މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީގެ ލެބޯޓަރީން ފޯރުކޮށްދޭ ޚިދުމަތްތައް އިތުރަށް ތަރައްޤީކޮށް ފުޅާކުރުމުގެ ގޮތުން، އައު ޚިދުމަތެއްގެ ގޮތުގައި ލެބް އިކުއިޕްމެންޓް ކެލިބްރޭޝަންގެ ޚިދުމަތް ތަޢާރަފްކޮށްފިއެވެ.
މިޚިދުމަތް ތަޢާރަފްކުރީ މިކަމަށްޓަކައި އެމްޑަބްލިޔުއެސްސީގައި ބޭއްވި ޚާއްސަ ރަސްމިއްޔާތުގައި، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، ޑޮކްޓަރ ޙުސައިން ރަޝީދު ޙަސަންއެވެ. މީގެއިތުރުން މިރަސްމިއްޔާތުގައި އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ ޙަސަން ޝާޙް އާއި، ބޯޑް ޑިރެކްޓަރުންގެ އިތުރުން އެމް.ޑަބްލިޔު.އެސް.ސީގެ މެނޭޖްމަންޓް އާއި މުވައްޒަފުން ވަނީ ބައިވެރިވެފައެވެ.
ލެބް އިކުއިޕްމަންޓް ކެލިބްރޭޝަންއަކީ ފެނުގެ ތަހުލީލުތައް ކުރުމަށް ބޭނުން ކުރާ އާލާތްތަކުގައި އެއްވެސް މައްސަލައެއްް ހުރިތޯ ދެނެގަތުމަށް ހަދާ ޓެސްޓުތަކެކެވެ. މިޓެސްޓުތަކުގެ ބޭނުމަކީ ފެން ޓެސްޓުކުރުމަށް ބޭނުންކުރާ އާލާއްތައް މެދުވެރިކޮށް ނަގާ ރިޕޯޓްތަކުގެ ސައްހަކަން ކަށަވަރު ކުރުމެއެވެ. އަދި ހަމަ އެގޮތުން ފެނުގެ ޓެސްޓުތައް ކުރުމުގައި ބޭނުންކުރާ ތަކެތި ހުންނަންވާނެކަމަށް ބައިނަލްއަގްވާމީ ގޮތުން ކަނޑައެޅިފައިވާ މިންގަނޑުތަކާއި އެއްގޮތަށް ހުރިތޯ ބެލުމަށް ހެދޭ ޓެސްޓުތަކެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، ޑޮކްޓަރ ޙުސައިން ރަޝީދު ޙަސަން ވިދާޅުވީ ރައްޔިތުންނަށް ފޯރުކޮށްދޭ ފެނަކީ ސިއްހީ ގޮތުން ރައްކާތެރި ފެންކަމަށް ކަށަވަރުވާން ޖެހޭކަމަށެވެ. އެގޮތުން ބޭނުން ކުރެވޭ ފެނަކީ ރައްކާތެރި ފެންތޯ ކަނޑައެޅިގެން ދާނީ ފެން ތަހުލީކުރުމަށް ހެދޭ ޓެސްޓުތައް ހެދުމުން ކަމަށްވެސް މިނިސްޓަރ ވަނީ ވިދާޅުވެފައެވެ.
"މިކަހަލަ ހިދުމަތެއް ދާއިމީކޮށް ލިބިގެން ދާއިރު އެ ހިދުމަތް ލިބޭ ރައްޔިތުން ކަށަވަރުކަމެއް އޮންނަންޖެހޭނެ ހަގީގަތުގައި މި ބޯ ފެނަކީ ސިއްހީ ގޮތުން ރައްކާތެރި ފެން ކަން" ޙުސައިން ރަޝީދު ޙަސަން އިތުރަށް ވިދާޅުވިއެވެ.
