ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވުމުގެ އިނާމް ޕީއެސްއެމްގެ 16 މުވައްޒަފަކަށް ލިބިވަޑައިގެންފިއެވެ. ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންނަށް ރައީސުލްޖުމްހޫރިއްޔާ، ދެއްވި ޝަރަފުގެ ބެޖާއި، އައްޑަނަ މިބޭފުޅުންނަށް ދެއްވީ ދިވެހީންގެ އެއްބައިވަންތަކަމުގެ ދުވަހުގެ މުނާސަބަތުގައި މިރޭ ބޭއްވި ޖަލްސާގައެވެ.
ރައީސުލްޖުމްހޫރިއްޔާ ދެއްވި ޝަރަފްގެ ބެޖާއި އައްޑަނަ ލިބުނު ބޭފުޅުންގެ ތެރެއިން ޢަބްދުﷲ ރަމީޒްވަނީ ދިވެހި ދައުލަތުގެ މީޑިޔާއަށް 35 އަހަރަށްވުރެ ދިގު މުއްދަތަކަށް ޚިދުމަތް ކޮށްދެއްވާފައެވެ. ރަމީޒް ވަޒީފާ އަދާކުރަން ފެށީ 24 ނޮވެމްބަރު 1985 ގައިި އޭރު ސަރުކާރުގެ ވަކި އޮފީހެއްގެ ގޮތުގައި ހިނގަމުން އައި ދިވެހިރާއްޖޭގެ އަޑުގައެވެ. ރަމީޒް ފުރަތަމަ އަދާ ކުރީ ރިޕޯޓަރެއްގެ ވަޒީފާއެވެ. ޢަބްދުﷲ ރަމީޒްވަނީ ރާއްޖޭގައި ބްރޯޑްކާސްޓަރުންނާއި ނޫސްވެރިން ތަމްރީން ކުރުމުގެ ގިނަ ޕްރޮގްރާމްތަކެއް ރާވައި ހިންގަވާފައެވެ. އަދި ޖަރނަލިޒަމުން ފެށިގެން މީޑއާ މެނޭޖުމަންޓްގެ ތަމްރީނާއި އެތައް ޕްރޮގްރާމްތައް ރަމީޒް އިސްވެ ހިންގެވިއެވެ. ޢަބްދުﷲ ރަމީޒަކީ ދައުލަތުގެ މީޑިއާގެ ޚިދުމަތުގެ ފެންވަރު މަތިކުރުމަށާއި ފުޅާކުރުމަށާއި ތަރައްޤީކުރުމަށް ގިނަ މަސައްކަތްތަކެއް ކުރެއްވި އަދި މިހާރުވެސް ކުރައްވަމުން އަންނަ ހީވާގި މުވައްޒަފެކެވެ.
ރަމީޒް އަދާކުރައްވާފައިވާ ވަޒީފާތަކުގެ ތެރޭގައި ދިވެހިރާއްޖޭގެ އަޑުގެ ރިޕޯޓަރ ކަމުގެ އިތުރަށް ސަބް އެޑިޓަރ ކަމާއިު އެސިސްޓެންޓް އެޑިޓަރކަމާއި، ސީނިއަރ އެސިސްޓެންޓް އެޑިޓަރ ކަމާއި. އެޑިޓަރ ކަމުގެ ވަޒީފާ އަދާކޮށްފައިވެއެވެ. އަދި ޓީވީ މޯލްޑިވްސްގެ ޑިރެކްޓަރ ނިވްސް އެންޑް ކަރަންޓް އެފެއަރޒް ކަމާއި ދައުލަތުގެ މީޑިއާ އެއް މުއައްސަސާއެއްގެ ދަށުން ހިންގަން ފެށިފަހުން އެމުއައްސަސާގެ ޑިރެކްޓަރ ޓްރޭނިންގ ކަމާއި ޑިރެކްޓަރ ހިއުމަން ރިސޯސް ކަމާއި ޑިރެކްޓަރ އެޑްމިނިސްޓްރޭޝަން ކަމާއި ޑިރެކްޓަރ ނިވްސް އެންޑް ކަރަންޓް އެފެއަރޒް ކަމާއި ޑިރެކްޓަރ އާރކައިވް ކަމާއި ކޮމްޕެނީ ސެކްރެޓަރީކަން ވަނީ އަދާކޮށްފައެވެ.
