މާދަމާވެސް ސަރުކާރު ބަންދު

އޮކްޓޫބަރު މަހުގެ 2 ވާ ހޯމަ ދުވަހަކީ ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމަވައިފިއެވެ. މިކަން ރައީސުލްޖުމްހޫރިއްޔާގެ އޮފީހުން ވަނީ އިޢުލާންވެސް ކުރައްވާފައެވެ.

ރައީސުލްޖުމްހޫރިއްޔާ މިގޮތަށް ނިންމެވީ، ސެޕްޓެންބަރު މަހުގެ 30 ވީ ހޮނިހިރު ދުވަހު ބޭއްވި ރިޔާސީ އިންތިޚާބާ ގުޅޭ އެކިއެކި މަސައްކަތްތަކުގައި، ޙަރަކާތްތެރިވި ސަރުކާރުގެ ގިނަ ޢަދަދެއްގެ މުވައްޒަފުންނާއި ޢާންމު ރައްޔިތުން، ވޯޓާ ގުޅިގެން ކުރަން ޖެހުނު އެންމެހައި މަސައްކަތްތައް އަދި ނުނިމޭތީއެވެ. ރައީސް އޮފީހުގެ ދެންނެވުމުގައި ވަނީ އޮކްޓޫބަރު މަހުގެ 2 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަވައި ދެއްވުމަށް، އިލެކްޝަންސް ކޮމިޝަނުން އެދިވަޑައިގެންފައި ވާތީ އެކަން އެގޮތަށް ރައީސް ހަމަޖައްސަވައިދެއްވީކަމަށެވެ.

ހޮނިހިރު ދުވަހު އޮތް ރިޔާސީ އިންތިޚާބުގެ 2 ވަނަ ބުރުގައި ރާއްޖެއާއި ރާއްޖެއިން ބޭރުގައި 586 ވޯޓު ފޮއްޓެއް ވަނީ ބަހައްޓާފައެވެ. މި އިންތިޚާބުގައި އޮބްޒާވަރުންނާއި، މޮނިޓަރުންނާއި އަދި ކެނޑިޑޭޓުންގެ މަންދޫބުންގެ ގޮތުގައި 12083 ފަރާތުން ހަރަކާތްތެރިވެފައިވާކަމަށް އިލެކްޝަންސް ކޮމިޝަނުން ވަނީ ވިދާޅުވެފައެވެ. ރިޔާސީ އިންތިޚާބާއި ގުޅިގެން މިއަދަކީވެސް ސަރުކާރު ބަންދު ދުވަހެއްގެގޮތުގައި ވަނީ ކަނޑައަޅުއްވާފައެވެ.