މިއަދަކީ ވަރަށް އުފާވެރި އަދި އެހާމެ ހިތްހަމަ ޖެހިގެން ދަތުރު ކުރެވުނު ދުވަހެއް ކަމަށް އަބުދުލްޣަފޫރު އަލީ، ގައްބެ ބުނެފިއެވެ.
ނ ވެލިދޫއަށް މިއަދު ދިއުމަށްފަހު ޕީއެސްއެމްއާ ވާހަކަ ދައްކަމުން ގައްބެ ބުނީ މިއަދުގެ ދަތުރަކީ އެންމެ ބާރަށް މިހާތަނަށް ދަތުރު ކުރެވުނު އެއް ދުވަސް ކަމަށާއި، ހިތްހަމަ ޖެހިގެން ދަތުރުކޮށްލެވުނު ދުވަހެއް ކަމަށެވެ.
" ވަރަށް ސަޅި ދުވަހެއް މިއަދަކީ. ދަތުރު ފެށި ފަހުން އެންމެ ބާރަށް ބޭނުންވޮ ގޮތަށް ދުއްވާލެވުނު ދުވަސް. ވަރަށް ހިތްހަމަ ޖެހިއްޖެ. އަނެއްކާ ކޮންމެ ރަށަކުން ކިޔާ މަރުހަބާ ވެގެން މިދަނީ ދަތުރުގެ އެންމެ ބޮޑު ހިތްވަރަކަށް" ގައްބެ ބުންޏެވެ.
ކަތަމަރާންގެ ރިޔާ އަޅުވާ ބުޅީގަނޑަށް ދިމާވި މައްސަލަ ހައްލުވެވެފައިވާ ކަމަށާއި، ބުޅިގަނޑު ވަރަށް ރީއްޗަށް ށ ފުނަދޫއިން ހަދާދީފައިވާ ކަމަށް ގައްބެ ބުންޏެވެ. ދަތުރުގައި މާދަމާ ނިކުންނާނީ ބަރަވެލި ކަނޑަށް ކަމަށާއި، މާދަމާ ޅ ނައިފަރަށް ދެވޭނެ ކަމަށް ގައްބެ ބުންޏެވެ. ރާއްޖެ ވަށާ ގައްބެ ކުރާ ދަތުރު ނިމޭނެ ކަމަށް ގައްބެ ލަފާކުރަނީ މިމަހުގެ އަށްވަނަ ދުވަހުއެވެ.
" މޫސުން ރަނގަޅު ނަމަ މި ބަލަނީ މިމަހުގެ 8 ގައި ދަތުރު ނިންމާލެވޭނެ ކަމަށް. މާލެ އައުމުގެ ކުރިން ކ ހުރާ އެއީ ފަހު މަންޒިލަކަށް މިބަލަނީ. މޫސުމަށް ބަލާފަ ނިންމާނީ. ފަހަރެއްގައި ޝެޑިއުލަށް ބަދަލެއްވެސް އައިސްދާނެ" ގައްބެ ބުންޏެވެ.
ގައްބެ ރިޔަލު ކަނދެއްގައި މިކުރާ ދަތުރަކީ، ވިޒިޓް މޯލްޑިވްސް 2016 އާއި ގުޅިގެން ރާއްޖޭގެ ފަތުރުވެރިކަން އިޝްތިހާރުކުރުމަށް ހިންގާ ހަރަކާތުގެ ތެރޭގައި ހިމެނޭ ދަތުރެެކެވެ. އެޓޯލް ސެއިލަރއިން އިންތިޒާމްކުރި ދަތުރު ކުރިއަށްގެންދަނީ ޓޫރިޒަމް މިނިސްޓްރީއާއި ގުޅިގެންނެވެ.