައް ބާޒާރަށް ނެރެގެން ބޮޑު ފައިދާއެއް ނަގަމުންދާކަން ފާހަގަކުރައްވާފައެވެ. ނަމަވެސް މި ސަރުކާރުން ބޭނުންވަނީ އެ ފައިދާ ދިވެހި މަސްވެރިންނަށް ލިބޭނެގޮތަކަށް މި ނިޒާމު ބަދަލުކުރަންކަމަށާއި، އަދި އެކަން ކުރާނެ ކަމުގެ ޔަޤީންކަން ދެއްވާކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ދިވެހިރާއްޖޭގައި އުފައްދާ އަގު އެއްކުރި މަހުގެ މިންވަރު އިތުރުކުރުމަށް، މި ދާއިރާއިން އިންވެސްޓް ކުރުމަށް އެދޭ ކުންފުނިތަކަށް ފަހި ފުރުޞަތުތަކެއް ހޯދައިދެވޭނެކަމަށެވެ. އަދި މަހުގެ އުފެއްދުންތައް އުފައްދާ ކުދި އަދި މެދުފަންތީގެ ވިޔަފާރިތަކަށް މާލީގޮތުން އެހީތެރިކަން ދެވޭނެ އިންތިޒާމުތަކެއް ހަމަޖައްސައި ދެވިގެންދާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.