އެންޓި-ކޮރަޕްޝަން ކޮމިޝަން (އޭސީސީ)ގެ މެމްބަރުން ވަކިކުރުމުގެ މަސައްކަތް ކުރިއަށްގެންދިއުމަށް މަޖިލީހުގެ ތަޅުމުން މިނިވަން މުއައްސަސާތަކާބެހޭ ކޮމިޓީއެއް ފޮނުވައިފިއެވެ.
މިއަދު ބޭއްވި ދައުރުން ބޭރު ޖަލްސާގައި ވަނީ އޭސީސީގެ މެމްބަރުން ވަކި ކުރުމަށްޓަކައި، މިނިވަން މުވައްސަސާތަކާއި ބެހޭ ކޮމިޓީން އެކުލަވާލި އޮޑިޓް ރިޕޯޓް އިއްވާފައެވެ. ރިޕޯޓުގައި މައިގަނޑު ގޮތެއްގައި ފާހަގަކޮށްފައިވަނީ އޭސީސީގެ މެމްބަރުންގެ މަޤާމުގެ މަސްއޫލިއްޔާތު އަދާކުރުމަށް އެކަށީގެންވާ މަސައްކަތް ކޮށްފައި ނުވާކަމަށާއި، ޒިންމާ އަދާ ނުކުރަމުން ނުދާކަމަށެވެ.
މަޖިލީހުގެ ގަވާއިދުވާގޮތުން މިނިވަން ކޮމިޝަންތަކުގެ މެމްބަރުން ވަކި ކުރުމުގެ މަސައްކަތް ކޮމިޓީން ބަލަންޖެހޭ ކަންކަން ބެލުމަށްފަހު، މަޖިލީހުގެ ތަޅުމަށް އެމައްސަލައެއް ހުށަހެޅުމުން، ކޮމިޝަންގެ މެމްބަރުން ވަކި ކުރުމުގެ މަސައްކަތް ކުރުމަށް ތަޅުމުން ކޮމިޓީއަށް ފޮނުވަންޖެހެއެވެ. އަދި ކޮމިޓީއަށް ފޮނުވުމަށްފަހު ވަކި ކުރަން ކަނޑައެޅިފައިވާ މެމްބަރުންނާއި އަނގަބަހުން ނުވަތަ ލިޔުމުންވެސް އިންޓަރވިއު ކުރުމަށްފަހު ކޮމެޓީއަށް ވަކިކުރަން ފެންނަ މެމްބަރުން ކަނޑައެޅިގެންދާނެކަމަށްވެސް ޤަވާއިދުގައި ބަޔާންކުރެއެވެ. އަދި ކޮމިޓީން އެކުލަވާލާ ރިޕޯޓް މަޖިލީހުގެ މެމްބަރުންނަށް ފޮނުވުމަށްފަހު، މެމްބަރުންނަށް 3 ދުވަހުގެ މުއްދަތެއް ދިނުމަށްފަހު އެމައްސަލަ މަޖިލީޙުގެ ތަޅުމަށް ގެނެސް ތަޅުމުގައި 2 ގަޑިއިރުގެ ބަހުސްއެއް ކުރުމަށްފަހު، މެމްބަރުން ވަކިކުރުމާއިމެދު ވޯޓަކަށް އެހިގެންދާނެކަމަށްވެސް ޤަވާއިދުގައި ބުނެއެވެ.
އޭސީސީގެ މެންބަރުން ވަކިކުރުމުގެ މަސައްކަތް މަޖިލީހުން ފަށާފައިވަނިކޮށް އެ ކޮމިޝަންގެ ދެ މެމްބަރަކު ވަނީ މަޤާމުން އިސްތިއުފާ ދެއްވާފައެވެ. އެއީ ކޮމިޝަންގެ މެމްބަރު އަލީ އަޝްރަފާއި، އިބްރާހީމް ޝަކީލްއެވެ. އޭސީސީގެ 5 މެމްބަރުންގެ ތެރެއިން މިހާރު ކޮމިޝަންގައި ތިއްބެވީ، އެ ކޮމިޝަންގެ ރައީސް މަރިޔަމް ޝިއުނާ، ނައިބް ރައީސް ފާތުމަތު އަނޫލާ އަދި މެމްބަރު ޢާއިޝަތު ޢަބްދުﷲއެވެ. އެހެންކަމުން ކޮމެޓީން މަސައްކަތް ކުރާނީ އެ ތިން މެމްބަރުން ވަކިކުރުމާއި ގުޅޭ މައްސަލަ ދިރާސާކޮށް، ގޮތެއް ނިންމުމަށެވެ. މިއަދުގެ ޖަލްސާގައި ކުރަން އިތުރު މަސައްކަތެއް ނެތުމުން ޖަލްސާ ވަނީ ނިންމާލާފައެވެ.
އެމްޑީޕީގެ އަޣްލަބިއްޔަތު އޮތް މަޖިލީހުން އައްޔަންކުރި އޭސީސީގެ މެންބަރުން މަޤާމުން ވަކިކުރުމަށް ނިންމުމަކީ މިނިވަން މުއައްސަސާތަކަށް ބިރުދެއްކުންކަމަށް ބުނެ އިދިކޮޅުން ވަނީ މި ޖަލްސާ ބޮއިކޮޓްކޮށްފައެވެ.
އޭސީސީއަށް މަޖިލީހުން އަމާޒުކޮށްފައިވާ ފާޑުކިޔުންތަކާއި ގުޅޭގޮތުން އޭސީސީގެ ރައީސް މަރްޔަމް ޝިއުނާ ވިދާޅުވެފައިވަނީ އޭސީސީއަށް އެކަށީގެންވާ ގޮތެއްގައި މަސައްކަތް ކުރެވޭނީ ނިޒާމީ ބޮޑެތި ބަދަލުތަކެއް ގެނެސްގެން ކަމަށެވެ. ޝިއުނާ ވިދާޅުވީ އޭނާ ނޫން މީހަކު އެމަގާމަށް އަޔަސް އޭސީސީއަށް އެކަށީގެންވާ ނަތީޖާ ނެރެވޭނީ މަސައްކަތް ކުރާނެ ޖާގައާއި ވަސީލަތްތަކާއި ނިޒާމީ ބަދަލުތަކެއް އައިސްގެން ކަމަށެވެ.