މިއަހަރުގެ ނޮވެމްބަރުމަހު ރާއްޖެއަށް އިމްޕޯޓްކުރި މުދަލުގެ އަގު 2020 ވަނަ އަހަރުގެ ނޮވެމްބަރުމަހާ އަޅާބަލާއިރު %94 އިތުރުވެއްޖެއެވެ.
މޯލްޑިވްސް ކަސްޓަމްސް ސަރވިސްގެ ތަފާސް ހިސާބުތައް ދައްކާގޮތުން 2020 ވަނަ އަހަރުގެ ނޮވެމްބަރުމަހު ދިވެހިރާއްޖެއަށް 2.1 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ ނޮވެމްބަރުމަހު ރާއްޖެއަށް 4 ބިލިއަން ރުފިޔާގެ މުދާ ވަނީ އިމްޕޯޓްކޮށްފައެވެ.
ރާއްޖެއަށް އިމްޕޯޓްކުރި މުދާ ނޮވެމްބަރުމަހު އިތުރުވެފައިވާއިރު ދައުލަތައް ލިބުނު އާމްދަނީވެސް ވަނީ އިތުރުވެފައެވެ. 2020 ވަނަ އަހަރުގެ ނޮވެމްބަރ މަހާއި އަޅާބަލާއިރު މިއަހަރުގެ ނޮވެމްބަރ މަހު ދައުލަތައް ލިބުނު އާމްދަނީ ވަނީ %17 އިތުރުވެފައެވެ. 2020 ވަނަ އަހަރު އިމްޕޯޓް އެކްސްޕޯޓުން ދައުލަތައް 276 މިލިއަން ރުފިޔާ ލިބިފައިވާއިރު މިއަހަރުގެ ނޮވެމްބަރ މަހު ލިބިފައިވަނީ 322 މިލިއަން ރުފިޔާއެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ، އޮމާން، އަދި ޔޫއޭއީއާއި އިންޑިއާއެވެ. ޗައިނާއިން 603 މިލިއަން ރުފިޔާގެ މުދާ އެތެރެކޮށްފައިވާއިރު، އޮމާންއިން 529 މިލިއަން ރުފިޔާގެ މުދާ އަދި ޔޫއޭއީއިން 463 މިލިއަން ރުފިޔާގެ މުދާ ވަނީ އެތެރެކޮށްފައެވެ.
ރާއްޖެއިން އެންމެ ގިނައިން މުދާ އެކްސްޕޯޓްކޮށްފައިވާ 3 ޤައުމުގެ ތެރޭގައި ހިމެނެނީ ތައިލޭންޑް، ޖަރުމަނުވިލާތް، އަދި އިނގިރޭސިވިލާތް ހިމެނެއެވެ. އެގޮތުން ތައިލޭންޑަށް %38 މުދާ، ޖަރުމަނުވިލާތުން %14 އަދި އިނގިރޭސިވިލާތުން %12 މުދާ ވަނީ އެކްސްޕޯޓްކޮށްފައެވެ.
ނޮވެމްބަރުމަހު ޕްރޮސެސްކުރެވުނު ޑިކްލަރޭޝަން މިއަހަރުގެ ނޮވެމްބަރުމަހު ވަނީ އިތުރުވެފައެވެ. 2020 ވަނަ އަހަރުގެ ނޮވެމްބަރ މަހު ޕްރޮސެސްކުރި ޑިކްރަލޭޝަންގެ އަދަދަކީ 12،434 އެވެ. މިއަހަރުގެ ނޮވެމްބަރ މަހު މިއަދަދު އުޅެނީ 20،524 ގައެވެ.