ށ. ނަރުދޫގެ ބަނދަރު ތަރައްޤީކުރުމުގެ މަސައްކަތް މިމަހު ފަހުކޮޅު ފެށުމަށް ތައްޔާރުވަމުން އަންނަ ކަމަށް މަސައްކަތުގެ ކޮންޓްރެކްޓަރ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ( އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާބާދީގައި 700ހާ މީހުން ދިރިއުޅޭ ނަރުދޫއަކީ ދަނޑުވެރިކަން ކުރާ ރަށެކެވެ. ދަނޑުވެރިކަމުން އުފައްދާ ތަކެތި ރަށުން ސަޕްލައި ކުރުމުގައި ދިމާވާ އެންމެ ބޮޑު ގޮންޖެހުމަކީ ސަޕްލައި ކުރާ ދޯނިތަކަށް ރަށުގެ ކަނޑިންމައިން ނުވަދެވުމުގެ ދަތިކަމެއެވެ.
ނަރުދޫގައި މިހާރު އޮތް ބަނދަރަކީ ދިޔަވަރު ކުޑަ ވެއްޖެ ނަމަ އުޅަނދު ފަހަރަށް ވަދެ ނުކުތުން ބޮޑު ތަކުލީފަކަށްވެފައިވާ ބަނދަރެކެވެ. ދިޔަ ވަރު ބޮޑުގަޑީގަވެސް ބަރު މުދާ ހިފައިގެން އަންނަ ދޯނި ފަހަރުތަކާއި މާލެއިން މުދާ ހިފައިގެން ރަށަށް އަންނަ ބޯޓް ފަހަރުތަކަށް ބަނދަރަށް ނުވަދެވި މަޑުކުރަން ޖެހޭ ދުވަސްވެސް މަދެއްނޫނެވެ. ސަބަބަކީ ފަޅުގެ ކަނޑިންމަ ތިލަވުމެވެ.
ނަރުދޫ ކައުންސިލުގެ ނައިބް ރައީސް އަލީ ޝަރީފް ވިދާޅުވީ ރަށުގެ މުދާ އުފުލާ ފަރާތްތަކާއި ސަޕްލައި ކުރާ ފަރާތްތަކާއި ދަނޑުވެރިންވެސް ބަނދަރުގެ މިހާރުގެ ހާލަތާއި ގުޅިގެން ކަންބޮޑުވުން ފާޅުކުރަމުން އަންނަ ކަމަށެވެ. ނަރުދޫގެ ކަނޑިންމަ އޮތް ގޮތުން ދޯނި ފަހަރު ކަނޑިންމަ މައްޗަށް ބީހި ދޯނި ފަހަރު ހަލާކުވެފައިވާކަމަށްވެސް ކައުންސިލުން ވަނީ ވިދާޅުވެފައެވެ.
" އަސްލު ރަށަކީ ދަނޑުވެރިކަން ކުރާ ރަށަކަށް ވުމުން ދަނޑުވެރިކަމުން އުފައްދާތަކެތި ބޭރުވާނެ ގޮތެއް ނެތް. އެއީ ސަޕްލައި ކުރާ ދޯނި ފަހަރުތަކަށް ކަނޑިންމައިން ނުއެއް ވަދެވޭ. ބަނދަރުން މުދާ އަރުވާ ބޭލުމަށް އެހާ އުނދަގޫ. އެހެންވުމުގެ ސަބަބުން ގިނަ ފަހަރަށް ދަނޑުވެރިންނަށް އޮންނަނީ ގެއްލުންވެފައި" ޝަރީފް ވިދާޅުވިއެވެ.
ޝަރީފް އިތުރަށް ވިދާޅުވީ ބަނދަރު ތަރައްގީވެގެން ދިޔުމުން ލަފާފުރުމުގެ ދަތިކަމަށް ހައްލެއް ލިބިގެން ދާނެކަމަށެވެ. އަދި ދޯނި ފަހަރުތަކާއި ބޮޑެތި ބޯޓު ފަހަރުތަކުން ފަޅަށް ވަދެ ނިކުތުމަށް އުފުލި ތަކުލީފުތަކަށް ނިމުމެއް އަންނާނެކަމަށެވެ.
މިކަމަށް ހައްލު ހޯދާދިނުމުގެ ގޮތުން ސަރުކާރުން ނަރުދޫގެ ބަނދަރު މަރާމާތު ކުރުމުގެ މަސައްކަތް އެމްޓީސީސީއާއި ހަވާލު ކޮށްފައިވަނީ މި ދިޔަ އަހަރުގެ އޭޕްރީލް މަހުގެ ތެރޭގައެވެ.
ށ.ނަރުދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތާ ގުޅޭގޮތުން ޕީއެސްއެމް ނިއުސްއަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މިމަޝްރުޢުގެ އަމަލީ މަސައްކަތް ފެށުމަށްޓަކައި 1 މާރޗް 2023 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފައިވާކަމަށެއެވެ. އަދި ޢަމަލީ މަސައްކަތްތައް މިމަހު ފަހުކޮޅު ނަރުދޫގައި ފެށުމަށް ތައްޔާރުވަމުން އަންނަކަމަށް އާޒިމް ވިދާޅުވިއެވެ.
ނަރުދޫގެ ބަނދަރު ތަރައްގީ ކުރުމުގެ މަޝްރޫޢުގެ ދަށުން، 51,212 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 4,120 ކިއުބިކް މީޓަރުގެ ސަރަޙައްދެއްގެ ނެރު ފުންކުރުން ހިމެނެއެވެ.
މީގެ އިތުރުން 371 މީޓަރުގެ ސަރަޙައްދެއްގައި ބޭރުތޮށި ލުމާއި، 205 މީޓަރުގެ ސަރަޙައްދެއްގައި ރިވެޓްމެންޓް ޖެހުމުގެ އިތުރުން 210 މީޓަރުގެ ސަރަޙައްދެއްގައި އެއްގަމުތޮށި ލުމާއި، 955 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުން ހިމެނެއެވެ. އަދި ރޭމްޕެއް ހެދުމާއި، ބަނދަރު ބައްތި ހަރުކުރުމުގެ މަސައްކަތްވެސް މި މަޝްރޫއުގެ ދަށުން ކުރެވޭނެއެވެ.
މި މަޝްރޫޢަކީ 41.34 މިލިއަން ރުފިޔާގެ މަޝްރޫޢެކެވެ.