ވިޔަފާރިތަކުން ކަސްޓަމަރުންނަށް ވިއްކާ ނުވަތަ ފޯރުކޮށްދޭ ކޮންމެ ޕްލާސްޓިކް ކޮތަޅަކަށް، ފީގޮތުގައި ކަސްޓަމަރުގެ އަތުން 2 ރުފިޔާ ނެގޭގޮތަށް ކުނި މެނޭޖްކުރުމުގެ ބިލަށް ގެނައި އިސްލާޙު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ތަސްދީގު ކުރެއްވީ 18 ޑިސެމްބަރ 2022 ގައެވެ.
މި އިސްލާޙަށް މިމަހުގެ 18 ގައި ޢަމަލުކުރަން ފަށާއިރު، ވަކިން ވިއްކިޔަސް، ބޮނޑި ވިއްކިޔަސް، ކޮންމެ ކޮތަޅަކަށް ފީގެ ގޮތުގައި 2 ރުފިޔާ ނަގަންވާނެކަމަށް މީރާއިން ވިދާޅުވެއެވެ. ޕްލާސްޓިކް ކޮތަޅުން ފީ ނެގުމަށް ވަމުންދާ ތައްޔާރީތަކުގެ ތެރެއިން އާއްމުންނާއި ވިޔަފާރިވެރިން މިކަމަށް ހޭލުންތެރިކުރުމަށް މިރާއިން ވަނީ ޕްލާސްޓިކް ފީ އާއި ގުޅޭގޮތުން ޚާއްސަ ގައިޑްލައިނެއް ތައްޔާރުކޮށްފައެވެ.
މޯލްޑިވްސް އިންލޭޑް ރެވެނިއު އޮތޯރިޓީއިން ވިދާޅުވީ، ޕްލާސްޓިކް ކޮތަޅު ބޮނޑިއެއް ވިއްކި ނަމަވެސް ނުވަތަ ހިލޭ ދިން ނަމަވެސް، އެ ކޮތަޅު ބޮނޑީގައި ހިމެނޭ ކޮންމެ ކޮތަޅަކަށް -/2 ރުފިޔާގެ ރޭޓުން ޕްލާސްޓިކް ކޮތަޅުގެ ފީ ނަގަންވާނެކަމަށެވެ. އަދި ޕްލާސްޓިކް ކޮތަޅު ބޮނޑި ވިއްކާ ފަރާތަކީ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތެއްނަމަ، އޭގެ އަގުން ޖީ.އެސް.ޓީވެސް ނަގަންވާނެކަމަށް މީރާއިން ވަނީ ވިދާޅުވެފައެވެ.
ޕްލާސްޓިކް ކޮތަޅުގެ ފީ ނަގަން ނުޖެހޭ ކޮތަޅަކުން ޕްލާސްޓިކް ކޮތަޅުގެ ފީގެ ގޮތުގައި ޢަދަދެއް ނަގައިގެންނުވާނެކަމަށް މީރާއިން ވަނީ ވިދާޅުވެފައެވެ. އަދި ނަގަންޖެހޭ ޢަދަދަށްވުރެ އިތުރަށް ޕްލާސްޓިކް ކޮތަޅުގެ ފީގެ ގޮތުގައި ޢަދަދެއް ނަގައިގެންނުވާނެކަމަށާއި، އެފަދަ ޙާލަތެއް މެދުވެރިވެއްޖެނަމަ، ވިޔަފާރި ހަރަކާތް ހިންގާ ފަރާތުން އެ ޢަދަދު އަނބުރައި ކަސްޓަމަރަށް ރައްދުކުރަންވާނެކަމަށް މީރާއިން ވަނީ ފާހަގަކޮށްފައެވެ.
އެފަދަ ޢަދަދެއް ނެގުނު ޓެކްސް ނެގޭ މުއްދަތުގެ ޖީ.އެސް.ޓީ ބަޔާން ހުށަހަޅާއިރު، އެ ޢަދަދު ރައްދުކޮށްފައިނުވާނަމަ، އެ މުއްދަތުގެ ޖީ.އެސް.ޓީ ބަޔާނުގައި ހިމަނައިގެން، ވިޔަފާރި ހަރަކާތުން މީރާއަށް އެ ޢަދަދު ދައްކާ އަދި މީރާއަށް އެ އަދަދު ދައްކާފައިވީ ނަމަވެސް، ކަސްޓަމަރަށް އެ ޢަދަދު އަނބުރާ ރައްދުކުރަންވާނެކަމަށްވެސް މީރާގެ ޕްލާސްޓިކް ގައިޑްލައިންގައި ބަޔާންކޮށްފައިވެއެވެ.