އާދަމް ލަތީފަކީ ދިވެހި ސަރުކާރަށް 45 އަހަރަށްވުރެ ދިގު މުއްދަތަކަށް ޚިދުމަތްކޮށްފައިވާ މީހެކެވެ. އާދަމް ލަތީފް ވަޒީފާ އަދާކުރަން ފެށީ 22 މެއި 1975 ގައި އޯޑިޓް އޮފީހުގެ އޮޑިޓް އޮފިސަރ ޓްރޭނީއެއްގެ ވަޒީފާގައެވެ. އެތަނުން 19 މާރޗް 1980 ގައި ބަދަލުވީ އޭރުގެ ޓެލެވިޜަން މޯލްޑިވްސްގެ ޓްރާންސްމިޝަން ޓެކްނީޝަނެއްގެ ވަޒީފާއަށެވެ. އަދި އާދަމް ލަތީފް ޓީވީ މޯލްޑިވްސް އަށް ބަދަލުވި އިރު ޓީވީގައި ލައިވްކުރުމާއި އައުޓްޑޯގައި 1 ކެމެރާއަށްވުރެ ގިނަ ކެމެރާ ބޭނުންކުރުމަށް ބޭނުންކުރަމުން އައީ އިލެކްޓްރިކް ބޮކި ދިއްލަން ބޭނުންކުރާ ޓޫވޭ ސްވިޗެކެވެ. އާދަމް ލަތީފްވަނީ ޓެލެވިޜަން މޯލްޑިވްސްގައި 4 ކެމެރާ ބޭނުންކުރެވޭ ގޮތަށް އަމިއްލައަށް ކަޓް ސުވިޗެއް ތައްޔާރު ކޮށްފައެވެ. ކަޓް ސުވިޗަކީ މަންޒަރު ލައިވްކުރާއިރު އެއް ކެމެރާއިން އަނެއް ކެމެރާއަށް މަންޒަރު ބަދަލުކުރާއިރު ބޭނުންކުރާ ސުވިޗެކެވެ. ޓީވީ މޯލްޑިވްސްގެ ވަޒީފާގައި މިވީ ދިގުމުއްދަތުއި އާދަމް ލަތީފްވަނީ އޭނާގެ ދާއިރާއިން ރާއްޖެއިން ބޭރުން ތަމްރީން ފުރިހަމަކޮށްފައެވެ.
އާދަމް ލަތީފް ޓީވީ މޯލްޑވްސްގައި އަދާކުރި ވަޒީފާތަކުގެ ތެރޭގައި ޓްރާންސްމިޝަން ޓެކްނީޝަން ކަމާއި، މެއިންޓަނަންސް ޓެކްނީޝަން ކަމާއި، ސީނިއަރ މެއިންޓަނަންސް ޓެކްނީޝަން ކަން ހިމެނެއެވެ. އަދި ސިވިލްސަރވިސް ވަޒީފާ ނިމި ކުންފުންޏަކަށް ބަދަލުވިއިރު ހުރީ ޑެޕިއުޓީ ޑިރެކްޓަރެއްގެ ވަޒީފާ ގައެވެ. އާދަމް ލަތީފްވަނީ 65 އަހަރުވުމުން ވަޒީފާއިން ރިޓަޔަރ ކޮށްފައެވެ.
ޝަރަފުގެ ބެޖާއި، އައްޑަނަ ލިބުނު އަޙްމަދު ފިކުރީ އަކީ ދިވެހި ސަރުކާރަށް 38 އަހަރަށްވުރެ ދިގު މުއްދަތަކަށް ޚިދުމަތްކޮށްފައިވާ މީހެކެވެ.
ފިކުރީ ވަޒީފާއަދާކުރަން ފެށީ 10 މެއި 1983 ގައި ޓީވީ މޯލްޑިވްސްގެ ޕިއޯނެއްގެ ވަޒީފާއިންނެވެ. އޭގެ ފަހުން މިވީ ދިިގުމުއްދަތުގައި އަދާކޮށްފައިވާ ވަޒީފާ ތަކުގެ ތެރޭގައި ޓީވީއެމްގެ ޓެކްނިކަލް އެސިސްޓެންޓްގެ ވަޒީފާ އާއި، އެސިސްޓެންޓް ލައިޓިންގ ޓެކްނީޝަންގެ ވަޒީފާ އާއި، ސީނިއަރ ލައިޓިންގ ޓެކްނީޝަންގެ ވަޒީފާ އާއި، ޕްރޮޑަކްޝަން އެގްޒެކްޓިވް ލައިޓިންގ ޓެކްނީޝަންގެ ވަޒީފާ އާއި، ޗީފް ލައިޓިން ޓެކްނީޝަންގެ ވަޒީފާ ހިމެނެއެވެ.
އަހުމަދު ފިކުރީގެ މަސައްކަތްތަކުގެ ތެރޭގައި ޕްރޮގްރާމްތަކަށާއި، ސްޓޫޑިއޯ ލައިޓިންއާއި، ޚަބަރަށް ލައިޓިން ހެދުން ހިމެނެއެވެ. އަދި ލައިޓިން ޔުނިޓްގެ މުވައްޒަފުންގެ މަސައްކަތް މޮނީޓަރކޮށް ބެލެހެއްޓުންވެސް ހިމެނެއެވެ.
އައިޝަތުު ނަސީމް ސަރުކާރަށް ޚިދުމަތް ކުރަން ފަށާފައިވަނީ 1 މެއި 1983ގައި މާލޭ މުނިސިޕަލްޓީގެ ކާތިބާއެއްގެ ވަޒީފާއިންނެވެ.
އަދި 28 އޮކްޓޫބަރު 1986ގައި ދިވެހިރާއްޖޭގެ އަޑުގެ 2 ނަމްބަރު ކާތިބާއެއްގެ ވަޒީފާއަށް ބަދަލުވިއެވެ. އޭގެ ފަހުން މިވީ މުއްދަތުގެ ތެރޭގައި އައިޝަތު ނަސީމް އަދާކޮށްފައިވާ ވަޒީފާތަކުގެ ތެރޭގައި ދިވެހިރާއްޖޭގެ އަޑުގެ އެސިސްޓެންޓް ސެކްރެޓަރީ ކަމާއި، އެޑްމިނިސްޓްރޭޓިވް އޮފިސަރ ކަމާއި، ރެވެނިއު އޮފިސަރ ކަމާއި، ސީނިއަރ އެޑްމިނިސްޓްރޭޓިވް އޮފިސަރކަން ހިމެނެއެވެ.
