އަންނަ އަހަރު އޭޝިއާ ސަރަހައްދުގައި އެންމެ ބާރަށް ކުރިއަރާ އިޤްތިސާދަކަށް ރާއްޖެ ވާނެކަމަށް އިންޓަރނޭޝަނަލް މަނިޓަރީ ފަންޑް، އައިއެމްއެފްއިން ލަފާކޮށްފިއެވެ.
އައިއެމްއެފްއިން މިކަން ހާމަކޮށްފައިވަނީ ދުނިޔޭގެ އިޤްތިޞާދާ ގުޅޭގޮތުން ނެރެފައިވާ ތަފާސް ހިސާބު ރިޕޯޓެއްގައެވެ.
ކޯވިޑް19އާއެކު މުޅި ދުނިޔޭގެ އިޤްތިސާދަށްވެސް ވަނީ ހީނުކުރާ ވަރުގެ ބޮޑު ލޮޅުމެއް އައިސްފައެވެ. އިޤްތިސާދީ މިބޮޑު އަޑިގަނޑުން އަރައިގަތުމަށް ދުނިޔޭގެ ހުރިހާ ޤައުމަކުންވެސް ދަނީ މަސައްކަތްކުރަމުންނެވެ. ކޯވިޑާއިއެކު ރާއްޖެއަކީ ކުރިއަރަމުން އަންނަ ޤައުމުތަކުގެ ތެރެއިން އިޤްތިސާދަށް އެންމެ ބޮޑު އަސަރެއްކުރި އެއް ޤައުމެވެ. ނަމަވެސް މިހާރު ރާއްޖޭގެ އިޤްތިސާދު އަންނަނީ މަޑުމަޑުން ރަނގަޅުވަމުންނެވެ.
އިންޓަނޭޝަނަލް މަނިޓަރީ ފަންޑުން ވަނީ 2022 ވަނަ އަހަރު އޭޝިއާ ސަރަހައްދުން އިޤްތިސާދު ކުރިއަރާނެ ޤައުމުތަކާއި މިންވަރު އަންދާޒާކޮށްފައެވެ. މި ލިސްޓުގައި ރާއްޖެ ހިމެނެނީ އިޤްތިސާދު އެންމެ އަވަހަށް ކުރިއަރާނެ 2 ވަނަ ޤައުމުގެ ގޮތުގައެވެ. އެއީ %13.21 އާއިއެކުގައެވެ. ރާއްޖެއާއި އަވަށްޓެރި އެހެން ބައެއް ޤައުމުތައް އުޅެނީ މި ލިސްޓުގައި ރާއްޖެއަށްވުރެ ފަހަތުގައެވެ. އިންޑިއާ ހިމެނެނީ %8.52 އާއިއެކު 4 ވަނައިގައެވެ. ބަންގްލަދޭޝް %6.54 އާއިއެކު 7 ވަނައިގައި އުޅޭއިރު، %6 އާއިއެކު މެލޭޝިއާ އުޅެނީ 9 ވަނައިގައެވެ. އަދި %5.94 އާއިއެކު އިންޑޮނޭޝިއާ އުޅެނީ 10 ވަނައިގައެވެ. ލިސްޓުގެ 1 ވަނައިގައި އުޅޭނީ މަކާއޯއެވެ. އެއީ %37.6 އާއިއެކުގައެވެ.
ކޯވިޑަށްފަހު އެންމެ ބާރަށް ކުރިއަރަމުންދާ އިޤްތިސާދުތަކުގެ ތެރޭގައި ރާއްޖެ ހިމެނޭކަމަށް ފިނޭންސް މިނިސްޓަރ އިބްރާޙީމް އަމީރުވެސް ވަނީ މީގެކުރިން ފާހަގަކުރައްވާފައެެވެ. މިނިސްޓަރ ވިދާޅުވީ ރާއްޖެއިން މިފަދަ ކުރިއެރުމެއް ހޯދުމަށް މަގުފަހިވެގެން ދިޔައީ ސަރުކާރުން ކޯވިޑާއި ދެކޮޅަށް އެޅި ހަރުދަނާ ފިޔަވަޅުތަކުގެ ސަބަބުން ކަމަށެވެ. އެގޮތުން ރައްޔިތުންނާއި ވިޔަފާރިތަކަށް އެހީވުމަށް ކުރި މަސައްކަތްތަކުގެ ހެޔޮ ނަތީޖާ މިހާރު ފެންނަމުންދާކަމަށް މިނިސްޓަރ އަމީރު ވިދާޅުވިއެވެ.
ކޯވިޑަށްފަހު އެންމެ ބާރަށް ކުރިއަރަމުންއަންނަ އިޤްތިސާދުގެ ތެރޭގައި ރާއްޖެ ހިމެނޭއިރު މުޅި ދުނިޔެއިންވެސް އެންމެ ފުރަތަމަ ފަތުރުވެރިންނަށް ޤައުމު ހުޅުވާލާ ރައްކާތެރިކަމާއިއެކު ފަތުރުވެރިކަން ކުރަމުން އަންނަ ނަމޫނާ ޤައުމަކަށް ރާއްޖެ ވަނީ ވެފައެވެ. އަދި މިހާރު ރާއްޖެއަށް އަންނަ ފަތުރުވެރިންގެ އަދަދު ހުރީ ކޯވިޑް19ގެ ކުރިއާއި އަޅާބަލާއިރު ވަރަށް ބޮޑަށްވެސް އިތުރުވެފައެވެ. އަދި މިކަމުގެ ސަބަބުން ރާއްޖެއަށް މިހާރު ލިބެމުންދާ އާމްދަނީވެސް ދަނީ އިތުރުވަމުންނެވެ.