މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމް.އެމް.ޕީ.އާރު.ސީއިން ޑަބްލިއު.ޓީ.އެމް ލެޓިން އެމެރިކާގައި ރާއްޖެ އިޝްތިހާރުކޮށްފިއެވެ. މި ފެއަރގައި އެމް.އެމް.ޕީ.އާރު.ސީއިން ބައިވެރިވެފައިވަނީ 15 އިންޑަސްޓްރީ ޕާޓްނަރުންނާއެކުއެވެ.
ޑަބްލިއު.ޓީ.އެމް ލެޓިން އެމެރިކާ ކުރިއަށްގޮސްފައިވަނީ މިމަހުއެވެ. 3 ދުވަހުގެ މުއްދަތަކަށް މި ފެއަރ ކުރިއަށްގެންގޮސްފައިވަނީ ބްރެޒިލްގައެވެ.
ޑަބްލިއު.ޓީ.އެމް ލެޓިން އަކީ ލެޓިން އެމެރިކާގެ މާކެޓުގައި ބާއްވާ އެންމެ މަޤްބޫލު އެއް ފެއަރއެވެ. މި ފެއަރގައި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި މީޑިއާ އަދި މަޝްހޫރު އިންފުލުއެންސަރުންނާއި، ކޮންސިއުމަރުންނާއި ބައްދަލުކޮށް ދިވެހިރާއްޖެ އިޝްތިހާރުކުރުމުގެ ފުރުޞަތު ލިބިފައިވާކަމަށް އެމް.އެމް.ޕީ.އާރު.ސީއިން ބުނެއެވެ. މިއަހަރުގެ މި ފެއަރގައި 20،000 އަށްވުރެ ގިނަ ޓްރެވެލް ޕްރޮފެޝަނަލުންނާއި، 565 އެގްރިބިޓަރުން ބައިވެރިވިއެވެ.
ދިވެހިރާއްޖޭގެ 60 އަކަފޫޓުގެ ސްޓޭންޑް ފަރުމާކޮށްފައިވަނީ ރާއްޖޭގެ ރަށްތަކުގެ ހިތްގައިމުކަމާއި ރީތިކަން ދައްކާލެވޭގޮތަށެވެ. އަދި ރާއްޖޭގެ ސްޓޭންޑަށް ޒިޔާރަތްކުރާ ބޭފުޅުންނަށް ތަފާތު ތަޖުރިބާތައް ކޮށްލުމުގެ ފުރުޞަތު ވަނީ ފަހިކޮށްދީފައެވެ.
މި ފެއަރގައި އެމް.އެމް.ޕީ.އާރު.ސީއާއި އިންޑަސްޓްރީގެ ބޭފުޅުން ރާއްޖޭގެ ފަތުރުވެރިކަމުގެ ޕްރޮޑަކްޓްތައް ވަނީ އިޝްތިހާރުކޮށްފައެވެ. މީގެއިތުރުން ފެއަރގެ ސަބަބުން ލެޓިން އެމެރިކާ މާކެޓާއި، ދިވެހިރާއްޖޭގެ ފަތުރުވެރިކަމުގެ ދާއިރާއާއި މެދު އޮންނަ ގުޅުން ހަރުދަނާވުމުގެ ފުރުޞަތު ލިބިފައިވާކަމަށް އެމްއެމްޕީއާރުސީން ބުނެއެވެ.
ލެޓިން އެމެރިކާ މާކެޓުން ދިވެހިރާއްޖެއަށް 19،865 ފަތުރުވެރިން ވަނީ މިއަހަރުގެ މިހާތަނަށް ޒިޔާރަތްކޮށްފައެވެ. އެމް.އެމް.ޕީއާރު.ސީއިން މިއަހަރު މި މާކެޓަށް އަމާޒުކޮށްގެން ގިނަ ހަރަކާތްތަކެއް ކުރިއަށްގެންދިއުމަށް ހަމަޖެހިފައިވެއެވެ. އޭގެތެރޭގައި ޑިޖިޓަލް އަދި ސޯޝަލް މީޑިއާ މާކެޓިން ކެމްޕެއިންތަކާއި، ވެބިނަރތަކާއި، އިންފުލޫއެންސަރުންނާއި އަދި ފެމިލިއަރައިޒޭޝަން ދަތުރުތައް ފާހަގަކޮށްލެވެއެވެ.