އައިޝަތު ނަސީމް ސަރުކާރުގައި ކުރެއްވި މަސައްކަތްތަކުގެ ތެރޭގައި އިޝްތިހާރުތައް ބްރޯޑް ކާސްޓް ކުރުމަށް ފޮނުވުމާއި، ބިލްތައް ހެދުމާއި، އާމްދަނީ ފައިސާ ބަލައިގަތުމާއި، ފައިސާ ޖަމާކުރުމާއި، ލިބެންވެ ނުލިބި ހުރި ފައިސާތައް ހޯދުމާއި، ލީގަލްއަށް ލިބޭ ލިއުންތައް ބެލެހެއްޓުމުގެ މަސައްކަތް ހިމެނެއެވެ.
އަލީ ޙިލްމީ ޤައުމީ ޚިދުމަތަށް ނިކުމެފައިވަނީ 21 އޭޕްރީލް 1979 ވަނަ އަހަރުއެވެ. އުމުރުން 18 އަހަރުގައި އަލީ ހިލްމީ އެންމެ ފުރަތަމަ އަދާކުރަން ފެށީ ހުޅުލޭ އެއަރޕޯޓް ކޮންސްރަކްޝަން ޕްރޮޖެކްޓް ޔުނިޓްގެ 2 ނަންބަރު ކާތިބުކަމުގެ ވަޒީފާއެވެ. އޭގެ ފަހުން ގަވަރމަންޓު ހޮސްޕިޓަލުގެ 2 ނަންބަރު ކާތިބު (ވަގުތީ) ކަމާއި، ދިވެހިރާއްޖޭގެ ތަޢުލީމު ކުރިއަރުވާ މަރުކަޒުގެ 2 ނަންބަރު ކާތިބު ހިސާބު ބަލަހައްޓާ ކަމުގެ ވަޒީފާ އަށްފަހު ދިވެހިރާއްޖޭގެ އަޑުގައި ޚިދުމަތް ކުރަން ފަށާފައިވަނީ 30 އޮކްޓޫބަރ 1984ގައެވެ.
އަޑުގައި ފުރަތަމަ މަސައްކަތް ކުރީ ޓެކްނިކަލް ދާއިރާގައެވެ. ޓެކްނިކަލް ދާއިރާގައި މަސައްކަތް ކުރުމަށްފަހު، ޕްރެޒެންޓަރ ޕްރޮޑިއުސަރ ޓްރެއިނީ އެއްގެ ގޮތުގައި ދިވެހިރާއްޖޭގެ އަޑުގެ ޕްރޮގްރާމް ޑިޕާޓްމެންޓާ ގުޅުނީ 08 އޮގަސްޓް 1991 ގައެވެ.
ދިވެހިރާއްޖޭގެ އަޑުގެ ސީނިއަރ އެގްޒެކެޓިވް ޕްރޮޑިއުސަރެއްގެ ވަޒީފާގައި ހުރި ޢަލީ ޙިލްމީ މިހާރު އުފައްދަނީ "ޤާނޫނީ ލަފާ"، "ސީދާމަގު" އަދި "ނާރެސް ޕްރޮގްރާމެވެ. ތަފާތު ދާއިރާތަކުގެ ޕްރޮގްރާމް އުފެއްދުމުގެ އިތުރުން ޢަލީ ޙިލްމީ ވަނީ، ޚާއްޞަ ރަސްމިއްޔާތުތަކާއި ޖަލްސާތައްވެސް ވަގުތުން ގެނެސްދީފައެވެ.
ޢަލީ ޙިލްމީ މެދުނުކެނޑި ޤައުމަށް ޚިދުމަތް ކުރަމުންދާތާ މިހާރުވަނީ 41 އަހަރު ވެފައެވެ.
ފަހުމީ ރަޝާދަކީ ދިވެހި ސަރުކާރަށް 42 އަހަރަށްވުރެ ދިގު މުއްދަތަކަށް ޚިދުމަތްކޮށްފައިވާ މީހެކެވެ.
ފަހުމީ ވަޒީފާ އަދާކުރަން ފެށީ 04 އެޕްރީލް 1979 ގައި ޑިޕާރޓްމަންޓް އޮފް ޕަބްލިކްވާރކްސް އެންޑް ލޭބަރގައެވެ. އެއޮފީހުގެ ސެކްރެޓަރީ ވަޒީފާގައި އުޅުމަށްފަހު ދިވެހިރާއްޖޭގެ އަޑަށް ބަދަލުވީ 18 ނޮވެމްބަރ 1982 ގައެވެ. އަޑުގައި ފައިނޭންސް ސެކްރެޓަރީއެއްގެ މަގާމާއި، އެޑްމިނިސްޓްރޭޓިވް އޮފިސަރ، އަދި ބަޖެޓް އޮފިސަރގެ މަޤާމުގައި އުޅުއްވުމަށްފަހު އެޓަރނީ ޖެނެރަލް އޮފީހަށް ބަދަލުވިއެވެ. އެޓަރނީ ޖެނެރަލްގެ އޮފީހުގައި ސީނިއަރ އެޑްމިނިސްޓްރޭޓިވް އޮފިސަރގެ މަޤާމުގައި އުޅުމަށްފަހު ދިވެހިރާއްޖޭގެ އަޑުގެ ވަޒީފާއާ އަނެއްކާވެސް ގުޅުނީ 22 ޖޫން 1997ގައެވެ. އޭގެފަހުން މިވީ މުއްދަތުގައި އަޑުގެ ބަޖެޓް އޮފިސަރ ކަމާއި އެސިސްޓެންޓް ޑިރެކްޓަރ ކަމާއި، ޑެޕިއުޓީ ޑިރެކްޓަރ ކަމާއި، ފައިނޭންސް ޑިރެކްޓަރ ކަމާއި، ފައިނޭންސް ކޮންޓްރޯލްކަމާއި، ޑިރެކްޓަރ ނިއުސްކަމާއި، ޑިރެކްޓަރ ޓެކްނިކަލް ރިސޯސް މެނޭޖްމެންޓްގެ މަޤާމް ހިމެނެއެވެ.
