ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯގެ ޙިއްސާގެ ފައިދާ ޙިއްސާދާރުންނަށް މިމަހުގެ 8ވަނަ ދުވަހުގެ ކުރިން ޖަމާކޮށްދޭނެކަމަށް އެ ކުންފުނިން ވިދާޅުވެއްޖެއެވެ. އެސްޓީއޯގެ މިއަހަރުގެ އަހަރީ ޢާންމު ޖަލްސާގައި ފާސްކޮށްފައިވަނީ ހިއްސާގެ ފައިދާގެ ގޮތުގައި ހިއްސާއަކަށް 65 ރުފިޔާ ބެހުމަށެވެ.
އެސްޓީއޯއިން ވިދާޅުވީ މިމަހުގެ 8 ގެ ނިޔަލަށް، ޙިއްސާގެ ފައިދާ ބޭންކަށް ޖަމާކުރުމަށް މިހާރު ރަޖިސްޓަރކުރައްވާފައިވާ ފަރާތްތަކުގެ ބޭންކު އެކައުންޓަށް، ހިއްސާގެ ފައިދާ ޖަމާކޮށްދޭނެކަމަށެވެ.
ހިއްސާދާރުގެ ބޭންކް އެކައުންޓް ކުންފުނީގައި ރަޖިސްޓަރީކޮށްފައި ނުވާ ހިއްސާދާރުން "ހިއްސާގެ ފައިދާ ބޭންކަށް ޖަމާކުރުމަށް އެދޭ ފޯމް" ފުރިހަމަކުރުމަށްފަހު، [email protected] އީމެއިލް އެޑްރެހަށް ފޮނުވުމަށް އެސްޓީއޯއިން ވަނީ އެދިފައެވެ. މި ފޯމް އެސްޓީއޯގެ ވެބްސައިޓުން ޑައުންލޯޑްކުރެވެން ހުންނާނެއެވެ. ފޯމް ހުށައަޅާތާ ހަފްތާއެއްގެ ތެރޭގައި މި ހިއްސާދާރުންނަށްވެސް ހިއްސާގެ ފައިދާ ޖަމާކޮށްދޭނެކަމަށް އެސްޓީއޯއިން ބުނެއެވެ.
މިދިޔަ އަހަރު އެސްޓީއޯއިން ބަހާފައިވަނީ ހިއްސާއަކަށް 60 ރުފިޔާއެވެ. އެހެންކަމުން މިއަހަރުގެ ޢަދަދަކީ މިދިޔަ އަހަރާ އަޅާބަލާއިރު 5 ރުފިޔާގެ އިތުރުވުމެކެވެ. 2020ވަނަ އަހަރު ބަހާފައިވަނީ 58 ރުފިޔާއެވެ.
މިދިޔަ އަހަރަކީ އެސްޓީއޯ ގްރޫޕްއަށް މާލީގޮތުން ކާމިޔާބު އަހަރެކެވެ. އެގޮތުން އެކުންފުންޏަށް މިދިޔަ އަހަރު 11.24 ބިލިއަން ރުފިޔާގެ ޢާމްދަނީއެއް ވަނީ ލިބިފައެވެ. މިއީ އޭގެ ކުރީ އަހަރާއި އަޅާ ބަލާއިރު %32ގެ ކުރިއެރުމެކެވެ.