ޕްލާސްޓިކް ކޮތަޅުން ނަގާ ފީގެ މަޢުލޫމާތު މީރާއާއި ހިއްސާކުރަންޖެހޭ
ޖީ.އެސް.ޓީއަށް ރަޖިސްޓަރީކޮށްފައިވާ ފަރާތަކުން ނަގާ ޕްލާސްޓިކް ކޮތަޅުގެ ފީގެ މަޢުލޫމާތު، އެ ފަރާތުން މީރާއަށް ހުށަނޭޅުމަކީ ކުށެކެވެ. އަދި އެކުށުގެ މަދަނީ އަދަބަކީ، ފީ ނެގޭ މުއްދަތުގައި ދައްކަންޖެހޭ ފީގެ ޢަދަދުގެ %5.0 އިން ޖޫރިމަނާކުރުމާއި، މަޢުލޫމާތު ފޯރުކޮށް ނުދީ ހިނގާ ކޮންމެ ދުވަހަކަށް -/50 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުން ކަމަށް މީރާއިން ވިދާޅުވެއެވެ.
ޖީ.އެސް.ޓީއަށް ރަޖިސްޓަރީކޮށްފައިވާ ފަރާތަކުން ނަގާ ޕްލާސްޓިކް ކޮތަޅުގެ ފީ މީރާއަށް ނުދެއްކުމަކީ ކުށެކެވެ. އެ ކުށުގެ މަދަނީ އަދަބަކީ ޕްލާސްޓިކް ކޮތަޅުގެ ފީގެ އަދަދު ދައްކަންޖެހޭ ދުވަހުން ފެށިގެން ވޭތުވަމުންދާ ކޮންމެ ދުވަހަކަށް، ނުދައްކައި އޮތް އަދަދުގެ %05.0 އިން ޖޫރިމަނާކުރުމެއެވެ.
މުދަލެއް ވިއްކުމަށް ކޮންމެހެން ބޭނުންވާ ފެންވަރަށް އެ މުދަލެއް ބަންދުކުރުމަށް، އެ މުދާ އުފައްދާ ފަރާތުން ބޭނުންކޮށްފައިވާ ޕްލާސްޓިކް ކޮތަޅުން، ޕްލާސްޓިކް ކޮތަޅުގެ ފީ ނަގާކަށް ނުޖެހޭނެއެވެ. އޭގެ ތެރޭގައި ޒިޕްލޮކް ބޭގް، ޕާން، ބަނަސް ފަދަ ތަކެތި ބަންދުކޮށްފައި ހުންނަން ޕްލާސްޓިކް ކޮތަޅު، ޖޫސްޕެޓީ ކޮތަޅު ހިމެނެއެވެ.
މީގެ އިތުރުން ފަތް، މަސްމިރުސް ފަދަ ބާވަތްތައް ޕެކްކޮށްފައި ހުންނަ ޕްލާސްޓިކް ކޮތަޅު، ތާޒާ މަސް ވިއްކާއިރު އެ މަސް އަޅާފައި ދޭ ނުވަތަ އެ މަސް އަޅާފައި ވިއްކާ ޕްލާސްޓިކް ކޮތަޅު، ބިންލައިނަރއިން ޕްލާސްޓިކް ކޮތަޅު ހިމެނެއެވެ.
ހަމަ މި ބީދައިން މުދަލެއް ވިއްކުމަށް ފީ ނަގާނެ ޕްލާސްޓިކް ކޮތަޅަކީ ފްރޯޒަން ފިޝް ނުވަތަ ގަނޑުކުރި މަސް ވިއްކާއިރު، އެފަދަ މަސް އެޅުމަށް ނުވަތަ އަޅާފައި ދޭ ނުވަތަ ވިއްކާ ޕްލާސްޓިކް ކޮތަޅުން ޕްލާސްޓިކް ކޮތަޅު، ޒީނަތްތެރިކުރުމުގެ ގޮތުން ގެންގުޅޭ މަސް ނުވަތަ ޕެޓް ފިޝް ގަންނައިރު އެ މަސް ޕްލާސްޓިކް ކޮތަޅަކަށް އަޅައިފައި ދޭ ކޮތަޅު، ކުކުޅު ވިއްކާއިރު ޕްލާސްޓިކް ކޮތަޅަކަށް އަޅާފައި ވިއްކާނަމަ ފީ ނަގާނެއެވެ.
ވިޔަފާރިއަކުން ޕްރޮމޯޝަނަލް އިވެންޓެއްގައި، އެ ތަނުން މުދާ ގަނެވިއްކާނަމަ، ޕްލާސްޓިކް ކޮތަޅެއް ހިލޭ ފޯރުކޮށްދިން ކަމުގައިވިޔަސް އެ ކޮތަޅުން ޕްލާސްޓިކް ކޮތަޅުގެ ފީ ނަގާނެއެވެ. ހަނޑޫ، ހަކުރު އަދި ފުށް ފަދަ ތަކެތި އަޅައިފައި ކަސްޓަމަރަށް ފޯރުކޮށްދޭ ޕްލާސްޓިކް ކޮތަޅުންވެސް ޕްލާސްޓިކް ކޮތަޅުގެ ފީ ނަގަންވާނެކަމަށް މީރާއިން ވަނީ ވިދާޅުވެފައެވެ.