ފަހުމީ ރަޝާދު ކުރެއްވި މަސައްކަތުގެ ތެރޭގައި އޮފީހުގެ ބަޖެޓް އެކުލަވާލުމާއި، މުވައްޒަފުންނަށް މުސާރަ ދިނުމަށްޓަކައި ކުރަންޖެހޭ މަސައްކަތްކުރުމާއި، ކުންފުނީގެ އިންވެންޓްރީ ބެލެހެއްޓުމާއި، ކުންފުންޏަށް ލިބޭ ފައިސާއާއި ޚަރަދުކުރެވޭ ފައިސާގެ ކަންތައް ބެލެހެއްޓުން ހިމެނެއެވެ. އަދި ނިވްސް ޑިޕާޓްމަންޓުގެ މުވައްޒަފުންގެ ކަންތައް ބެލެހެއްޓުމާއި، ޓެކްނިކަލް ގޮތުން ޕްރޮގްރާމްތައް ހެދުމުގެ މަސައްކަތްކުރާ މުވައްޒަފުން ބެލެހެއްޓުން ކަންތައްތައް ހިމެނެއެވެ.
ފާތުމަތު ޒުހައިރާ ސަރުކާރުގެ ޚިދުމަތްފެށީ ސްކޫލް ނިންމާ ކުދިން ސަރުކާރުގެ ވަޒީފާއަށް ޚިދުމަތްކުރަން ޖެހޭތީ ބޮންޑުގެ ދަށުން 1980ގައި އެއަރމޯލްޑިވްސް އިނގިރޭސި ސެކްރެޓަރީގެ ވަޒީފާއަށެވެ. އެތަނުގައި 2 އަހަރު ދުވަސްވިތަނާ މަޖީދިއްޔާ ސްކޫލުގެ އިނގިރޭސި ސެކްރެޓަރީއަކަށް ބަދަލުކުރެއްވިއެވެ. މަޖީދިއްޔާސްކޫލްގައި 6 އަހަރު މަސައްކަތްކުރުމަށްފަހު ދިވެހި ރާއްޖޭގެ އަޑުގެ ވަޒީފާއަށް ބަދަލުވީ 30 ޖަނަވަރީ 1988 ގައި ޖަރނަލިސްޓް ޓްރޭނީ އެއްގެ ވަޒީފާއަށެވެ.
އޭގެފަހުން ދިވެހިރާއްޖޭގެ އަޑުގެ ޖަރނަލިސްޓްކަމާއި، އެޑިޓަރ ކަމާއި، އެގްޒެކްޓިވް އެޑިޓަރ ކަމާއި، އެސިސްޓެންޓް މެނޭޖަރ އިންޓަނޭޝަނަލް ރިލޭޝަންގެ ވަޒީފާ އަދާކުރައްވާފައިވެއެވެ. މިވަޒީފާގައި ކުރައްވާފައިވާ މަސައްކަތްތަކުގެ ތެރޭގައި މުވައްޒަފުން ޓްރޭނިންތަކަށް ރާއްޖެއިން ބޭރަށް ކުރާ ދަތުރުތަކުގެ މަސައްކަތާއި، ކުންފުނީގެ ބިޒްނަސް ޑިވެލޮޕްމެންޓްގެ މަސައްކަތް ބެލެހެއްޓުން ހިމެނެއެވެ.
އަދި ދިވެހިރާއްޖޭގެ އަޑުގެ ނިއުސްރޫމް އާ ޓެލެވިޒަން މޯލްޑިވްސްގެ ނިއުސްރޫމް އެއްކޮށްލުމަށްފަހު އިންގްލިޝް އެންޑް އިންޓަރނޭޝަނަލް ޑެސްކްގެ ހެޑްކަންވެސް އަދާކޮށްފައިވެއެވެ. 2021 ވަނަ އަހަރު ވަޒީފާއިން ވަކިވި އިރު ހުރީ ސޭލްސް އެންޑް މާކެޓިންގގެ އެސިސްޓަންޓް މެނޭޖަރ އަކަށެވެ.
ފާތުމަތު ޙަސަން އަކީ، ދިވެހި ދައުލަތުގެ ވަޒީފާގައި 38 އަހަރު ޚިދުމަތް ކޮށްފައިވާ މީހެކެވެ. ވަޒީފާ އަދާކުރަން ފުރަތަމަ ފެށީ 13 ޑިސެމްބަރ 1982 ގައި ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުގެ ކާތިބާއެއްގެ ވަޒީފާގައެވެ. އެއޮފީހުން 16 އެޕްރީލް 1985 ގައި ބަދަލުވީ ޓީވީ މޯލްޑިވްސްގެ ކާތިބާއެއްގެ ވަޒީފާއަށެވެ. ޓީވީ މޯލްޑިވްސްގެ ސީނިއަރ ކްލާރކް ކަމާއި އެސިސްޓެންޓް ސެކްރެޓަރީ ކަމާއި، ސެކްރެޓަރީ ކަމާއި، އެޑްމިނިސްޓްރޭޓިވް އޮފިސަރ ކަމާއި ސޭލްސް އޮފިސަރ ކަމާއި އެޑްމިނިސްޓްރޭޓިވް އޮފިސަރ ކަމާއި ސީނިއަރ ކަސްޓަމަރ އޮފިސަރ ކަމާއި، ސީނިއަރ ޓެކްނިކަލް އިކްއިޕްމެންޓްގެ ވަޒީފާ އަދާކުރައްވާފައިވެއެވެ.
