ޔޫރަޕުގައި ބާއްވާ މައިސް ފަތުރުވެރިކަމާގުޅޭ އެންމެބޮޑު އެއް ފެއާރ، އައިމެކްސް ފްރެންކްފާޓްގައި ރާއްޖޭގެ ފަތުރުވެރިކަމައި މައިސް ފަތުރުވެރިންނަށް ހުރި ފުރުސަތުތައް އެމްއެމްޕީއާރުސީން، ޕްރޮމޯޓް ކުރަން ފަށައިފިއެވެ.
މި ފެއާރ ކުރިއަށް ދާނީ މެއި މަހުގެ 31އިން ޖޫން މަހުގެ 2ވަނަ ދުވަހާ ހަމައަށެވެ.
އައިމެކްސް އަކީ މައިސް (މީޓިންގްސް، އިންސެންޓިވްސް، ކޮންފަރެންސް އަދި އެގްޒިބިޝަން) ހަރަކާތްތައް ތަފާތު ގޮތްގޮތަށް ބޭއްވުމަށް ބޭނުންވާ ޔޫރަޕްގެ ވިޔަފާރީގެ ދަތުރުވެރިންނަށް ޚާއްސަކޮށް, ޖަރުމަނުވިލާތުގައި ބާއްވާ މައިސްގެ އެންމެ ބޮޑު އެއް އިވެންޓެވެ. މި އަހަރުގެ އައިމެކްސް އިވެންޓުގައި މި ދާއިރާގެ 4،900 ޕްރޮފެޝަނަލުން ބައިވެރިވުމަށް ވަނީ ހަމަޖެހިފައެވެ. އަދި މިފަދަ ޚިދުމަތްތައް ލިބިގަންނަން ބޭނުންވާ 3،900 ފަރާތެއް މިއަހަރު އައިމެކްސް ފެއާރއަށް ޒިޔާރަތްކުރާނެކަމަށް ލަފާކުރެއެވެ.
އެމްއެމްޕީއާރުސީން އައިމެކްސްގައި ބައިވެރިވެފައިވަނީ ރާއްޖޭގެ 9 އިންޑަސްޓްރީ ޕާޓްނަރުންނާއެކު ރާއްޖެއިން ލިބޭ މައިސްގެ ތަފާތު ހިދުމަތްތަކާއި، ވެނިއުތައް ޖަރުމަނުވިލާތާއި ޔޫރަޕްގެ ބިސްނަސް ދަތުރުވެރިންނަށް އަންގައިދިނުމުގެ މަޤްސަދުގައެވެ.
އެމްއެމްޕީއާރުސީއިން މި ޙަރަކާތުގައި ބައިވެރިވެފައިވަނީ ރާއްޖޭގެ ފަތުރުވެރިކަމުގެ އެކި ސެގްމަންޓުތައް އިސްތިހާރުކުރުމަށް ގެންގުޅޭ މާކެޓިން ސްޓްރެޓަޖީގެ ދަށުން ރާއްޖެއަކީ މި މާކެޓުގެ ފަތުރުވެރިން ދަތުރުކުރުމަށް އެންމެ ރައްކާތެރި މަންޒިލްގެ ގޮތުގައި އިސްތިހާރުކުރުމަށެވެ. އަދި ޖަރުމަނުވިލާތުގައި ރާއްޖެ އިސްތިހާރުކޮށް ޖަރުމަނުވިލާތުން ރާއްޖެއަށް އަންނަ ފަތުރުވެރިންގެ ޢަދަދު އިތުރުކުރުމަށެވެ.
ޖަރުމަނުވިލާތުގައި ރާއްޖެ އިސްތިހާރުކުރުމަށް އެމްއެމްޕީއާރުސީއިން ދަނީ ގިނަ މާކެޓިން ކެމްޕެއިންތައް ހިންގައި ފެއާރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، ފެމިލިއަރައިޒޭޝަން ދަތުރުތަކާއި ވެބިނާތައް ބާއްވާ އިތުރު އެހެނިހެން ހަރަކާތްތަކެއް ހިންގަމުންނެވެ.
ޖަރުމަނުވިލާތަކީ މިދަނޑިވަޅުގައި ރާއްޖެއަށް 4ވަނައަށް އެންމެ ގިނައިން ފަތުރުވެރިން އަންނަ މާކެޓެވެ. އޭޕްރިލް މަހުގެ 18ވަނަ ދުވަހުގެ ނިޔަލަށް ޖަރުމަނުވިލާތުން ރާއްޖެއަށް ވަނީ 56،058 ފަތުރުވެރިން އައިސްފައެވެ.