ދިރާގުގެ އަހަރީ އާންމު ޖަލްސާ މިމަހު ބޭއްވުމަށް ނިންމައިފިއެވެ.
ދިރާގުން ބުނީ މި އަހަރުގެ އަހަރީ އާންމު ޖަލްސާ އޮންނާނީ 24 މާރިޗު 2022 ވާ ބުރާސްފަތި ދުވަހުގެ ރޭގަނޑު 8:15 ގައި ކަމަށެވެ. މި ޖަލްސާ ބޭއްވުމަށް ހަމަޖެހިފައިވަނީ "ހައިބްރިޑް" ކޮށްކަމަށްވާތީ، ޖަލްސާގައި ޙިއްޞާދާރުންނަށް "ފަހިވޯޓް" މެދުވެރިކޮށް އޮންލައިންކޮށް ނުވަތަ ޖަލްސާ ބޭއްވުމަށް ހަމަޖެހިފައިވާ ކްރޮސްރޯޑް މޯލްޑިވްސްގެ ޖަލްސާކުރާ މާލަމަށް ހާޒިރުވެވަޑައިގެން ބައިވެރިވެވޭނެއެވެ.
ދިރާގުގެ މިއަހަރުގެ އަހަރީ އާންމު ޖަލްސާގައި ބައިވެރިވެވޭނީ މިމަހުގެ 12ގެ ކުރިން ރަޖިސްޓްރީކުރާ ފަރާތްތަކަށެވެ. ކޯވިޑް-19 ގެ ހާލަތާއި ގުޅިގެން އަދި ގައިދުރުކަން ދެމެހެއްޓުމަށްޓަކައި، ޖަލްސާކުރާ މާލަމަށް ހާޒިރުވެ ޖަލްސާގައި ބައިވެރިވެވޭ ހިއްސާދާރުންގެ އަދަދު ވަނީ ލިމިޓްކޮށްފައެވެ.
ޖަލްސާގައި ބައިވެރިވެވޭނީ ވެކްސިން ކާޑް ހުށަހަޅާ ހިއްސާދާރުންނަށެވެ. ދިރާގުން ބުނީ ޖަލްސާކުރާ މާލަމަށް ވަޑައިގެން ޖަލްސާގައި ބައިވެރިވެ ވަޑައިގަތުމަށް ޝައުޤުވެރިކަން ފާޅުކުރާ ޙިއްޞާދާރުންގެ ތެރެއިން، މިފުރުސަތު ދެވޭ ހިއްސާދާރުންނަށް މިމަހުގެ 22 ގެ ކުރިން އެކަން އަންގާނެކަމަށް ދިރާގުން ބުނެއެވެ.