ސްޓޮކް ބެލެހެއްޓުމާއި، ޓީވީ ރަޖިސްޓްރީކޮށް ބެލެހެއްޓުމުގެ މަސައްކަތާއި، ޔައުމިއްޔާ ލިއުމާއި، ސޭލްސްގެ މަސަކަތްތަކާއި އިކްއިޕްމެންޓް ދޫކޮށް ބަލައިގަތުމުގެ މަސައްކަތް ވެސް ފާތުމަތު ޙަސަންވަނީ ކޮށްފައެވެ.
ހަރިއްޔާ އަލީ އަކީ، ދިވެހި ދައުލަތުގެ ވަޒީފާގައި 37 އަހަރު ޚިދުމަތް ކޮށްފައިވާ މީހެކެވެ. އެންމެ ފުރަތަމަ ސަރުކާރުގެ ވަޒީފާއަށް ވަނީ މަޖީދިއްޔާ ސްކޫލްގެ ކުލާކް ޓައިޕިސްޓެއްގެ ވަޒީފާއަށެވެ.
މަޖީދިއްޔާގެ ވަޒީފާ އަދާކޮށްފައިވަނީ 04ޑިސެމްބަރު 1983 އިން ފެށިގެން 12 އޮގަސްޓް 1985 ގެނިޔަލަށެވެ. 13 އޮގަސްޓް 1985 އިން ފެށިގެން ޓީވީ މޯލްޑިވްސްގެ ޓައިޕިސްޓެއްގެ (ވަގުތީ) ވަޒީފާއަށް ބަދަލުވުމަށްފަހު ޓީވީމޯލްޑިވްސްގެ ޓައިޕިސްޓެއްގެ ވަޒީފާއާއި އެސިސްޓެންޓް ސެކްރެޓަރީގެ ވަޒީފާއާއި އެސިސްޓެންޓް އެޑްމިނިސްޓްރޭޝަން އޮފިސަރގެ ވަޒީފާ އާއި އެސިސްޓެންޓް ފްރަންޓް އޮފިސަރ ވަޒީފާއަދާކޮށްފައިވެއެވެ. ހަރިއްޔާ މިހާރު މިހުރީ ޓެކްނިކަލް އިކްލިޕްމެންޓް ޑިސްޕެޗް އޮފިސަރގެ ވަޒީފާގައެވެ.
ސަރުކާރަށް ވަނީއްސުރެ ގަޑިނުޖެހި ހާޒިރު ނުވާ ދުވަހެއް ނެތި އިޚްލާސްތެރި ކަމާއެކު އޮފީހުން އެންގި ކޮންމެ މަސައްކަތެއް އިހްލާސްތެރި ކަމާއެކު ހަރިއްޔާ އަންނަނީ ކުރަމުންނެވެ. އެގޮތުގެމަތިން ރައްޔިތުންގެ ޚާއްސަ މަޖިލިސްގެ ޔައުމިއްޔާތަކާއި، ޚާއްސަ ކޮމެޓީތަކުގެ ޔައުމިއްޔާތައް ޓައިޕް ކުރުމާއި، މަޖިލިސް މެމްބަރުންނަށް ކޮންމެ މެމްބަރަކަށް ޔައުމިއްޔާގެ ކޮޕީއެއް ފޮނުވުމުގެ މަސައްކަތް 07 ނޮވެމްބަރު 2004 ން 20 މެއި 2005 އަށް ހަރިއްޔާ ކުރައްވާފައިވެއެވެ.
އިބްރާހީމް އާޒިމް ސަރުކާރުގެ ވަޒީފާއަށް ފުރަތަމަވަނީ ދިވެހިރާއްޖޭގެ އަޑުގެ އޮޕަރޭޓަރެއްގެ ވަޒީފާ އަށެވެ. އޭގެފަހުން ޓެކްނިކަލް އެސިސްޓްގެ ކަމާއި ސީނިއަރ ޓެކްނީޝަން ކަމާއި އެސިސްޓެންޓް އިންޖިނިއަރިންކަމާއި، މެނޭޖަރ ސައުންޑް އިންޖިނިއަރިންގެ ވަޒީފާ އަދާކުރައްވާފައިވެއެވެ.
އިބްރާހީމް އާޒިމް ކުރެއްވި މަސައްކަތްތަކުގެ ތެރޭގައި ސްޓޫޑިއޯ އިކްއިޕްމެންޓް މެއިންޓައިންކުރުމާއި މިއުޒިކާއި ލަވަ ޕްރޮގްރާމްތައް ރެކޯޑްކުރުމާއި ޕްރޮގްރާމްތަކުގެ ލައިޓް ހެދުމާއި އައުޓްޑޯ ބްރޯޑްކާސްޓިންގ ޕްރޮގްރާމްތައް މޮނީޓަރކުރުމާއި ލައިވް ޕްރޮގްރާމްތައް އެހުންތެރިންނާއި ހަމައަށް ފޯރުކޮށްދިނުމަށް ކުރަންޖެހޭ މަސައްކަތް ކުރުމާއި، ބްރޯޑްކާސްޓްކުރުމަށް ކޮންޓެންޓް އުފެއްދުމުގައި ގެންގުޅޭ ޓެކްނިކަލް ސްޓޭންޑަރޑްސް ކަޑައެޅުން ހިމެނެއެވެ.
