މިދިޔަ މަހު އާމްދަނީ ދަށް، ނަމަވެސް އެކްސްޕޯޓްކުރި މުދަލުގެ އަދަދު އިތުރު

މިިދިޔަ އޭޕްރީލް މަހު ރާއްޖެއިން އެކްސްޕޯޓް ކުރި މުދަލުގެ އަދަދު އޭގެ ކުރީ އަހަރާއި އަޅާބަލާއިރު އިތުރުވެއްޖެއެވެ. ކަސްޓަމަސްގެ ތަފާސްހިސާބުތައް ދައްކާގޮތުން އޭޕްރީލް މަހު ރާއްޖެއިން އެކްސްޕޯޓްކުރި މުދަލުގެ ޢަދަދު ވަނީ %4 އިތުރުވެފައެވެ.

އޭޕްރީލް މަހު ރާއްޖެއިން އެކްސްޕޯޓްކުރި މުދަލުގެ އަދަދު އިތުރުވިނަމަވެސް ކަސްޓަމްސްގެ ތަފާސްހިސާބުތައް ދައްކާގޮތުން އިމްޕޯޓް ކުރި އަދަދާއި ދައުލަތައް ލިބުނު އާމްދަނީ ވަނީ ދަށްވެފައެވެ. 2022 ވަނަ އަހަރުގެ އޭޕްރިލް މަހު ރާއްޖެއަށް 4.7 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ އޭޕްރިލް މަހު މި ޢަދަދުވަނީ 4.5 ބިލިއަން ރުފިޔާ އަށް ދަށްވެފައެވެ. އެހެންކަމުން މިއީ %4 ދަށް އަދަދެކެވެ.

މިއަހަރުގެ އޭޕްރިލް މަހު ދައުލަތަށް ލިބުނު އާމްދަނީ 2022 ވަނަ އަހަރުގެ އޭޕްރިލް މަހާ އަޅާބަލާއިރު %16 ވަނީ ދަށްވެފައެވެ. 2022 ވަނަ އަހަރުގެ އޭޕްރިލް މަހު 361 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ އޭޕްރިލް މަހު މި އަދަދު ވަނީ 305 މިލިއަން ރުފިޔާއަށް ދަށްވެފައެވެ.

ކަސްޓަމްސްގެ ތަފާސްހިސާބުތައް ދައްކާގޮތުން މިއަހަރުގެ އޭޕްރީލް މަހު ރާއްޖެއިން 193 މިލިއަން ރުފިޔާގެ މުދާ ވަނީ އެކްސްޕޯޓްކޮށްފައެވެ. މިދިޔަ އަހަރުގެ އޭޕްރީލް މަހު މި އަދަދު އުޅުނީ 186 މިލިއަނުގައެވެ.

ރާއްޖެއިން އެންމެ ގިނައިން މުދާ އެކްސްޕޯޓްކުރި ޤައުމުތައް:

• ތައިލޭންޑް - %45
• އިނގިރޭސިވިލާތް - %18
• ޖަރުމަނުވިލާތް - %11
• މޮރިޝަސް - %6
• އިނޑިއާ - %5

ރާއްޖެއިން އާންމުގޮތެއްގައި އެންމެ ގިނައިން އެކްސްޕޯޓްކުރަނީ މަހުގެ ބާވަތްތަކެވެ. ކަސްޓަމްސްގެ ތަފާސްހިސާބުތައް ދައްކާގޮތުން މިއަހަރުގެ އޭޕްރީލް މަހު މަހުގެ ބާވަތްތަކުގެ ތެރެއިން އެންމެ ގިނައިން އެކްސްޕޯޓްކޮށްފައި ވަނީ ސްކިޕްޖެކް ޓޫނާއެވެ. މި ބާވަތުގެ މަހުން 100 މިލިއަނަށްވާ މަސް ވަނީ އެކްސްޕޯޓްކޮށްފައެވެ.

ރާއްޖެއަށް އެންމެ ގިނައިން މުދާ އިމްޕޯޓްކުރި ޤައުމުތައް:

• އިންޑިއާ - %17
• އޮމާން - %16
• ޔޫއޭއީ - %13
• ޗައިނާ - %11
• ސިންގަޕޯރ - %10

މިދިޔަ އޭޕްރީލް މަހު ރާއްޖެއަށް އެންމެ ގިނައިން އިމްޕޯޓްކޮށްފައިވަނީ ތެލާއި ގޭހުގެ ބާވަތްތަކެވެ. އެގޮތުން މިބާވަތުން އިމްޕޯޓްކުރި މުދަލުގެ އަގު 838 މިލިއަނަށް އަރައެވެ. ދެން އެންމެ ގިނައިން އެތެރެކޮށްފައި ވަނީ ކެއުމަށް ބޭނުންކުރާ އެކިއެކި ބާވަތްތަކެވެ. އެގޮތުން 816 މިލިއަން ރުފިޔާގެ ކާބޯތަކެތި ހުސްވި އޭޕްރީލް މަހު ވަނީ ރާއްޖެ ގެނެސްފައެވެ.

މިއަހަރުގެ އޭޕްރީލް މަހު ރާއްޖެއިން ޕްރޮސެސްކުރެވުނު ޑިކްލަރޭޝަންގެ އަދަދަކީ 20،058 އެވެ. މިދިޔަ އަހަރުގެ އޭޕްރީލް މަހު މި އަދަދު އުޅުނީ 18،861 ގައެވެ.

ރާއްޖެއިން ބޭރުން މިދިޔަ އޭޕްރީލް މަހު ރާއްޖެ އައިސްފައިވަނީ 3 އުޅަނދެވެ. 2022 ވަނަ އަހަރުގެ އޭޕްރީލް މަހު އައިސްފައިވަނީ 6 އުޅަނދުކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.