ހައްދުންމަތީގެ ގުޅިފައިވާ ރަށްތަކުގެ 16 ކިލޯމީޓަރުގެ ދިގު މަގު ތާރު އަޅައިގެން ޒަމާނީ ފެންވަރަށް ތަރައްޤީވެގެންދާއިރު، ރައްޔިތުންގެ މެދުގައި އޮތް އެންމެބޮޑު ކަންބޮޑުވުމަކީ އެކްސިޑެންޓްތައް އިތުރުވުމެވެ. ބާރު ސްޕީޑްގައި ދުއްވުން މަދުކޮށް، ގަވާއިދާ އެއްގޮތަށް ދުއްވުމަކީ އެކްސިޑެންޓްތައް އެންމެ މަދުވާނެ ގޮތްކަމަށް އެ ސަރަހައްދުގެ ރައްޔިތުން ޤަބޫލުކުރެއެވެ.ރާއްޖޭގައި މިހާތަނަށް އެންމެ ގިނަ ނުރައްކާތެރި އެކްސިޑެންޓްތައް ހިނގާފައިވަނީ އައްޑޫ ސިޓީގެ ގުޅިފައިވާ ރަށްތައް ގުޅުވައިދޭ ލިންކް ރޯޑްގައެވެ. ވޭތުވެދިޔަ އަހަރު އެކަނިވެސް، އައްޑޫ ލިންކް ރޯޑްގައި ނުރައްކާތެރި 13 އެކްސިޑެންޓް ހިނގާފައިވާ ކަމަށް ފުލުހުން ވިދާޅުވެއެވެ. މި އެކްސިޑެންޓްތަކުގައި 8 މީހެއްގެ ފުރާނަ ގެއްލިފައިވެއެވެ. އައްޑޫ ފަދައިން ޒަމާނީ ފެންވަރަށް ތާރު އަޅައިގެން ލިންކް ރޯޑެއް މިހާރު ހަދަމުންދަނީ ލ.އަތޮޅުގެ ގުޅިފައިވާ ރަށްތަކުގައެވެ. އެއީ ގަމާއި، މާންދޫ، ކައްދޫ އަދި ފޮނަދޫގައެވެ. 16 ކިލޯ މީޓަރު ދިގު މި މަގުގެ މަސައްކަތް މިހާރު ގޮސްފައިވާ ހިސާބަށް ބަލާއިރު، މަސައްކަތުގެ ބޮޑު ބައެއް މިހާރު ވަނީ ނިމިފައެވެ. ތާރުގެ އެޅުމުގެ މަސައްކަތްތައް ފޮނަދޫގެ މަގުތަކުގައި ނިމިފައިވާއިރު، ކައްދޫ އާއި މާންދޫގައި މަގުގެ ބޮޑުބައެއްގައި ވަނީ ތާރު އަޅައި ނިމިފައެވެ.ޒަމާނީ ފެންވަރަށް ތާރު އަޅައިގެން މަގު ހެދުމަކީ ސަރަހައްދުގެ ތަރައްޤީއަށް އަންނަ ބޮޑު ކުރިއެރުމެއްގެ ގޮތުގައި އެ ސަރަހައްދުގެ ރައްޔިތުން ގަބޫލުކުރެއެވެ. މިއާއެކު، ހައްދުންމަތީ ރައްޔިތުން މިހާރު އެންމެ ކަންބޮޑުވަނީ އައްޑޫ ސިޓީ ގޮތަށް ލ.އަތޮޅުގައިވެސް ނުރައްކާތެރި އެކްސިޑެންޓްތައް އިތުރުވެ، އެތައް ދަރިންތަކެއްގެ ފުރާނެ ގެއްލިދާނެތީއެވެ.މަގު ޕްލޭން ކުރެވިފައިވަނީ އެކްސިޑެންޓްތައް ހިގުން ވީހާވެސް މަދު ކުރެވޭނެ ގޮތްތައް ބަލައިގެން ކަމަށް ހައުސިން މިނިސްޓްރީން ވިދާޅުވެއެވެ. އެގޮތުން މަގުގެ ދެފަރާތް ވަކިވާނެހެން ފާރު ރާނައިފައިވާ ކަމަށާއި، މަގުގެ މަސައްކަތް ނިމިގެން ދާއިރު، މަގުގެ އެކި ސަރަހައްދުތަކުގައި ފުލުހުންގެ ޗެކް ޕޮއިންޓްތައް ގާއިމްކުރެވޭނެ ސަރަހައްދުތަކެއް ހެދިގެންދާނެ ކަމަށްވެސް އެ މިނިސްޓްރީން ވިދާޅުވެއެވެ.