ދިވެހިރާއްޖޭގެ އަޑުގެ މާސްޓަރ ކޮންޓްރޯލް ރޫމް ޑިޒައިންކޮށް ފަރުމާކުރުމާއި އޮޕްޓިކަލް ފައިބަރއާއި ގުޅޭ އިކްއިޕްމަންޓް ބެލެހެއްޓުމާއި، އައުޓްޑޯ ބްރޯޑްކާސްޓިންގ މޮނީޓަރ ކުރުމާއި، އެފް އެމްގެ ޚިދުމަތް ދިވެހި ރާއްޖޭގެ އަޑުން ގެނައުމަށްޓަކައި މާލޭގެ އެކި ސަރަހައްދުތަކުގައި އެޅި ފައިބަރ އޮޕްޓިކަލް ކޭބަލް އެޅުމުގެ މަސައްކަތް ކުރުމާއި މޮނީޓަރކޮށް ބެލެހެއްޓުމާއި، އަދި ޓެކްނޮލޮޖީއަށް އަންނަމުންދާ ކުރިއެރުންތައް ވިސްނާ މިދާއިރާގެ މަސައްކަތްތައް އަވަސްކުރުމަށް އިބްރާހީމް އާޒިމް މަސައްކަތްކުރެއްވިއެވެ.
ޚާލިދު އިބްރާހީމަކީ 1975 ނޮވެމްބަރު 15 އިންފެށިގެން މެދުކެނޑުމެއްނެތި ދިވެހިރާއްޖޭގެ އަޑު (އޭރުގެ ރޭޑިއޯ މޯލްޑިވްސް) ގައި މަސައްކަތް ކުރަމުން އަންނަ މުވައްޒަފެކެވެ. ފުރަތަމަ ވަޒީފާއަކީ 2 ނަންބަރު އޮޕަރޭޓަރުކަމެވެ. މިހާރު ޚާލިދުގެ މަގާމަކީ އެސިސްޓަންޓް މެނޭޖަރު ކަމެވެ.
ޚާލިދު ފުރަތަމަ ކުރި ފާހަގަކޮށްލެވޭ މަސައްކަތްތަކުގެ ތެރޭގައި 1976 ވަނަ އަހަރު ގަމުން އިނގިރޭސިން ފޭބުމާ ގުޅިގެން އެތާނގައި ހުރި މާކޯނީ އާއި ރަކަލް ޓްރާންސް މިޓަރުތަކެއް މާލެގެނައުމުން އެތަކެތި އިންސްޓޯލް ކުރުމުގައި އަމަލީގޮތުން ބައިވެރިވިއެވެ. އޮސްޓްރޭލިއަން އެއިޑްގެ ދަށުން ގެނެވުނު މުޅިން އައު 2 ޓްރާންސްމިޓަރ ބެލެހެއްޓުމުގެ މަސައްކަތުގައިވެސް ޚާލިދު އަމަލީގޮތުން ބައިވެރިވެފައިވެއެވެ. މި ޓްރާންސްމީޓަރުން އަޑު ދުރަށް ފޮނުވަން ފެށީ 1981 ޑިސެމްބަރު 29 ގައެވެ.
ޚާލިދު މިހާރު އަދާކުރާ މަސްއޫލިއްޔަތަކީ ޓޭޕް، އެމްޑީ، ސީޑީ ފަދަ ކުރީގެ މީޑިއާތަކުގައި ހުރި ޒަމާންވީ ކޮންޓެންޓް ޑިޖިޓަލައިޒްކޮށް ގިނަދުވަހު ހުންނާނޭހެން ރައްކާތެރި ކުރުމެވެ.
މަރިޔަމް ޝަރީފާ އަކީ، ދިވެހި ދައުލަތުގެ ވަޒީފާގައި 43 އަހަރު ޚިދުމަތް ކޮށްފައިވާ މީހެކެވެ. ވަޒީފާ އަދާކުރަން ފުރަތަމަ ފެށީ 11 އެޕްރީލް 1978 ގައި ނޯދަން ރީޖަނަލް އޮފީހުގައެވެ. އޭގެ ފަހުން މިނިސްޓްރީ އޮފް އެޓޮލްސް އެޑްމިނިސްޓްރޭޝަންގެ ވަޒީފާއަށް ސަރުކާރުން ބަދަލުކުރެއްވިއެވެ. އެދެ އޮފީހުގައިވެސް ދެނަމްބަރ ކާތިބެއްގެ ވަޒީފާ ޝަރީފާ އަދާކުރެއްވިއެވެ. އެއަށްފަހު 02 ފެބްރުއަރީ 1984 ގައި ބަދަލުވީ ޓީވީ މޯލްޑިވްސްގެ ސެކްރެޓަރީއެއްގެ ވަޒީފާއަށެވެ. ޓީވީ މޯލްޑިވްސްގައި ސެކްރީޓަރީ ކަމާއި، ސީނިއަރ ސެކްރެޓަރީ ކަމާއި، ސީނިއަރ އެޑްމިނިސްޓްރޭޝަން ކަމާއި، އެސިސްޓެންޓް ޑިރެކްޓަރ ކަމާއި، ދައުލަތުގެ މީޑިއާ އެއް މުއައްސަސާއެއްގެ ދަށުން ހިންގަން ފެށިފަހުން، އެ މުއައްސަސާގެ މެނޭޖަރ ހިއުމަންރިސޯސް އެންޑް ޓްރޭނިންގ ވަޒީފާ އަދާކުރައްވާފައިވެ އެވެ. ދިވެހިރާއްޖޭގައި ޓެލެވިޜަން ރަޖިސްޓްރީކޮށްގެން ބޭނުންކުރަން ފެށުމަށް ހަމަޖެހުމާއެކު، ޓީވީ ރަޖިސްޓްރީކުރުން ހުއްޓާލުމާއި ހަމައަށްވެސް މިމަސައްކަތްކޮށް ބެލެހެއްޓީ ޝަރީފާއެވެ.
