ގެމްބިއާ، މިޔަންމާ މައްސަލައިގައި ރާއްޖޭގެ "ޑެކްރަލޭޝަން އޮފް އިންޓަރވެންޝަން" ހުށައަޅައިފި

އިންޓަރނޭޝަނަލް ކޯޑް އޮފް ޖަސްޓިސް، އައިސީޖޭގައި ކުރިއަށްދާ "އެޕްލިކޭޝަން އޮފް ދަ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ދަ ގެމްބިއާ ވ. މިޔަންމާ)" މައްސަލައަށް ތަދައްޚުލުވުމަށް ހުށައަޅަންޖެހޭ "ޑެކްރަލޭޝަން އޮފް އިންޓަރވެންޝަން" ދިވެހިރާއްޖޭގެ އޭޖެންޓް އެޓަރނީ ޖެނެރަލް އަލްއުސްތާޛު އިބްރާހިމް ރިއްފަތުގެ ފަރާތުން އައިސީޖޭއަށް ހުށައަޅައިފިއެވެ.

މިޔަންމާގައި ރޮހިންޖާ މުސްލިމުންނާއި ދެކޮޅަށް ހިނގަމުންދާ އަނިޔާވެރި ލާއިންސާނީ އަމަލުތަކާއި ގުޅިގެން ދަ ގެމްބިއާއިން އައިސީޖޭއަށް މައްސަލަ ހުށައަޅާފައިވަނީ 11 ނޮވެމްބަރ 2019 ގައެވެ. އެ މައްސަލައިގައި މިޔަންމާގެ ރާކީން ސްޓޭޓްގައި ރޮހިންޖާ މުސްލިމުންނާއި ދެކޮޅަށް 2016 ވަނަ އަހަރުން ފެށިގެން އެ ޤައުމުގެ ސިފައިންނާއި އެހެން ފަރާތްތަކުން ހިންގަމުން އަންނަ ޢަމަލުތަކަކީ 1948 ވަނަ އަހަރުގެ ކޮންވެންޝަން އޮން ދަ ޕްރޮވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑްއާއި ހިލާފު އަމަލުތަކެއް ކަމަށް ހުށައަޅާފައިވެއެވެ.

މިޔަންމާގައި ރޮހިންޖާ މުސްލިމުންނާއި ދެކޮޅަށް ހިންގަމުންދާ ޖަރީމާތަކާއި ގުޅިގެން ދިވެހިރާއްޖެއިން ވަނީ 2017 ވަނަ އަހަރު މިޔަންމާއާއެކު ވިޔަފާރީގެ ހުރިހައި ގުޅުމެއް ކަނޑަލާފައެވެ. އަދި މި މައްސަލައާއި ގުޅޭ ގިނަ ރެޒޮލިއުޝަންތަކެއް ކޯ-ސްޕޮންސަރކޮށް އދ. ގެ ޖެނެރަލް އެސެމްބްލީއާއި، ހިއުމަން ރައިޓްސް ކޮމިޝަނަށް ހުށައަޅާފައިވެއެވެ.

މިޔަންމާއާއި ދެކޮޅަށް ދަ ގެންބިއާއިން ހުށައަޅާފައިވާ މައްސަލައަށް ދިވެހިރާއްޖެއިން ތަދައްޚުލުވުމަށް ފޮރިން މިނިސްޓްރީން ވަޒީރުންގެ މަޖިލީހަށް ހުށައެޅުއްވުމުން އެ މައްސަލައަށް ދިވެހިރާއްޖެއިން ތަދައްޚުލުވުމަށް ވަޒީރުންގެ މަޖިލީހުން ނިންމާފައިވަނީ 18 ފެބްރުއަރީ 2020 ގައެވެ.

އައިސީޖޭއިން މި މައްސަލައާ ގުޅިގެން ނެރެފައިވާ ޓައިމްލައިނާ އެއްގޮތައް ދަ ގެންބިއާއިން މައްސަލައިގެ ދައުވާ ހުށައަޅާފައިވަނީ 23 އޮކްޓޯބަރ 2020 ގައެވެ. އަދި މިޔަންމާގެ ފަރާތުން މި މައްސަލައިގައި ހުށައަޅާ ޖަވާބު ވަނީ 24 އޮގަސްޓް 2023 ގައި ހުށައަޅާފައެވެ.

މައްސަލައަށް ތަދައްޙުލުވުމަށް ބޭނުންވާ ކޮންވެންޝަންގެ ބައިވެރިން އެކަމަށްއެދި ހުށައަޅާ ޑެކްލަރޭޝަން މައްސަލައިގެ އަޑުއެހުންތައް ފެށުމުގެ ކުރިން ހުށައަޅަންޖެހެއެވެ. މި މައްސަލައަށް ތަދައްޚުލުވާނެކަމަށް އިތުރު 6 ޤައުމަކުން އިޢުލާންކޮށްފައިވާތީ އެ ޤައުމުތަކާއި ގުޅިގެން މަސައްކަތް ކުރުމުގެ ނިޔަތުގައި ދިވެހިރާއްޖޭގެ ޑެކްރަލޭޝަން އެ ޤައުމުތަކުންވެސް ޑެކްލަރޭޝަން ހުށައަޅާ ދުވަހު ހުށައެޅުމަށް ނިންމީކަމަށް އޭޖީ އޮފީހުން ވަނީ ބުނެފައެވެ.

ދިވެހިރާއްޖޭގެ އިންޓަވެންޝަން މައިގަނޑު ގޮތެއްގައި ބިނާވެފައިވަނީ ޖެނޮސައިޑް ކޮންވެންޝަންގެ ދަށުން "ޑިއުޓީ ޓު ޕަނިޝް ޖެނޮސައިޑް" މަނާކޮށްފައިވާ ގޮތުގެ މައްޗަށް ކަމަށް ވަނީ ބުނެފައެވެ. މި މައްސަލައިގައި ދިވެހިރާއްޖެ ތަމްސީލްކުރުމަށް އައްޔަންކޮށްފައިވާ ބައިނަލްއަޤްވާމީ ވަކީލުންގެ ޓީމުގައި ހިމެނެނީ އިނގިރޭސިވިލާތުގެ ޑައުޓީ ސްޓްރީޓް ޗެމްބަރސްގެ ވަކީލު އަމާލް ކްލޫނީއާއި، އިނގިރޭސިވިލާތުގެ ޓްވެންޓީ އެސެކްސްގެ ވަކީލު ޕްރޮޕެސަރ ފިލިޕާ ވެބްއެވެ.