އެޗްޑީސީން މިހާތަނަށް ނަގާފައިވާ އެންމެ ބޮޑު ދަރަންޏަކީ ހިޔާ މަޝްރޫޢަށް ނަގާފައިވާ ލޯނުކަމަށާއި، ރަނގަޅަށް މެނޭޖުނުކުރެވިއްޖެނަމަ ކުންފުންޏަށް މާލީ ބޮޑެތި މައްސަލަތަކެއް ކުރިމަތިވެދާނެ ކަމަށް އޮޑިޓަރ ޖެނެރަލް ޙުސައިން ނިޔާޒީ ވިދާޅުވެއްޖެއެވެ.
އޮޑިޓަރ ޖެނެރަލް މިހެން ވިދާޅުވީ، ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ މަޝްރޫޢުގެ ދަށުން ޔުނިޓަކަށް ޖެހޭ ޢަދަދު ހިސާބުކޮށް ކަނޑައަޅާފައިވާ ގޮތުގެ ރިޕޯޓާއި، ގުޅޭގޮތުން އޮޑިޓް އޮފީހުގެ ބޭފުޅުންނާއެކު މާލިއްޔަތު ކޮމޓީން ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
ހިޔާ ފްލެޓްތަކުގެ ކުލި ތިންފަހަރެއްގެ މަތިން ފަސްކޮށްދިނުމަށްފަހު އެޗްޑީސީން ވަނީ މިމަހުންފެށިގެން ކުލި ނަގަން ފަށާފައެވެ. ހިޔާ ފްލެޓްތަކުގެ ކުލީގެ މައްސަލާގައި މަޖިލީހުގެ މާލިއްޔަތު ކޮމިޓީގައި ވާހަކަފުޅު ދައްކަވަމުން އޮޑިޓަރ ޖެނެރަލް ޙުސައިން ނިޔާޒީ ވިދާޅުވީ، ހިޔާ މަޝްރޫޢަކީ ވަރަށް ރަނގަޅަށް މެނޭޖުކުރަންޖެހޭ މަޝްރޫޢެއްކަމަށެވެ. އެމަޝްރޫޢުގެ ލޯނު މިހާރުވެސް 30 އިންސައްތަ ޑީފޯލްޓްވެފައިވާކަން ފާހަގަކުރައްވާ އޮޑިޓަރ ޖެނެރަލް ވިދާޅުވީ، އެޗްޑީސީން ޚާއްޞަ ސަމާލުކަމެއް ދީގެން ސްކީމްތަކުގެ ފައިސާ ހޯދުމަށް މަސައްކަތް ކުރަންޖެހޭކަމަށެވެ.
ހިޔާ މަޝްރޫޢުގެ މަސައްކަތް ކުރިއަށްގެންދިއުމަށް އެދި 5 ކުންފުންޏަކުން ޕްރޮޕޯސަލް ހުށަހަޅާފައިވެއެވެ. ނަމަވެސް މަސައްކަތް ޙަވާލުކުރީ އެންމެބޮޑު އަގު ހުށައެޅި ކުންފުންޏާއެވެ. ފްލެޓް ހެދުމުގެ ކޮންޓްރެކްޓް ހަވާލުކޮށްފައިވަނީ ޔުނިޓެއް 62000 ޑޮލަރަށް ހަދައިދޭ ކުންފުންޏަށެވެ. މިއަގުތަކާއެކު ހިޔާ ފްލެޓްގެ އަކަފޫޓަކަށް 1637ރުފިޔާ ޖެހެއެވެ.
ހިޔާ ފްލެޓްގެ އެޕާޓްމަންޓެއްގެ ކުލި 5400އަށް ކުޑަކުރެވޭނެކަމަށް ކުރީ ސަރުކާރުން ބުނި ނަމަވެސް ފްލެޓުތަކުގެ ކުލީގެ ގޮތުގައި ކުރީ ސަރުކާރުގެ ހައުސިން މިނިސްޓްރީން ކަނޑައެޅި 6،600ރުފިޔާ އަކީ ގޯސް ހިސާބެއް ކަމަށް އޮޑިޓުން ވަނީ ދައްކާފައެވެ. އޮޑިޓަރ ޖެނެރަލް ވިދާޅުވީ، ހިޔާ ފްލެޓްތަކުގެ މަހު ކުލި 6،600 ރުފިޔާއަށް ކުޑަކުރިނަމަވެސް ލޯނު ދައްކަން އިތުރު 9.2 ބިލިއަން ރުފިޔާ ބޭނުންވާނެކަމަށެވެ.
ހިޔާ ފްލެޓުތަކުން ކުލީގެ ގޮތުގައި މިހާރު ނަގަނީ 8،500 ރުފިޔާއެވެ. އެއީ ކުއްޔަށްވާ 7500 ރުފިޔާއާއި ފްލެޓްގެ މެއިންޓަނަންސްއަށް ނަގާ 1،000 ރުފިޔާއެވެ. ނަމަވެސް އެޗްޑީސީން އެންމެ ފުރަތަމަ ހިޔާ ފްލެޓްތަކުން ދައްކަންޖެހޭނެކަމަށް ކަނޑައެޅީ 11،000 ރުފިޔާއެވެ. އޮޑިޓަރ ޖެނެރަލް ވިދާޅުވީ، އެއީ ވިޔަފާރީގެ އުސޫލުން ސަސްޓެއިނަބަލް ގޮތެއްގައި އެކުންފުންޏަށް ހަމަޖެއްސޭނެ އަގެއް ކަމަށެވެ.