ޝަރީފާގެ މަޤާމުގެ މަސްއޫލިއްޔަތުގެ އިތުރުން 19 އަހަރު ދުވަސްވަންދެން މާލޭގެ ސްކޫލްތަކަށް ހުޅުވާލައިގެން ޓީވީ މޯލްޑިވްސް އިން އިންތިޒާމްކޮށް ކުރިއަށްގެންދެވުނު ލަވަމުބާރާތްތައް ކުރިއަށްގެން ދިއުމަށްޓަކައި އިޢުލާންކުރުމާއި ހަމައިންފެށިގެން މުބާރާތުގެ ނަތީޖާ ނިމެންދެން މިމަސައްކަތް ރާވާ ކުރިއަށްގެންގޮސް ނަތީޖާފާޅުކޮށް ނިމުމާ ހަމައަށް ހުރިހާ އިދާރީ މަސައްކަތްތަކެއް ކުރިއަށް ގެންދިޔައީ ޝަރީފާގެ ބެލުމުގެދަށުންނެވެ.
މުޙައްމަދު އާމިރަކީ، ދިވެހި ދައުލަތުގެ ވަޒީފާގައި 37 އަހަރު ޚިދުމަތް ކޮށްފައިވާ މުވައްޒަފެކެވެ. ވަޒީފާ މެދުކެޑިފަ އަލުން ވަޒީފާ އަދާކުރަން ފެށިފައިވަނީ 15 ޖަނަވަރީ 1993 ގައި ޓީވީ މޯލްޑިވްސްގެ ޓެކްނިކަލް އެސިސްޓެންޓެއްގެ ވަޒީފާއެވެ.
އޭގެފަހުން ޓެކްނިކަލް އެސިސްޓެންޓެއްގެ ވަޒީފާއާއި، އެސިސްޓެންޓް ލައިޓިންގ ޓެކްނީޝަން އާއި، ލައިޓިންގ ޓެކްނީޝަންގެ ވަޒީފާއާއި، ސީނިއަރ ލައިޓިންގ ޓެކްނީޝަންގެ ވަޒީފާ އަދާކުރައްވާފައިވެއެވެ. ވަޒީފާގައި ކުރައްވާފައިވާ މަސައްކަތްތަކުގެ ތެރޭގައި ޚަބަރު އިވެންޓްތަކާއި، ޕްރޮގްރާމްތަކަށް ވީޑިއޯ ނެގުމުގައާއި، ސްޓޫޑިއޯތަކާއި އަދި ބޭރުގައި ބޭއްވޭ އިވެންޓްތަކުގައި ލައިޓްހެދުމުގެ މަސައްކަތްކުރުން ހިމެނެއެވެ.
މުޙައްމަދު ފުއާދު އަކީ، ދިވެހި ދައުލަތުގެ ވަޒީފާގައި 37 އަހަރު ޚިދުމަތް ކޮށްފައިވާ މުވައްޒަފެކެވެ. ސަރުކާރުގެ ވަޒީފާ އަދާކުރަން ފަށާފައިވަނީ 25 އެޕްރީލް 1981 ގައި ޕަބްލިކް މެއިންޓަނަންސް އޮފީހުގެ ޕިއޯނެއްގެ ވަޒީފާއިންނެވެ. 19 ޖޫން 1982ން ފެށިގެން ޕޯސްޓް އޮފީހުގެ ޕޯސްޓް މޭން ވަޒީފާއަށް ބަދަލުވެ 11 ސެޕްޓެމްބަރ 1983ގައި ރައީސުލްޖުމްހޫރިއްޔާގެ އޮފީހުގެ ޕިއޯނެއްގެ ވަޒީފާއަށް ބަދަލުވެފައިވެއެވެ. އޭގެފަހުން މުލީއާގެ 1 ނަމްބަރ ޕިއޯނެއްގެ ވަޒީފާއާއި 2ނަންބަރ ޕިއޯނެއްގެ ވަޒީފާ އަދާކުރައްވަނިކޮށް ފިނޭންސް މިނިސްޓްރީގެ ނޯޓިސްދެވޭ މުވައްޒަފެއްގެ ގޮތުގައި 26 އޮކްޓޫބަރ 1984ގައި ބަދަލުކުރައްވާފައިވަނިކޮށް 26 ޖަނަވަރީ 1994ގައި ދިވެހިރާއްޖޭގެ ޑިއުޓީ އޮފިސަރެއްގެ މަގާމަށް ބަދަލުވެ އޭގެފަހުން ސުޕަވައިޒަރ ވަޒީފާއަށް ބަދަލުވެފައިވެއެވެ.
