ދިވެހި ރައްޔިތުންގެ ޕާޓީ (ޑީއާރުޕީ) އުވާލަން އިލެކްޝަންސް ކޮމިޝަނުން ނިންމި ނިންމުން ބާޠިލުކުރަން އެޕާޓީގެ ފަރާތުން ހައި ކޯޓަށް ހުށައެޅި މައްސަލަ ބަލައި ނުގަތުމަށް ނިންމައިފިއެވެ.
ޑިއާރުޕީ އުވާލަން ނިންމާ އެޕާޓީގެ ނަމުގައި އެއްވެސް ސިޔާސީ ހަރަަކާތެއް ނުހިންގަން އިލެކްޝަންސް ކޮމިޝަނުން އެންގީ މިދިޔަ އަހަރުގެ ޑިސެމްބަރުމަހުގެ 13 ވަނަދުވަހުއެވެ. އެޕާޓީ އުވާލީ ސިޔާސީ ޕާޓީތަކުގެ ގާނޫނުގައި ބުނާ ޢަދަދަށް މެމްބަރުން ހަމަނުވާތީ އެ ޢަދަދަށް މެމްބެރުން ހަމަކުރުމަށް 3 މަހުގެ މުހުލަތެއް ދިނުމުންވެސް އެކަން ނުވުމުންނެވެ. ޤާނުނުގައިވާ ގޮތުން ސިޔާސީ ޕާޓީއެއް ހިންގޭނީ އެ ޕާޓީއެއްގައި މަދުވެގެން 3،000 މެމްބަރުން ހަމަވާނަމައެވެ.
ޑީއާރުޕީގެ ފަރާތުން މިމައްސަލަ ހައި ކޯޓަށް ހުށަހެމުން މައްސަލަ ބަލައި ގަތުމާއިމެދު އެކޯޓުން ނިންމި ނިންމުމުގައި ވަނީ ޑީއާރުޕީން ހުށަހެޅި މައްސަލައަކީ އެކޯޓުގެ އިހުތިޞާސްގެ ތެރޭގައި ހިމެނޭ މައްސަލައެއް ނޫންކަމަށެވެ.
ޑީއާރުޕީގެ މިހާރުގެ ލީޑަރަކީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ. ޑީއާރުޕީއަކީ ރާއްޖޭގައި މަލްޓި ޕާޓީ ނިޒާމް ތަޢަރަފުވެ ދެވަނައަށް ރަޖިސްޓްރީ ކުރި ސީޔާސީ ޕާޓީއެވެ. 21 ޖުލައި 2005 ރަޖިސްޓްރީކުރި ޑީއާރުޕީގެ ފުރަތަމަ ރައީސަކީ ކުރީގެ ރައީސް މައުމޫން އަބްދުލް ޤައްޔޫމެވެ. އެހެންނަމަވެސް ރައީސް މައުމޫންގެ ވެރިކަން ބަދުވުމަށްފަހު ޑީއާރުޕީގެ ތެރޭގައި ޚިޔާލުތަފާތުވުން އުފެދި ބައިބައިވެ މެމްބަރުން އެހެން ޕާޓީތަކަށް ބަދަލުވިއެވެ. އަދި ޕީޕީއެމް އުފެދިގެން ދިޔައީ ޑީއާރުޕީގެ އޭރުގެ ލީޑަރޝިޕްގައި އުފެދުނު ޚިޔާލް ތަފާތުވުންތަކުގެ ތެރެއިންނެވެ.
އިލެކްޝަންސް ކޮމިޝަންގެ މިހާރުގެ ދަފްތަރަށް ބަލާއިރު ޑީއާރުޕީގެ މެމްބަރުންގެ ގޮތުގައި ތިބީ 2،483 މެމްބަރުންނެވެ.