އިބްރާހީމް ނާޞިރު އިންޓަރނޭޝަނަލް އެއަރޕޯޓްގައި ދެމުންދާ ބައެއް ޚިދުމަތްތައް އެހެންސަރަހައްދަކަށް ބަދަލުކުރުމަށްޓަކާ، ރަންވޭގެ އިރުމަތީ ފަރާތުގައި އަޅަމުންދާ އިމާރާތްތަކުގެ މަސައްކަތް ނިންމައި، އަންނަ އޭޕްރީލްމަހުގެ ނިޔަލަށް ޙަވާލުކުރެވޭވަރު ވާނެކަމަށް އެމްޓީސީސީން ބުނެފިއެވެ.
އެއާޕޯޓްގައި ދެމުންދާ ބައެއް ޚިދުމަތްތައް އެހެންސަރަހައްދަކަށް ބަދަލުކުރަނީ އާ ޓާރމިނަލް އެޅުމަށް ބޭނުންވާ ބިން ހުސްކުރުމަށްކަމަށް މޯލްޑިވްސް އެއާރޕޯޓްސް ކޮންޕެނީން މަޢުލޫމާތުދެއެވެ.
އިބްރާހިމް ނާޞިރު އިންޓަރނޭޝަނަލް އެއާޕޯޓްގައި ދެމުންދާ ޚިދުމަތްތައް އެއާޕޯޓްގެ އިރުމަތީ ފަރާތުގެ ސަރަހައްދަކަށް ބަދަލުކުރެވޭއިރު، މިކަމަށްޓަކާ ރަންވޭގެ އިރުމަތީ ފަރާތުގައި ތަރައްޤީކުރެވޭ ސަރަހައްދުގައި އަޅަންޖެހޭ އިމާރާތްތައް ބިނާކުރުމުގެ މަސައްކަތާއި، ފެނާއި ނަރުދަމާގެ މަސައްކަތާއި، މަގުހެދުމުގެ މަސައްކަތްތައް ކުރުމަށް ސަރުކާރުން ހަވާލުކުރައްވާފައިވަނީ އެމްޓީސީސީއާއެވެ. މިމަސައްކަތުގެ ދަށުން ހަދަމުންދާ އިމާރާތްތަކުގެ މަސައްކަތްނިމުމަކާ ގާތްވެފައިވާއިރު، މިސަރަޙައްދުގައި ހަދާ ޖުމްލަ ދޭއް ޕޮއިންޓް އަށެއް ކިލޯމީޓަރުގެ ދިގުމިނުގެ މަގުތައް ހެދުމުގެ މަސައްކަތްވެސް މިހާރު ފަށައިގެން ކުރިޔަށްދާކަމަށް އެމްޓީސީސީން މައުލޫމާތުދެއެވެ.
އެއާޕޯޓްގައި މިހާރު ދެމުންދާ ބައެއް ޚިދުމަތްތައް ރަންވޭގެ އިރުމަތީ ފަރާތުގައި ތަރައްޤީކުރެވޭ ސަރަހައްދަށް ބަދަލުކުމުގެ މިމަސައްކަތަކީ އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ފެށުމަށްވަމުން އަންނަ ތައްޔާރީތަކުގެ ތެރޭގައި ހިމެނޭ މަސައްކަތެކެވެ. އެއަރޕޯޓް ތަރައްޤީކުރުމުގެ މަސައްކަތަށް ޖުމްލަ އަށްސަތޭކަ މިލިޔަން ޑޮލަރު ހޭދަވާނެކަމަށް ސަރުކާރުން ހާމަކުރައްވައެވެ.