ވަޒީފާގައި ކުރައްވާފައިވާ މަސައްކަތްތަކުގެ ތެރޭގައި ކުންފުނީގެ ބޭނުންތަކަށް ކުރަންޖެހޭ ދަތުރުތައް ކުރުވުމާއި ވެހިކަލްކަންތައް ބެލެހެއްޓުމާ ކުންފުނީގެ އެއް އިމާރާތުން އަނެއް އިމާރާތަށް ފޮނުވަންޖެހޭ ތަކެތި ފޮނުވުމުގެ މަސައްކަތްކޮށް ބަލަހައްޓަވައެވެ.
މުހައްމަދު ނަޒީރު ވަނީ ޓީވީ މޯލްޑިވްސްގެ ތަފާތު ދާއިރާ ތަކުގައި މަސައްކަތް ކޮށްފައެވެ. އޭގެ ތެރޭގައި އިދާރީ ބަޔާއި ނިއުސް ރޫމާއި އިންޖިނިއަރިންގ ބަޔާއި ޕްރޮގްރާމިންގބަޔާއި މީޑިއާ ރެކޯޑިންގ ޔުނިޓް ގައިވެސް މަސައްކަތް ކޮށްފައިވެއެވެ. އެންމެ ފަހުން އަދާކުރެއްވީ ދިވެހިރާއްޖޭގެ އަޑުގެ ޑިޖިޓަލް އާކައިވްސްގެ މަސައްކަތްތައް ބެލެހެއްޓުމުގެ ވަޒީފާއެވެ.
ނަޒީރު އިސްވެހުރެ ޓީވީ މޯޑިވްސްގައި ކުރެވުނު މުހިންމު ކަންކަމުގެތެރޭގައި 5 ވަނަ ސާކް ސަމިޓްގެ ނިއުސް ފީޑްތައް ސެޓެލައިޓް މެދުވެރިކޮށް އަޕްލިންކް ކުރުމުގެ މަސައްކަތާއި އާ ޓްރާންސްމިޓަރ ބެހެއްޓުމުގެ މަސައްކަތާއި ޖަޕާނުން އިންޖިނޭރުން ގެނެސްގެން 1995 ގައި ޓެކްނިކަލް މުވައްޒަފުންނަށް ހިންގި އިންޖިނިއަރިންގ ކޯސް ވިލަރެސް ކުރުމާއި 1998 ގައި ޖަޕާން ސަރުކާރުން ހަދިޔާކުރެއްވި އިކުއިޕްމަންޓް ބެހެއްޓުމުގެ މަސައްކަތް ބެލެހެއްޓުމާއި ޓީވީ މޯލްޑިވްސްގެ ޓަވަރުގައި ހަރުކޮށްފައިވާ އެންޓެނާ ސިސްޓަމް ބަދަލު ކުރުމުގެ މަސައްކަތް ހިމެނެއެވެ.
މޫސާ ޙަލީމަކީ ދިވެހި ސަރުކާރަށް 35 އަހަރަށްވުރެ ދިގު މުއްދަތަކަށް ޚިދުމަތްކޮށްފައިވާ މީހެކެވެ. ވަޒީފާ އަދާކުރަން ފެށީ 23 މެއި 1985 ގައި ޓީވީ މޯލްޑިވްސްގައެވެ. ޓީވީއެމްގެ އޮފީހުގެ ޓެކްނީޝަން ޓްރޭނީގެ މަޤާމާއި، އެސިސްޓެންޓް ޓެކްނީޝަންގެ މަޤާމާއި، ޕްރޮޑަކްޝަން ޓެކްނީޝަންގެ މަޤާމާއި، ސީނިއަރ ޕްރޮޑަކްޝަން ޓެކްނީޝަންގެ މަޤާމާއި އެސިސްޓެންޓް މެނޭޖަރ މެއިންޓަނަންސްގެ މަޤާމާއި މެނޭޖަރ ޓެކްނިކަލް އޮޕަރޭޝަންގެ މަޤާމް އަދާކުރައްވާފައިވެއެވެ.
މުސާ ޙަލީމް ކުރެއްވި މަސައްކަތްތަކުގެ ތެރޭގައި ޓެރިސްޓްރިއަލް ޓްރާންސްމިޓަރ ޖައްސާ ބެލެހެއްޓުމާއި އޮންއެއަރ ގަޑިތަކުގައި އޮންއެއަރ އޮޕަރޭޓް ކުރުމާއި ނިވްސް އަދި ޕްރޮގްރާމް ޝޫޓިންގތަކަށް ދިއުމާއި ލައިވްކުރާ އިވެންޓްތައް ގޮސް ލައިވްކުރުމާއި، އިކްއިޕްމެންޓް ރޭވުމާއި، އިކްއިޕްމެންޓް ދޫކޮށް ބަލައިގަތުމާއި އެޓޮލްސް ޓްރާންސްމިޝަން ނެޓްވޯކް ބެލެހެއްޓުމާއި، މުޅި ރާއްޖެއަށް ފޮނުވުނު ޓެރެސްޓްރިއަލް ނެޓްވޯކްގެ މަސައްކަތް ބެލެހެއްޓުމާއި ޑިސްޕެޗް ޔުނިޓްގެ މަސައްކަތް ބެލެހެއްޓުން ހިމެނެއެވެ.