ވަޅިން ހަމަލާދީ އިންޑިއާ އަންހެނަކު ޒަޚަމްކޮށްލި މައްސަލާގައި އޭނާގެ ފިރިމީހާގެ މައްޗަށް ދައުވާ އުފުލައިފިއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ، މިއަހަރުގެ ފެބްރުއަރީ 2 ވަނަ ދުވަހު އިންޑިއާ ރައްޔިތެއްކަމަށްވާ ޢުމުރުން 37 އަހަރުގެ ސްރިނިވަސަން ސުބްރަމަނި، މާލޭ ގެއެއްގެ ތެރޭގައި، އޭނާގެ އަނބިމީހާއަށް ވަޅިން ހަމަލާދިން މައްސަލައިގައި، ދައުވާ އުފުލާފައިވާކަމަށެވެ.
އޭނާގެ މައްޗަށް ދައުވާ އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށާއި، މި މައްސަލަ ކްރިމިނަލް ކޯޓަށް ހުށައަޅާފައިވަނީ މިމަހުގެ 10 ވަނަ ދުވަހުއެވެ.
ޕީޖީ އޮފީހުން ބުނީ އޭނާ ހުރީ ކްރިމިނަލް ކޯޓުގެ އަމުރެއްގެ ދަށުން ބަންދުގައިކަމަށެވެ. އަދި މިދިޔަ ބުރާސްފަތި ދުވަހު ބޭއްވި ބަންދު އަޑުއެހުމުގައި އޭނާ ޝަރީޢަތް ނިމެންދެން ބަންދުކޮށްދޭން ދައުލަތުން އެދުނުކަމަށާއި ނަމަވެސް ކޯޓުން ބަންދަށް ދެއްވީ 10 ދުވަސްކަމަށް ޕީޖީ އޮފީހުން ބުންޏެވެ. އަދި އޭގެ ފަހުން އޭނާ ޝަރީޢަތް ނިމެންދެން ބަންދުކުރުމާމެދު މައްސަލަ ގޮތެއް ނިންމަވާނެކަމަށް މައްސަލަ ބައްލަވާ ޤާޟީ ވިދާޅުވެފައިވާކަމަށްވެސް ޕީޖީ އޮފީހުން ބުންޏެވެ.
މިދިޔަ މަހުގެ 2 ވަނަ ދުވަހު ވަޅިން ހަމަލާދީ ޒަޚާމްކޮށްލުމާއި ގުޅިގެން އެ އަންހެން މީހާއަށް ވަނީ އައިޖީއެމްއެޗްގައި ފަރުވާ ދީފައެވެ. މި ޙާދިސާގައި އަނިޔާ ލިބުނީ އުމުރުން 26 އަހަރުގެ އިންޑިއާ އަންހެނަކަށެވެ.
ފުލުހުންގެ އެހީއާއެކު އަންހެން މީހާ ގެއިން ނެރެ، ހޮސްޕިޓަލަށް ގެންދާ ވީޑިއޯއެއްވެސް ސޯޝަލް މީޑިއާގައި ދައުރުވެފައިވެއެވެ. މި ވީޑިއޯއިން ފެންނަ މަންޒަރުގައިވެސް އަންހެން މީހާ ލައިގެން ހުރި ހެދުން ލެއިން ފޯވެފައިވާ މަންޒަރު ފެނެއެވެ. އަދި އޭނާއަށް ރަނގަޅަށް ނުވެސް ހިނގެއެވެ.