ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމަނިކުފާނުގެ އަނބިކަނބަލުން ފަޒްނާ އަޙްމަދު ފުވައްމުލައް ސިޓީއަށް ކުރައްވާ ދަތުރުފުޅުގެ ތެރެެއިން، އެ ސިޓީގެ ނޭޗަރ ޕާކަށް ޒިޔާރަތްކުރައްވާ އެތަން ބައްލަވާލައްވައިފިއެވެ.
ރައީސްގެ ދެކަނބަލުން ނޭޗަރަ ޕާކަށް ޒިޔާރަތްކުރެއްވުމުން، ސިޓީ ކައުންސިލްގެ ފަރާތުންވަނީ ނޭޗަރޕާކާއި ބެހޭ މަޢުލޫމާތު ހިއްސާކުރައްވާފައެވެ.
ފުވައްމުލަކު ނޭޗަރ ޕާކު ހުޅުވާފައިވަނީ 14 ސެޕްޓެމްބަރ 2018އެވެ. މިއީ ރާއްޖޭގައި އެންމެ ފުރަތަމަ ޤާއިމްކުރެވުނު ނޭޗަރ ޕާކްތަކުގެތެރެއިން ޕާކެކެވެ. ފުވައްމުލަކު ނޭޗަރ ޕާކުގެ ޒިންމާއަކީ: ފުވައްމުލަކުގައި ހިމާޔަތްކޮށްފައިވާ ދެ ކުޅި ރައްކާތެރިކޮށް ބަލަހައްޓައި ދެމެހެއްޓެނިވި ގޮތެއްގައި މަންފާ ހޯދުމަށް ރައްޔިތުންނަށް މަގުފަހިކޮށްދީ، މުސްތަޤުބަލުގެ ޖީލުތަކަށް މި ތަންތަން ފޯރުކޮށްދިނުމެވެ.
ފުވައްމުލަކު ނޭޗަރ ޕާކުން ބަލަހައްޓާ ސަރަހައްދުތަކަކީ ބަންޑާރަ ކިޅިއާ ދަނޑިމަގި ކިޅިއާ ކިޅީގެ ވަށައިގެންވާ ޗަސްބިން ސަރަހައްދެވެ. ފުވައްމުލަކު ނޭޗަރ ޕާކުގައި ހިމެނޭ ޚާއްސަ ދިރުންތަކެއް ހިމެނޭ ސަރަހައްދެކެވެ. މިގޮތުން: ކުޅީ ކުކުޅު ނުވަތަ ފުވައްމުލަކު ބަހުރުވައިން ވަލިކުކުޅު އަދި ކޯވެން، ގަސްގަހާގެހީގެ ތެރެއިން މާވަށޮ، ލޮންސި ހިމެނެއެވެ.
ފުވައްމުލަކު ޗަސްބިން ސަރަހައްދުގެ ޚާއްސަކަމުގެ ތެރޭގައި ރަށުގެ ފެންފަށަލައިގެ ފެން ދައުރުކުރުމަށް މުހިއްމު ރޯލެއް އަދާކުރެއެވެ. ފުވައްމުލަކު ދެކުޅިއަކީ ސާފު ފެނުގެ ރިޒާވެކެވެ. ވައިސާފުކޮށްދޭން އެހީތެރިވެދެއެވެ. މީގެ އިތުރުން މިތަނަކީ ބޭސްވެރިކަމާ، ދިރިއުޅުމާ، ތާރީޚާއި ސަޤާފަތާ ގުޅިލާމެހިފައިވާ ތަނެއްވެސްމެއެވެ.
ފުވައްމުލަކު ދެ ކުޅީގައި އުޅޭ ދިރުންތަކުގެތެރޭގައި ބޭނގު، ކޯވެން، ފެންމީރުމަސް، ރާބޮނދި، މާކަނާ އިރުވާހުދު، ކަނބިލި، މައިނާ، ލަގަނާ، ކާޅު ހިމެނެއެވެ. ބޭސްވެރިކަމަށް ބޭނުންކުރާ ގިނަ ޢަދަދެއްގެ ގަސްގަހާ ގެހިވެސް މި ސަރަހައްދުގައި ހިމެނެއެވެ.
ފުވައްމުލަކު ނޭޗަރ ޕާކުން ދެމުން އަންނަ ޚިދުމަތްތަކުގެ ތެރޭގައި ބައިސްކަލު ދުއްވުމާއި، ކެނޯއާ ޕެޑަލް ބޯޑު ދުއްވުން ފަދަ ކަންކަން ހިމެނެއެވެ. ނޭޗަރ ޕާކު ތަރައްޤީ ކުރުމަށް މުސްތަޤުބަލުގައި ވިސްނާ ކަންކަމުގެ ތެރޭގައި ޗަސްބިން ތެރޭގައި ވޯކްވޭއެއް ހެދުމާ، ކޮންވެންޝަން ސެންޓަރެއް އަދި ވިޒިޓަރ ސެންޓަރެއް ގާއިމުކުރުން ހިމެނޭކަމަށް ސިޓީ ކައުންސިލުން ރައީސްއާއި ހިއްސާކުރެއްވި މަޢުލޫމާތުގެ ތެރޭގައި ހިމެނެއެވެ.
ނޭޗަރ ޕާކަށް ކުރެއްވި މި ޒިޔާރަތުގައި ފުވައްމުލަކު ސިޓީ ކައުންސިލްގެ ފަރާތުން ވަނީ ފުވައްމުލަކުގެ ގުދުރަތީ ކަންކަމާއި ގުޅޭ މަޢުލޫމާތު ހިމެނޭ ފޮތެއް ހަދިޔާކުރައްވާފައެވެ. އަދި ނޭޗަރ ޕާކު ފެންނަ ތަސްވީރެއްވެސް ރައީސްއަށް ހަދިޔާކުރެއްވިއެވެ.
މި ސަރުކާރު އައިފަހުން 2020 ވަނަ އަހަރުގެ ތެރޭގައި ފުވައްމުލަކަކީ ޔުނެސްކޯ ބަޔޮސްފިއަރ ރިޒާވެއްކަމަށް ކަނޑައަޅާފައެވެ. ފުވައްމުލަކަށް ޔުނެސްކޯ ބަޔޮސްފިއަރ ރިޒާވްގެ ލަގަބު ލިބުނީ 28 އޮކްޓޫބަރު 2020ގައެވެ.