"ރާވެރިބޭ ޓްރައިތެލޯން 2023"ގެ ނަމުގައި ހަރަކާތެއް ބާއްވައިފި

ދިވެހިރާއްޖޭގެ މިނިވަން ދުވަހުގެ މުނާސަބާތާއި ގުޅުވައިގެން ބައިސިކަލް އެސޯސިއޭޝަން އޮފް މޯލްޑިވްސްއިން "ރާވެރިބޭ ޓްރައިތެލޯންގެ 2023"ގެ ނަމުގައި ހާއްސަ ހަރާކާތެއް ކުރިއަށް ގެންގޮސްފިއެވެ. މިހަރަކާތްތައް ޝަރަފްވެރިކޮށްދެއްވީ އަބްދުލް އަޒީޒް ޔޫސުފްއެވެ.

މިހަރަކާތް ކުރިއަތް ގެންގޮސްފައިވަނީ ހުޅުމާލޭގެ ދެވަނަ ފިޔަވަހީގައެވެ. މި ހަރަކާތުގައި 5 ކިލޯމީޓަރު ދުވުމާއި، 10 ކިލޯމީޓަރަށް ބައިސިކަލް ދުއްވުން އަދި 1 ކިލޯމީޓަރަށް ފެތުންވެސް ކުރިއަށް ދިޔައެވެ. މި ހަރަކާތުގައި ޖުމްލަ 54 މިހުން ބައިވެރިވިއެވެ.

" ރާވެރިބޭ ޓްރައިތެލޯންގެ 2023"އާއި ގުޅޭގޮތުން ޕީއެސްއެމް ނިއުސްއަށް މައުލޫމާތު ދެމުން ބައިސިކަލް އެސޯސިއޭޝަން އޮފް މޯލްޑިވްސްގެ ޖެނެރަލް ސެކެޓްރީ އަސްމާ ހަސަން ބުނީ މި ހަރާކާތް ބޭއްވުމުގެ މަގްސަދަކީ ދިވެހިރާއްޖޭގެ މިނިވަންކަމަށް އަލިރަސްގެފާނު ކުރެއްވި ޖިހާދުގައި ވަރަށް ބޮޑު އެއްބާރުލުން ދެއްވި ރާވެރިބޭގެ ހަދާން އާކުރުމުގެ ކަމަށެވެ.

އަސްމާ ބުނީ އާއްމުކޮށް ހުޅުވާލައިގެން ބޭއްވި މިހަރަކާތުގައި 10 އަހަރުން ފެށިގެން އުމުރުން 40 އަހަރުގެ ފަރާތްތައްވެސް ބައިވެރިވި ކަމަށެވެ.

ބައިސިކަލް އެސޯސިއޭޝަން އޮފް މޯލްޑިވްސްއިން މިހަރަކާތް ކުރިއަތް ގެންދިޔައިރު އެސަރަހައްދު ބެލެހެއްޓުމަށް ފުލުހުންނާއި ސިފައިންނާއި، ފަސްޓް އެއިޑްގެ ކަންކަން ބެލެހެއްޓުމުގެ އިންތިޒާމްތައްވެސް އޮތީ ހަމަޖެހިފައެވެ.

މިހަރަކާތުގެ ދެވަނަ ބައެއް ލ.އަތޮޅުގައި ކުރިއަށް ގެންދިއުމަށް ހަމަޖެހިފައިވާ ކަމަށް ހަމަޖެހިފައިވާކަމަށް ބައިސިކަލް އެސޯސިއޭޝަން އޮފް މޯލްޑިވްސްއިން މަޢުލޫމާތުދެއެވެ. މިހަރަކާތުގައިވެސް ކުރިއައްދާނީ ބައިސްކަލް ދުއްވުމާއި ހިނގުމާއި ފެތުމުގެ އިތުރުން ދުވުމެއެވެ.

" އަޅުގަނޑުމެން ކުދިންނަށް މަގުމަތީގެ ސަލާމަތާއި ރައްކާތެރިކަން ކިޔާދިނުމުގެ ގޮތުން ޕޮލިހާ ގުޅިގެން ހަރަކާތްތައް ހިންގަން. އަދި ކަނޑުމަތީގެ ސަލާމަތާއި ރައްކާތެރިކަން ކިޔާދިނުމުގެ ގޮތުން އެކަމުގެ ފަރާތްތަކާއި ގުޅިގެން ހަރާކާތް ކުރިއަތް ގެންދަން .އަދި ހަމަ ދުޅަހެޔޮ ސިިއްހަތެއްގައި ހުރުމަށް ކަސްރަތު ކުރުމަށް ބާރު އެޅުމުގެ ގޮތުން ބައިސްކަލު އާންމު ދިރިއުޅުމުގައި ބައިސްކަލު ބޭނުން ކުރުން އަށަގަތުމަށް ގިނަ ހަރަކާތްތަކެއް ކުރިއަތް ގެންދަން" އަސްމާ ބުންޏެއެވެ.

ބައިސިކަލް އެސޯސިއޭޝަން އޮފް މޯލްޑިވްސްއަކީ ތިމާވެއްޓާއި ދުޅަހެޔޮ ސިއްހަތެއްގައި ހުރުމުގެ އާދަ އަށަގެއްނެވުމަށްޓަކައި މަސައްކަތް ކުރަމުން އަންނަ ޖަމިއްޔާއެކެވެ. ބައިސިކަލް އެސޯސިއޭޝަން އޮފް މޯލްޑިވްސް އުފެދުނުތާ މިހާރު މިވަނީ 9 އަހަރުވެފައެވެ. މި އެސޯސިއޭޝަންގެ ފަރާތުން ރާއްޖޭގެ އެކި ކަންކޮޅުތަކުގެ އިތުރުން ރާއްޖެއިން ބޭރުގައިވެސް ހަރަކާތް ހިންގައެވެ.