ރައީސުލްޖުމްހޫރިއްޔާ ހައްޔަރުކުރުމަށް ކޯޓުއަމުރެއް ނެރެފައިވާކަން ދެއްކުމަށް ޞައްޙަ ނޫން ލިޔެކިއުމެއް ތައްޔާރުކުރި މައްސަލައެއް ފުލުހުން ތަޙްޤީޤުކުރައްވަން ފަށްޓަވައިފިއެވެ.މިއަދު އިސްކަންދަރު ކޮށީގައި ބޭއްވެވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޗީފް ސުޕަރިންޓެންޑެންޓް އޮފް ޕޮލިސް މުޙައްމަދު ރިޔާޒް ވިދާޅުވީ ޞައްޙަ ނޫން ކޯޓު އަމުރެއް ބޭނުންކޮށްގެން ފުލުހުންނާއި ސިފައިން ރައީސުލްޖުމްހޫރިއްޔާ ހައްޔަރުކުރަން އުޅޭކަން ދެއްކަން އުޅުނު މައްސަލައެއް ބައްލަވަމުން ގެންދަވާ ކަމަށެވެ. އަދި ރޭ ދަންވަރުގެ ވަގުތެއްގައި މާލޭން ބަޔަކު ރަށަކަށް ގޮސް އަތޮޅުތެރޭގެ ކޯޓެއްގެ މެޖިސްޓްރޭޓަކު މެދުވެރިކޮށް ރައީސް ހައްޔަރުކުރުމަށް ޞައްޙަ ނޫން ކޯޓް އަމުރެއް ހޯދައި، އެލިއުން ފުލުހުންނާ ޙަވާލުކުރުމަށް މަސައްކަތްކޮށް، ފުލުހުން ބަލަމުންދާ މައްސަލައަކާ ގުޅިގެން ރައީސް ޔާމީން ހައްޔަރުކުރެއްވުމަށް މަސައްކަތް ކުރައްވަމުންދާކަން ދައްކުވައިދިނުމަށް މަސައްކަތް ކޮށްފައިވާކަމަށް ފުލުހުން ވިދާޅުވިއެވެ. އަދި ރޭގެ ވަގުތެއްގައި ސިޔާސީ ޕާޓީއަކަށް ނިސްބަތްވާ އެކްޓިވިސްޓުންތަކެއް ރައީސް ދިރިއުޅުއްވާ ގެކޮޅު ކައިރިއަށް އެއްވުމަށް ރާވައި، އެކަމަށް ތައްޔާރުވަމުން ދިޔަކަމުގެ މައުލޫމާތު ލިބިވަޑައިގެންފައިވާ ކަމަށް ސުޕަރިންޓެންޑެންޓް އޮފް ޕޮލިސް މުޙައްމަދު ރިޔާޒް ވިދާޅުވިއެވެ.މީގެ އިތުރުން ކުރީގެ ރައީސް މުޙައްމަދު ނަޝީދު ސަލާމަތީ ބާރުތަކުގެ ވެރިޔަކަށް ފޯނުން ގުޅުއްވައި ރައީސް ހައްޔަރުކުރަން ކޯޓް އަމުރެއް ނެރެފައިވާކަމަށް ވިދާޅުވެ، އެކަމަށް ބާރުއަޅައި ވާހަކަފުޅު ދައްކަވާފައިވާ ކަމަށްވެސް ފުލުހުން ވިދާޅުވިއެވެ.ފުލުހުން ގެންދަވަނީ މިމައްސަލަ ވަރަށް ސީރިއަސް މައްސަލައެއް ގޮތުގައި ބައްލަވަމުންނެވެ. އަދި މިކަމުގައި ބައިވެރިވެފައިވާ ފަރާތްތައް ހޯއްދެވުމުގެ މަސައްކަތް މިހާރު ކުރައްވަމުންދާކަމަށް ފުލުހުން ހާމަކުރައްވައެވެ.މިމައްސަލައަކީ ފުލުހުން ތަޙްޤީޤު ކުރައްވަމުން ގެންދަވާ އަދި ތަޙުޤީޤު ފަށައިގަތުމުގެ މަރުޙަލާގައި އޮތް މައްސަލައަކަށްވާތީ މިމައްސަލާ ގުޅޭ އިތުރު މައުލޫމާތު ފުލުހުން އަދި ހާމައެއް ނުކުރައްވައެވެ.