މިއަހަރުގެ ފުރަތަމަ 4 މަސްދުވަސް ނިމުމުގެ ކުރިން ރާއްޖެއަށް 6 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖެއަށް މިހާރު މަހެއްގެ މައްޗަށް ލައްކައަކަށްވުރެ ގިނަ ފަތުރުވެރިން އާދެއެވެ. މިމަހުގެ ފުރަތަމަ 19 ދުވަހު ވަނީ 102،000 އަށްވުރެ ގިނަ ފަތުރުވެރިން އައިސްފައެވެ.
ތަފާސްހިސާބުތައް ދައްކާގޮތުން މިމަހުގެ 19 ވަނަ ދުވަހުގެ ނިޔަލަށް ރާއްޖެއަށް 626،392 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %18.8 އިތުރު އަދަދެކެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 527،366 ފަތުރުވެރިންނެވެ.
މިދިޔަ އަހަރު ރާއްޖެއަށް 2 ވަނަ އަށް އެންމެ ގިނައިން ފަތުރުވެރިން އައި ޤައުމެއްގެ ގޮތުގައި ރަޝިއާ އޮތްނަމަވެސް މި އަހަރު އެ ޤައުމު ހިމެނެނީ ރާއްޖެއަށް މިހާތަނަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ.
އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައި 5 ޤައުމު:
* ރަޝިއާ: 75،594 ފަތުރުވެރިން
* އިންޑިއާ: 66،630 ފަތުރުވެރިން
* އިނގިރޭސިވިލާތް: 61،464 ފަތުރުވެރިން
* އިޓަލީވިލާތް: 52،564 ފަތުރުވެރިން
* ޖަރުމަނުވިލާތް: 47،520 ފަތުރުވެރިން
އެވްރެޖްކޮށް މިހާރު ރާއްޖެއަށް ދުވާލެއްގެ މައްޗަށް 5747 ފަތުރުވެރިން އާދެއެވެ. އަދި ރާއްޖެ އަންނަ ފަތުރުވެރިން ރާއްޖޭގައި 7.9 ދުވަހުގެ ޗުއްޓީއެއް ހޭދަކުރެއެވެ.
ވަކިވަކި މަސްމަހު ރާއްޖެ އައި ފަތުރުވެރިންގެ އަދަދު:
* ޖަނަވަރީ: 172،499 ފަތުރުވެރިން
* ފެބުރުއަރީ: 177،915 ފަތުރުވެރިން
* މާރޗް: 173،514 ފަތުރުވެރިން
* އޭޕްރީލް 19ގެ ނިޔަލަށް: 102،464 ފަތުރުވެރިން
ރިސޯޓް، ގެސްޓްހައުސް، ސަފަރީ އަދި ހޮޓެލް ހިމެނޭހެން ރާއްޖޭގައި މި ވަގުތު 1231 ތަނެއް ވަނީ ފަތުރުވެރިންނަށް ޚިދުމަތްދޭން ހުޅުވައިފައެވެ. މިއާއެކު އެނދުގެ އަދަދު 60،514 އަށް އަރައެވެ.
ފަތުރުވެރިންނަށް ޚިދުމަތްދޭން އޮޕަރޭޝަންގައި ހުރި އެނދުގެ އަދަދަށް ބަލާއިރު %68 ޙިއްޞާކުރަނީ ރިސޯޓްތަކެވެ. އަދި ގެސްޓްހައުސްތައް %24، ސަފާރީތަކުން %5 އަދި %3 ހިއްސާކުރަނީ ހޮޓެލްތައް ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.