ދިރާސީ އާ އަހަރާއެކު، ޢަރަބިއްޔާ ސްކޫލްގެ ކުދިންގެ ކިޔެވުން ދަރުމަވަންތަ ސްކޫލްގެ ވަގުތީ ޢިމާރާތުގައި ފެށުމަށް އެޑިޔުކޭޝަން މިނިސްޓްރީން ނިންމަވައިފިއެވެ.
ޢަރަބިއްޔާ ސްކޫލްގެ ކުދިންގެ ކިޔެވުން ދަރުމަވަންތަ ސްކޫލްގެ ވަގުތީ އިމާރާތުގައި ފަށަން ހަމަޖައްސަވާފައިވާއިރު ދަރުމަވަންތަ ސްކޫލްގެ ކުދިން، ދިރާސީ އައު އަހަރުގައި ކިޔަވާނީ ދަރުމަވަންތައިގެ އައު އިމާރާތުގައެވެ. ވިލާ ކޮލެޖް ކައިރީގައި ހަދާފައިވާ އެ އިމާރާތުގައި މިހާރު ކުރަނީ ފިނިޝިންގެ މަސައްކަތްތެއެވެ.
އަރަބިއްޔާގެ އިމާރާތުގެ ތަނބުތަކުގައި ވަރަށް ބޮޑަށް ރެނދުލައި، ގެއްލުން ވެފައި ހުރުމުން މިދިޔަ އަހަރުގެ ޖެނުއަރީ މަހުން ފެށިގެން އެ ސްކޫލްގެ ވަގުތީ އިމާރާތަކަށް ސަރުކާރުން ހަމަޖައްސައިދިނީ ފޮރިން މިނިސްޓްރީ ވަގުތީ ގޮތުން ހިންގި ޢިމާރާތެވެ.
ފޮރިން މިނިސްޓްރީގެ ވަގުތީ އިމާރާތުގައި ކިޔެވުން ކުރިއަށް ގެންދިޔުމަށްފަހު، މިފެށޭ ދިރާސީ އައު އަހަރާއެކު އަރަބިއްޔާގެ ކުދިންގެ ކިޔެވުން ވެލާނާގެ ބިލްޑިންގް ކައިރިން ދަރުމަވަންތަ ސްކޫލް ވަގުތީ ގޮތުން ހިންގި އިމާރާތައް ބަދަލުކުރެވިގެންދާނެކަމަށް އެޑިޔުކޭޝަން މިނިސްޓްރީން ވިދާޅުވެއެވެ.
ޢަރަބިއްޔާ ސްކޫލު އެންމެ ފުރަތަމަ ހިންގީ އީޕީއެސް ކުރިން ހުރި އިމާރާތުގައެވެ. އޭގެ ފަހުން މަޖީދީ މަގުގައި ޓާޓާ ފްލެޓުތައް އަޅާފައިހުރި ތަނާއި މަންދު ކޮލެޖު ހިންގި އެމްއީއެސް އިމާރާތުގައިވެސް ޢަރަބިއްޔާ ސްކޫލު ހިންގިއެވެ.
ޢަރަބިއްޔާ ސްކޫލްގެ ދާއިމީ އިމާރާތް ހަދަން ހަމަޖައްސާފައި ވަނީ ބާ ޖަމާލުއްދީން ހުރި ބިމުގައެވެ. އެ މަސައްކަތަށް ބައު ޖަމާލުއްދީންގެ އިމާރާތް މިހާރު ވަނީ ތަޅާލައިފައިވެއެވެ. ޢަރަބިއްޔާ ސްކޫލުގެ ޢައު އިމާރާތާއި، ޖަމާލުއްދީން ސްކޫލް އެނެކްސް އިމާރާތުގެ މަސައްކަތް ޑިޒައިން އެންޑް ބިލްޓް އުޞޫލުން ކުރުމަށް އެޑިއުކޭޝަން މިނިސްޓްރީން ޙަވާލުކޮށްފައިވަނީ އަމީން ކޮންސްޓްރަކްޝަން ޕްރައިވެޓް ލިމިޓެޑާއެވެ.
ޢަރަބިއްޔާ ސްކޫލުގެ އައު އިމާރާތާއި، ޖަމާލުއްދީން ސްކޫލުގެ އެނެކްސް އިމާރާތުގެ މަސައްކަތް އަމީން ކޮންސްޓްރަކްޝަނާއި ޙަވާލުކޮށްފައިވަނީ 440 ދުވަހުގެ ތެރޭގައި މަސައްކަތް ނިންމާގޮތަށެވެ.