މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫންވެސް ކޯވިޑް-19އަށް ޕޮޒިޓިވްވެއްޖެއެވެ. މިނިސްޓަރ ވިދާޅުވީ ކޯވިޑަށް ޕޮޒިޓިވް ވުމާއި ގުޅިގެން މިހާރު އެކަހެރިވެވަޑައިގެންފައިވާކަމަށެވެ.
މިނިސްޓަރ ޔުމްނާ ވިދާޅުވީ، ހުމާއި ކަރުގަ ރިއްސުމާއި ރޯގާ އަދި ގައިގެ ރިއްސުން ހުރިކަމަށެވެ. އަދި އާއިލާއާމެދު ކަންބޮޑުވެވަޑައިގަންނަވާ ކަމަށް ވިދާޅުވެ މިނިސްޓަރ ޔުމްނާ ވަނީ ޢުމުރުން ދުވަސްވީ މީހުންނާއި ކުޑަކުދިން އަދި ހައި ރިސްކު މީހުން ބަލިން ރައްކާތެރިކުރުމަށް ސަމާލުވެ ފިޔަވަޅު އެޅުމަށްވެސް އިލްތިމާސްކުރައްވާފައެވެ.
މިނިސްޓަރ ޔުމްނާ ކޯވިޑަށް ޕޮޒިޓިވްވެފައިވާއިރު، މީގެ ކުރިން އެކަމަނާގެ ބައްޕާފުޅު އަދި ކުރީގެ ރައީސް މައުމޫން ޢަބްދުލް ޤައްޔޫމްވެސް ކޯވިޑަށް ޕޮޒިޓިވްވެ ފަރުވާ ހޯއްދަވާފައިވެއެވެ. އަދި އިއްޔެ ރައީސް އިބްރާހީމް މުޙައްމަދު ޞާލިޙްވެސް ވަނީ ކޯވިޑަށް ޕޮޒިޓިވްވެފައެވެ.