މާލޭ މޭޔަރު އިންތިޚާބު ޖެނުއަރީ 13ގައި

މާލޭ ސިޓީގެ މޭޔަރު ހޮވުމަށް ބާއްވާ ބައި-އިލެކްޝަން އަންނަ ޖެނުއަރީ މަހުގެ 13 ވަނަ ދުވަހު ބާއްވަން ނިންމާފައިވާކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ. ހަބީބް މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.

މާލޭ ސިޓީގެ މޭޔަރަކު ހޮވުމަށް ބައި-އިލެކްޝަން ބާއްވަނީ އެމަޤާމުގައި ހުންނެވި ޑރ.މުހައްމަދު މުއިއްޒު ކުރިއަށް އޮތް 5 އަހަރަށް ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވެވަޑައިގެން މޭޔަރުކަމުގެ މަޤާމުން އިސްތިއުފާ ދެއްވުމުންނެވެ. މާލޭ ސިޓީގެ ކައުންސިލްގެ މޭޔަރުގެ ގޮނޑި ހިމެނޭހެން ޖުމްލަ 4 ގޮނޑިއެއް ވަނީ ހުސްވެފައެވެ.

ސިޓީ ކައުންސިލްގެ މާފަންނު ދެކުނު ދާއިރާގެ މެންބަރު ޢަބްދުﷲ ނާޞިރާއި، މެދުހެންވޭރު ދާއިރާގެ މެންބަރު އާދަމް ރަމީޒާއި، ހެންވޭރު ދެކުނު ދާއިރާގެ މެންބަރު އަލްއުސްތާޛާ ފާޠިމަތު ޝަމްނާޒް ޢަލީ ސަލީމްވެސް ވަނީ މެންބަރުކަމުން އިސްތިޢުފާ ދެއްވާފައެވެ.

ޤާނޫނުގައިވާ ގޮތުން ކައުންސިލްގެ ގޮނޑިއެއް ހުސްވާތާ 60 ދުވަހުގެ ތެރޭގައި އެއިންތިޚާބެއް ބާއްވަން ޖެހެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ، މާލޭ ސިޓީގެ މޭޔަރު ހޮވުމަށް ބާއްވާ އިންތިހާބު ޖެނުއަރީ މަހުގެ 13 ވަނަ ދުވަހު ބޭއްވުމަށް މިހާރު ނިންމާފައިވާކަމަށެވެ. މި އިންތިހާބުގައި ވާދަކުރަން ބޭނުންވާ ފަރާތްތަކަށް ނޮވެމްބަރ 28 އިން ޑިސެމްބަރ މަހުގެ 13 ވަނަ ދުވަހުގެ ނިޔަލަށް އެ ފުރުސަތު ހުޅުވާލާނެކަމަށް ހަބީބް ވިދާޅުވިއެވެ.

"މާލޭ ސިޓީ މޭޔަރާއި، މާލޭ ސިޓީ ކައުންސިލްގެ 3 މެންބަރުންނާއި، އަދި ވ.ރަކީދޫ ކައުންސިލްގެ މެންބަރަކާއި އަދި ހަމައެއާއިއެކީގައި ޑަބްލިއުޑީސީގެ 18 ރަށެއްގެ މެންވަރުން އިންތިހާބު ކުރުމަށްޓަކައި ބާއްވާ ބައި އިލެކްޝަން އަޅުގަނޑުމެން މި ޖަނަވަރީ މަހުގެ 13 ވާ ހޮނިހިރު ދުވަހު ބާއްވާ ގޮތައް ކޮމިޝަންގެ ރަސްމީ ޖަލްސާއިން ވަނީ ނިންމާފައި. މާދަމާ (27 ނޮވެމްބަރ) އަޅުގަނޑުމެން އިއުލާންކޮށްފައި އެ ފުރުސަތު ހުޅުވާލާނެ. މާދަމާ އަޅުގަނޑުމެން އިއުލާންކޮށްފައި މިކަމަށް އެޕްލިކޭޝަން ބަލައިގަތުން ނޮވެމްބަރ 28 ވަނަ ދުވަހުގެ ހެނދުނު 9 އަކުން ފެށިގެން ޑިސެމްބަރ މަހުގެ 13 ވަނަ ދުވަހުގެ 14:00 އައި ހަމައަށް އޮންނާނެ." ހަބީބް ވިދާޅުވިއެވެ.

ހަބީބް ވިދާޅުވީ، ޖެނުއަރީ 13 ވަނަ ދުވަހު އިންތިހާބު ބޭއްވުމަށްފަހު 2 ދުވަހެއްގެ ތެރޭގައި ދާއިމީ ނަތީޖާ އިއުލާންކުރެވޭނެކަމަށެވެ. އެއީ ޖަނަވަރީ 15 ވަނަ ދުވަހެވެ.

މާލޭ ސިޓީގެ މޭޔަރުކަމުގެ ގޮނޑިއަށް ވާދަކުރެއްވުމަށް މިހާރުވެސް ބައެއް ބޭފުޅުން ވަނީ ޝަޢުގުވެރިކަން ފާޅުކުރައްވާފައެވެ. އޭގެ ތެރޭގައި ކުރީގެ ބަންޑާރަ ނާއިބު އާއިޝަތު އާޒިމާ ޝަކޫރާއި، ކުރީގެ މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޙްލޫފާއި، ކުރީގެ ކޮމިޝަނަރ އޮފް ޕޮލިސް ޙުސައިން ވަޙީދުގެ އިތުރުން ދަ ޑިމޮކްރެޓްސްގެ ފަރާތުން މުޙައްމަދު ސައިފް ފާތިހް ވާދަކުރައްވާނެކަން ހާމަކުރައްވާފައިވެއެވެ.

މާލެ ސިޓީ ކައުންސިލާއި އިތުރު 18 ރަށެއްގެ ބައި އިލެކްޝަންއަށް މިމަހުގެ 28 ވަނަ ދުވަހު ވާދަކުރުމުގެ ފުރުސަތު ހުޅުވާލާއިރު ވާދަކުރަން ބޭނުންވާ ފަރާތްތަކުން އެކަމަށް އެދޭ އެޕްލިކޭޝަން ފޯމު އީސީއަށް ހުށައަޅަންޖެހޭނެއެވެ. އަދި ދަރަނީގެ ރެކޯޑާއި ކުށުގެ ރެކޯޑް ސާފުކުރަންޖެހޭނެއެވެ. ސިޔާސީ ޕާޓީއަކުން ކުރިމަތިލާނަމަ ސިޔާސީ ޕާޓީއަކުން އެންޑޯޒްކުރި އިޤުރާރެއް އޮންނަންވާނެކަމަށްވެސް އީސީން ވިދާޅުވެއެވެ.