ޓޫރިޒަމް ދާއިރާގެ މުދަލާއި ޚިދުމަތް ފޯރުކޮށްދޭ ފަރާތްތަކުން ވެސް ޕްލާސްޓިކް ކޮތަޅުގެ ފީގެ ގޮތުގައި އެ ފަރާތުން ނަގާ އަދަދު ޖީ.އެސް.ޓީ ބަޔާނުގައި ހިމަނާނީ ދިވެހި ރުފިޔާއިކަމަށް މީރާއިން ވަނީ ފާހަގަކޮށްފައެވެ. އަދި މީރާއަށް އެ ފައިސާ ދައްކަންވާނީވެސް ދިވެހި ރުފިޔާއިއްނެއެވެ.
ފީ ނަގަން ނުޖެހޭ ޕްލާސްޓިކް ކޮތަޅަކީ ކޮބާ؟
● ޑިއުޓީ ފްރީ ފިހާރަތަކުން ވިއްކާ ނުވަތަ ހިލޭ ދޭ ޕްލާސްޓިކް ކޮތަޅު
● ބަންދުނުކޮށް ހުންނަ ހުރިހާ ބާވަތެއްގެ ތާޒާ ކަނޑުމަހާއި، ފަރުމަހާއި އެމާއި ސީފުޑް އަދި އެފަދަ ތަކެތީގެ ބައިތައް އެޅުމަށް ބޭނުންކުރާ ޕްލާސްޓިކް ކޮތަޅު
● ކުނި މެނޭޖުކުރުމުގެ ޚިދުމަތް ދޭ ފަރާތްތަކުން ނުވަތަ ކަމާބެހޭ އެހެން އިދާރާއަކުން ކުނި އެޅުމަށް ޚާއްޞަކޮށް ވިއްކާ ނުވަތަ ދޫކުރާ "ބިންލައިނަރ"
● މުދާ އުފައްދާ ފަރާތުން މުދާ ވިއްކުމަށް ކޮންމެހެން ބޭނުންވާ ފެންވަރަށް ބަންދުކުރުމަށް ބޭނުންކޮށްފައިވާ ޕްލާސްޓިކް ކޮތަޅު
ޕްލާސްޓިކް ބޭނުންކުރުން 2023 ވަނަ އަހަރާއި ހަމަޔަށް ހުއްޓާލާ ޤައުމަކަށް ދިވެހިރާއްޖެ ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ ސަރުކާރުގެ ވަރަށް ބޮޑު އަމާޒެކެވެ. މި އަމާޒު ހާސިލްކުރުމަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނަށް ގެނެސްފައިވާ އިޞްލާޙުގެ ދަށުން ތިމާވެއްޓަށް ގެއްލުން ދޭ އެއްޗެހީގެ ތެރެއިން، ރައީސުލްޖުމްހޫރިއްޔާ ކަނޑައަޅާ ސިންގަލް-ޔޫސް ޕްލާސްޓިކްގެ ބާވަތްތައް، ދިވެހިރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުމަކީ މަނާކަމެއްގެ ގޮތުގައިވަނީ ކަނޑައަޅާފައެވެ.
އެކި މަރުޙަލާތަކަކަށް ބަހާލައިގެން ކަނޑައެޅުމުގެ އިޚްތިޔާރު ރައީސުލްޖުމްހޫރިއްޔާއަށް ދެއްވާފައިވާއިރު ފުރަތަމަ ލިސްޓު މިދިޔަ އަހަރުގެ ޖެނުއަރީމަހުގެ 1 ވަނަ ދުވަހު ވަނީ އާއްމުކުރައްވާފައެވެ.
އެގޮތުން ދިޔާތަކެތި ބުއިމަށް ބޭނުންކުރާ އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ހޮޅިއާއި، ޕްލާސްޓިކް ތަށި، ސަމްސާ، ވަޅި، އޫ، ދިޔާތަކެތި ގިރަން ބޭނުންކުރާ ޕްލާސްޓިކް ދަނޑިކޮޅާއި ކާބޯތަކެތި ބަންދުކުރާ ސްޓައިރަފޯމް ފޮއްޓާއި ބާޒާރުކުރަން ބޭނުންކުރާ 30 ސެންޓިމީޓަރަށް ވުރެ ކުޑަ ޕްލާސްޓިކް ކޮތަޅު ހިމެނެއެވެ.