އޮޑިޓަރ ޖެނެރަލް ވިދާޅުވި ފްލެޓްގެ އަގު 8500އަށް ކުޑަކޮށްފައި ވުމުގެ ސަބަބުން 138 މިލިއަނުގެ ކޭޝް ފްލޯ ޑެފިސިޓެއް މުޅި މަޝްރޫޢުގެ މުއްދަތުގައި ކުރިމަތިވާނެކަމަށެވެ. އަދި ކުލީގެ ޢަދަދު 6،600 ރުފިޔާއަށްކުޑަކޮށްފި ނަމަ، 9.2 ބިލިއަން ރުފިޔާގެ ޑެފިސިޓެއް ކުރިމަތިވާނެކަމަށް އޮޑިޓަރ ޖެނެރަލް ވިދާޅުވިއެވެ.
ނިޔާޒީ ވިދާޅުވީ ހިޔާ ފްލެޓުތަކުން ކުލީގެ ގޮތުގައި މިހާރު ނަގާ އަގު ނަގަމުންދިޔަނަމަވެސް ލޯނު ދެއްކުމަށް އިތުރަށް 3.2 ބިލިއަން ރުފިޔާ ދައުލަތުން ދައްކަންޖެހޭނެކަމަށެވެ.
ކުރީ ސަރުކާރުން ވަނީ ހިޔާ ފްލެޓުތަކުން ކުލި 5600 ރުފިޔާއަށް ކުޑަކުރެވޭނެކަމަށް ބުނެފައެވެ. ނަމަވެސް ކޮމިޓީގައި އޮޑިޓަރ ޖެނެރަލް ވިދާޅުވީ އެއީ ކުރީ ސަރުކާރުން ނުބައިކޮށް ޖަހާފައިވާ ހިސާބެއްކަމަށެވެ.
ހިޔާ މަޝްރޫޢުގެ 7000 ހައުސިންގ ޔުނިޓް ޢިމާރާތްކުރުމުގެ މަސައްކަތް ހަވާލުކުރީ ޗައިނާގެ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަނާއެވެ. މި މަޝްރޫޢުގެ ނިންމުންތައް ނިންމާފައިވާގޮތަށް ބަލާއިރު މިއީ އިޖުތިމާޢީ ބޯހިޔާވަހިކަމުގެ މަޝްރޫޢަކަށް އެކަށީގެންވާ ގޮތުގައި ކުރިއަށް ގެންގޮސްފައިވާ މަސައްކަތެއް ނޫންކަމަށް ސަރުކާރުން ވަނީ ވިދާޅުވެފައެވެ. އަދި މަޝްރޫޢު ހިންގުމަށް ނަގާފައިވާ ލޯނަކީވެސް ވިޔަފާރި ނުވަތަ ކޮމާޝަލް ރޭޓުގައި ނަގާފައިވާ ލޯނެއް ކަމަށްވެސް ސަރުކާރުން ވަނީ ވިދާޅުވެފައެވެ.
ހިޔާ މަޝްރޫޢުގައި ހައުސިންގ ޔުނިޓަކަށް ޖެހޭ ޖުމްލަ އަގާއި މަހުންމަހަށް ދައްކަންޖެހޭ ޢަދަދު ހިސާބުކޮށް ކަނޑައަޅާފައިވާގޮތް ރިވިއު ކުރުމަށް އެޗް.ޑީ.ސީން އެދުމުން، އެއަގު ހިސާބުކޮށްފައިވާ ގޮތް ބެލުމަށްފަހު، އޮޑިޓަރ ޖެނެރަލްގެ އޮފީހުންވަނީ ރިޕޯޓެއްވެސް އާންމުކޮށްފައެވެ. އެ ރިޕޯޓުގައި ވާގޮތުން އޭރު ކަނޑައެޅިގޮތަށް މަހަކު 5،600 ރުފިޔާއަށް ހައުސިންގ ޔުނިޓެއް ވިއްކިނަމަ، އެޗްޑީސީއަށާއި ސަރުކާރަށް ލިބޭ މާލީ ގެއްލުން ބޮޑުވާނެއެވެ.
ކޮމިޓީގައި ވާހަކަފުޅު ދައްކަވަމުން އޮޑިޓަރ ޖެނެރަލް ވިދާޅުވީ، އެޗްޑީސީން މިހާތަނަށް ލޯނުގެ ގޮތުގައި 700 މިލިއަން ޑޮލަރު ނުވަތަ10.7 ބިލިއަން ރުފިޔާ ނަގާފައިވާކަމަށާއި، އޭގެ ތެރެއިން ހަ ބިލިއަން ރުފިޔާއަކީ ހިޔާ މަޝްރޫއަށް ނަގާފައިވާ ލޯނު ކަމަށެވެ.