ފިއުލް ސަޕްލައިސް މޯލްޑިވްސް، އެފްއެސްއެމްގެ ހުޅުމާލެ ޕެޓްރޯލް ޝެޑުގެ ޚިދުމަތް ވަރަށް އަވަހަށް 24 ގަޑިއިރަށް ބަދަލުކުރާނެ ކަމަށް އެކުންފުނިން ބުނެފިއެވެ. ހުޅުމާލެއަށް އިތުރުވަމުންދާ އާބާދީއާއެކު ޕެޓްރޯލް ޝެޑްތަކަށް އޮންނަ ޑިމާންޑްވެސް އަންނީ އިތުރުވަމުންނެވެ.
ފިއުސް ސަޕްލައިސް މޯލްޑިވްސް، ވަނީ މިމަހުގެ 18 ވަނަ ދުވަހު ރީބްރޭންޑްކޮށްފައެވެ. 21 އަހަރަށްފަހު އެފްއެސްއެމް ރީބްރޭންޑްކުރީ ވަކި ލަނޑުދަނޑިތަކެއް ކަނޑައަޅައި އެ ކަންކަން ހާސިލްކުރުމަށް ކަމަށް އެ ކުންފުނިން ބުނެއެވެ. އެފްއެސްއެމްއިން ބުނީ ވިސްނުން ހުރީ ލޯގޯ ބަދަލުކޮށްލާފައި ނިންމާލަން ނޫންކަމަށާއި، ކަސްޓަމަރުންނަށް މިހާރު ދޭ ޚިދުމަތް މިހާރަށްވުރެ ރަނގަޅުކޮށް ޒަމާނާއި އެއްގޮތައް ދިނުމަކީ އެ ކުންފުނިން އިސްކަންދޭކަމެއްކަމަށެވެ. އެގޮތުން ކުރިއަށްއޮތް ތަނުގައި ކުންފުނީގެ މަސައްކަތުން އެކަން ފެންނަމުންދާނެކަން ވަނީ ފާހަގަކޮށްފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެފްއެސްއެމްގެ ސޭލްސް އެންޑް މާކެޓިންގ ހެޑް، އަޙްމަދު ރިފްއަތު، ވިދާޅުވީ، ކުންފުނީގެ މަސައްކަތްތަކަށް ގެންނަމުންދާ ބަދަލުގެ ދަށުން ވަރަށް އަވަހަށް ހުޅުމާލޭ ޕެޓްރޯޑް ޝެޑްވެސް 24 ގަޑިއިރަށް ބަދަލުކުމަށް ހަމަޖެހިފައިވާކަމަށެވެ.
"މިހާރުވެސް އަޅުގަނޑުމެންގެ 1 ޝެޑް 24 އަވަރސް އޮޕަރޭޓްކުރަމުންދާނެ މާލޭގައި. މެނޭޖްމަންޓްގެ ވިސްނުން އެބަހުރި އެ ސަރވިސް 24 އަވަރސް ހުޅުމާލެއިންވެސް ދިނުމަށް. ވަރަށް އަވަހަށް އިރާދަކުރެއްވިއްޔާ ހުޅުމާލެވެސް 24 އަވަރސްއަށް ބަދަލުކޮށްލާނަން." ރިފްއަތު ވިދާޅުވިއެވެ.
އެފްއެސްއެމްގެ ޝެޑްތަކުގެ ތެރެއިން މިހާރު 24 ގަޑިއިރު އޮޕަރޭޓްކުރަމުންދަނީ މާލެ ސްޓެލްކޯ ކައިރީގައި ހުންނަ ޝެޑް އެކަންޏެވެ. ރިފްއަތު ވިދާޅުވީ، ޝެޑްތަކުގައި މިހާރު ދިމާވާ އެންމެ ބޮޑު މައްސަލައަކީ ޖާގައިގެ ދަތިކަންކަމަށެވެ. ޚާއްސަކޮށް ރޭގަނޑު ބަންދުކުރާ ވަގުތާއި އޮފީސް ނިމޭ ވަގުތުގައި ކިޔޫތައް ވަރަށް ދިގުވާކަމަށެވެ. މާލޭ އިންޑަސްޓްރިއަލް ވިލެޖްގައި އެފްއެސްއެމްއިން އަލަށް ހަދާ ޝެޑް ހުޅުވުމާއިއެކު މިކަމަށް ހައްލު ލިބިގެންދާނެކަމަށް އޭނާ ވިދާޅުވިއެވެ.
" މިހާރު އަޅުގަނޑުމެންނަށް ލިބިފައިން އެންމެ ރަނގަޅު ފުރުސަތަކީ މާލޭ އިންޑަސްޓްރިއަލް ވިލެޖް ސަރަހައްދުގައި. ވަރަށް އަވަހަށް އިރާދަކުރެއްވިއްޔާ ވަރަށް ޒަމާނީ ފެންވަރެއްގެ ޝެޑެއް އެޅިގެންދާނެ. އެ ޝެޑުން އެއްފަހަރާ 16 ސައިކަލާއި 8 ކާރަށް ތެލުގެ ޚިދުމަތް ދެވޭނެ. އެހެންވީމަ އަޅުގަނޑުމެން މިބަލަނީ މިހާރު މިދިމާވާ ކިޔުގެ މައްސަލައަށްވެސް ހައްލު ލިބިގެންދާނެ ކަމަށް." ރިފްއަތު ވިދާޅުވިއެވެ.
އެފްއެސްއެމްއަކީ އެސްޓީއޯއާއި ވަރަ މޯލްޑިވްސްގެ ހިއްސާދާރުންގެ މައްޗަށް 2000 ވަނަ އަހަރު ވުޖޫދަށް އައި ކުންފުންޏެކެވެ. މިއީ ރާއްޖޭގައި އެންމެ ފުޅާދާއިރާއެއްގައި ތެޔޮ ފޯރުކޮށްދޭ ކުންފުންޏެވެ. މިކުންފުނިން އަންނަނީ މީހުން ދިރިއުޅޭ 97 އިންސައްތަ ރަށަށް ތެޔޮ ފޯރުކޮށްދެމުންނެވެ.