ވިނަރެސް މަޝްރޫޢުގައި ހިމަނައިގެން ވިޔަފާރިތަކަށް ދޫކުރުމަށް ތަރައްޤީކުރި ކޮމާޝަލް ޔުނިޓްތައް ކުއްޔަށް ދިނުމަށް ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ހުޅުވާލައިފިއެވެ
އެޗްޑީސީން ކުދި ވިޔަފާރިތަކަށް ދޫކުރުމަށް ހުޅުވާލާފައިވަނީ ވިނަރެސް ފްލެޓްތަކުގެ ތިން ޓަވަރަކުންނެވެ. އެގޮތުން ވީ2، ވީ5 އަދި ވީ7ގެ ފުރަތަމަ ފަންގިފިލާއިން ޔުނިޓު ދޫކުރަން އިއުލާންކޮށްފައިވާއިރު، ވީ7ގެ އެންމެ ތިރިން ވެސް ޔުނިޓެއް ކުއްޔަށް ދޫކުރުމަށް ވަނީ ހުޅުވާލާފައެވެ.
ވީ2 ގެ ފުރަތަމަ ފަންގިފިލާއިން ދޫކުރަން ހަމަޖެހިފައިވަނީ 892.44 އަކަފޫޓުގެ ޔުނިޓެކެވެ. ވީ5 އިން ދޫކުރަން ހަމަޖެހިފައިވަނީ 596.54 އަކަފޫޓުއެވެ. ވީ7ގެ ފުރަތަމަ ފަންގިފިލާއިން ދޫކުރަން ހަމަޖެހިފައިވަނީ 755.95 އަކަފޫޓުގެ ޔުނިޓެކެވެ. މީގެ އިތުރުން ވީ7ގެ އެންމެ ތިރީބައިން ދޫކުރަން ހަމަޖެހިފައިވަނީ 295.36 އަކަފޫޓުގެ ޔުނިޓެކެވެ.
RFP- Lease of unit for SMEs for the Provision of Retail Stores from Vinares Commercial.
— HDC (@hdcmaldives) February 15, 2023
Link: https://t.co/IedN4XMSLN pic.twitter.com/kAE47FJQCo
މި ޔުނިޓުތައް އެޗްޑީސީން ކުއްޔަށް ދޫކުރަން ނިންމާފައި ވަނީ، ފުރަތަމަ އަހަރަށް ކޮންމެ މަހަކު އަކަފޫޓަކަށް 20ރ ގެ ރޭޓުންނެވެ. އެހެންނަމަވެސް ފުރަތަމަ އަހަރަށްފަހު ފަސް ވަނަ އަހަރާ ހަމައަށް ކުލީގެ އަގު ކަނޑައެޅުމުގެ ފުރުސަތު ކުއްޔަށް ނަގާ ފަރާތަށް ލިބިގެންވެއެވެ. އެގޮތުން އެންމެ ދަށް އަގަކީ ކޮންމެ މަހަކު އަކަފޫޓަކަށް 20ރ. އެވެ.
މި ޔުނިޓުތަކަށް އެދި ޕްރޮޕޯޒަލް ހުށަހެޅުމުގެ ފުރުސަތު ހުޅުވާލާފައި ވަނީ، އަންނަ މާޗް މަހުގެ ހަތް ވަނަ ދުވަހާއި ހަމައަށެވެ. މި ޔުނިޓުތަކަށް ބިޑް ސެކިއުރިޓީގެ ގޮތުގައި ހުށަހަޅަން ޖެހެނީ 5،000ރ. އެވެ. ނުވަތަ 5،000ރ. އަށްވާ އެމެރިކާ ޑޮލަރެވެ.
ވިނަރެސް ކޮމާޝަލް ޔުނިޓްތަކުން މިދިޔަ އޮގަސްޓު މަހުވެސް 4 ޔުނިޓް ދޫކުރަން ހުޅުވާލިއެވެ. އެއީ މަހުގެ ބާވަތްތައް ވިއްކުމަށް ޚާއްސަ 2 ފިހާރައާއި، ގޭގައި އާއްމުކޮށް ބޭނުންވާ ކާބޯތަކެތީގެ ބާވަތްތަކާއި އެހެނިހެން ތަކެތި ވިއްކުމަށް ދޫކުރާ ދެ ފިހާރައެވެ.
އެގޮތުން މަހުގެ އުފެއްދުންތައް ވިއްކުމަށް ސްލޮޓް ދޫކުރަނީ ވިނަރެސް 5 އާއި 7ވަނަ ޓަވަރުންނެވެ. އެއީ 723 އަކަފޫޓުގެ ޔުނިޓަކާ 656 އަކަފޫޓުގެ ޔުނިޓެކެވެ. ކާބޯތަކެތީގެ އާއްމު ބާވަތްތައް ވިއްކުމަށް ޔުނިޓް ދޫކުރަނީ ވިނަރެސް 4 އަދި 9ވަނަ ޓަވަރުންނެވެ. އެއީ 702 އަކަފޫޓުގެ ޔުނިޓްތަކެވެ.
ވިނަރެސް ހައުސިން މަޝްރޫޢުއަކީ ސަރުކާރުގެ ހައުސިން މަޝްރޫޢުތަކުގެ ތެރެއިން ދެން އެންމެ އަވަހަށް ދޫކުރާ މަޝްރޫއެވެ. ވިނަރެސް ފްލެޓްތައް ގަތުމަށް އެދި ފޯމް ހުށައެޅުމަށް ހުޅުވާލީ 2022 ވަނަ އަހަރުގެ ޖުލައި މަހުގެ ތެރޭގައެވެ. އެ ފްލެޓްތައް ގަތުމަށް ޝަރުތު ހަމަވާ މީހުންގެ ދާއިމީ ލިސްޓު މިމަހު އެޗްޑީސީންވަނީ އާންމުކޮށްފައެވެ.
ސަރުކާރުން ތަރައްޤީކުރާ ބޯހިޔާވަހިކަމުގެ ހުރިހާ މަޝްރޫޢުތައްވެސް މިހާރު ތަރައްޤީކުރަނީ، އެ އިމާރާތްތަކުން އާއްމު ގިނަ ޚިދުމަތްތައް ލިބޭ ގޮތަށެވެ. އެގޮތުން ޕާކިން ޒޯން، ފިހާރަތައް، ކްލިނިކް، ފާމަސީ އަދި ކެފޭ ފަދަ ތަންތަން ހިމެނޭގޮތަށެވެ.