މިރަސްމިއްޔާތުގައި ވާހަކަފުޅު ދައްކަވަމުން އެމްޑަބްލިޔުއެސްސީގެ މެނޭޖިންގ ޑިރެކްޓަރ ޙަސަން ޝާޙް ވިދާޅުވީ އަލަށް ތައާރަފުކުރެވިގެންދިޔަ ލެބޯޓަރީ އިކުއިޕްމަންޓް ކެލިބަރޭޓިންގެ ޚިދުމަތަކީ ދިވެހިރާއްޖޭގެ އެކި ކަންކޮޅުތަކުގައި ޔުޓިލިޓީ ޚިދުމަތްތައް ދެމުންދާ ކުންފުނިތަކުން ފޯރުކޮށްދޭ ފެނާއި ނަރުދަމާ ޚިދުމަތްތަކުގެ ރައްކާތެރިކަން ކަށަވަރު ކުރުމަށް މުހިންމު ޚިދުމަތެއް ކަމުގައެވެ.
"މި ހިދުމަތަކީ ރާއްޖޭގެ އެކި ހިސާބުތަކުގައި ޔުޓިލިޓީ ޚިދުމަތްތައް ދެމުންދާ ފަރާތްތަކުން ފޯރުކޮށްދޭ ފެނާއި ނަރުދަމާ ޚިދުމަތްތަކުގެ ރައްކާތެރިކަން ކަށަވަރު ކުރުމަށް މުހިންމު ޚިދުމަތެއް" ޙަސަން ޝާޙް ވިދާޅުވިއެވެ.
މީގެއިތުރުން މި ޚިދުމަތުގެ ސަބަބުން ބައިނަލްއަޤްވާމީ ގޮތުން ލެބް އިކުއިޕްމެންޓްތަކުގައި ކޮންމެހެން ހުރުން ލާޒިމްކުރާ މިންގަނޑުތަކާއި އެއްގޮތަށް އިކުއިޕްމަންޓްތައް ދަމަހައްޓައި، މި އިކުއިޕްމަންޓްތައް މެދުވެރިކޮށް ހަދާ ޓެސްޓްތަކުން ލިބޭ ނަތީޖާއާއި މެދުގައި އޮންނަ ޔަގީންކަން އިތުރުވެގެންދާނެކަމަށްވެސް ޝާހު ވިދާޅުވިއެވެ.
ދިވެހިރާއްޖޭގައި އަލަށް ތަޢާރަފް ކުރެވުނު މިޚިދުމަތް، އެމް.ޑަބްލިޔު.އެސް.ސީ އިން ފޯރުކޮށްދިނުމަށް ހަމަޖެހިފައިވަނީ ތަމްރީނާއި ތަޖުރިބާ ލިބިފައިވާ ސައްތައިން ސައްތަ ދިވެހި މުއައްޒަފުން މެދުވެރިކޮށެވެ.
މިޚިދުމަތް ކަސްޓަމަރުންނަށް ފަސޭހަކަމާއެކު ފޯރުކޮށްދިނުމުގެ ގޮތުން، މިޙިދުމަތް ފޯރުކޮށްދޭ އިކުއިޕްމެންޓްތަކާއި އަދި ޕެރެ މީޓަރސްތަކުގެ ތެރެއިން ކަސްޓަމަރު ބޭނުންވާ ގޮތަށް ޕެކޭޖް ތައްޔާރުކުރެވޭނެއެވެ. އަދި އެމްޑަބްލިޔުއެސްސީއަށް އިކުއިޕްމެންޓް ގެނައުމުން ނުވަތަ ކަސްޓަމަރު އެދިލެއްވުމުން އިކުއިޕްމެންޓް ހުރި ތަނަށް އެމްޑަބްލިޔުއެސްސީގެ މުވައްޒަފުން ގޮސްގެންވެސް މި ޚިދުމަތް ލިބޭނެގޮތްވުމަކީ ކަސްޓަމަރުންނަށް ލިބޭ ބޮޑު ލުއިފަސޭހައެކެވެ.