ރައްޔިތުންގެ މަޖިލީހުގެ ޖަލްސާތައް ފެށުމުން، އެމް.އެމް.ޕީ.އާރު.ސީގެ
ފައިސާއަށް ވީނުވީގޮތެއް ބައްލަވާދެއްވުމަށް އެދި ކުއްލި
މައްސަލައެއް މަޖިލީހަށް ހުށަހަޅުއްވާނެކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު ޢަބްދުﷲ ޔާމީން ވިދާޅުވެއްޖެއެވެ.
ޔާމީން މިއަދު ނެރުއްވާފައިވާ
ބަޔާނެއްގައި ވިދާޅުވީ އެމް.އެމް.ޕީ.އާރު.ސީން ހިންގާފައިވާ ކަމަށް ތުހުމަތުކުރެވޭ ކޮރަޕްޝަންތަކާއި
ގުޅިގެން ކުއްލި މައްސަލައެއް މަޖިލީހަށް ވެއްދުމަށް ނިންމެވީ، އެ ކޯޕަރޭޝަނުން
ރައްޔިތުންގެ ގިނަ ޢަދަދެއްގެ ފައިސާ ގެއްލިގެން ގޮސްފައިވާއިރު، އެފައިސާ އަނބުރާ
ހޯދުމަށްޓަކައި ކުރަންޖެހޭ މަސައްކަތް ހަރުދަނާކުރުމުގެ ގޮތުންކަމަށެވެ. މިގޮތުން
ރައްޔިތުންގެ މަޖިލީހުގެ މަސައްކަތް ފެށުމާއިއެކު އެމް.އެމް.ޕީ.އާރު.ސީން ވީނުވީއެއް
ނޭނގި ގެއްލިފައިވާކަމަށް ބުނާ ސަތޭކަ މިލިއަން އެމެރިކާ ޑޮލަރުގެ މައްސަލަ
މާލިއްޔަތު ކޮމިޓީއަށްވެސް ހުށައަޅުއްވާނެކަމަށް ޔާމީންގެ ބަޔާނުގައި ވިދާޅުވެފައިވެއެވެ.
ޔާމީން ވިދާޅުވީ
އެމް.އެމް.ޕީ.އާރު.ސީގެ މައްސަލަ ހުށައަޅުއްވަނީ މުސްތަޤުބަލުގައި މިފަދަ އިތުރު ކަންކަން
ކުރިމަތިނުވާނޭފަދަ ގޮތަކަށް ދައުލަތުގެ މުދަލާއި ފައިސާ
ރައްކާތެރިކުރުމަށްޓަކައި ޤާނޫނުތަކަށް ގެންނަންޖެހޭ ބަދަލުތަކާއި، އަޅުއްވަންޖެހޭ
ފިޔަވަޅުތައް އެޅުއްވުމަށްކަމަށެވެ.
ރައްޔިތުންގެ
މަޖިލީހުގެ ޖަލްސާތައް ފެށޭނީ އަންނަ ފެބުރުއަރީ މަހުގެ ކުރީކޮޅުއެވެ.