މޯލްޑިވްސް ޕޯޓްސް ލިމިޓެޑް، އެމްޕީއެލްއިން ސްކޫލްތަކުގައި ބޭނުން ކުރުމަށް ކޮމްޕިއުޓަރު ސިސްޓަމްތަކެއް ހަދިޔާކޮށްފިއެވެ.
އެމްޕީއެލްގެ ކޯޕަރޭޓް ސޯޝަލް ރެސްޕޮންސިބިލިޓީ(ސީއެސްއާރް)ގެ ދަށުން ސްކޫލްތަކުގައި ބޭނުން ކުރުމަށް މިއަދު ހަދިޔާކޮށްފައިވަނީ 5 ކޮމްޕިއުޓަރ ސިސްޓަމެވެ. މިއަދު މެންދުރު އެމްޕީއެލްގައި ބޭއްވި ރަސްމިއްޔާތެއްގައި، މިސިސްޓަމްތައް އެޑިއުކޭޝަން މިނިސްޓްރީއާ ހަވާލުކޮށްދެއްވީ އެމްޕީއެލްގެ ސީއީއޯ ޝާހިދު އަލީއެވެ. އެޑިއުކޭޝަން މިނިސްޓްރީގެ ފަރާތުން މިތަކެއްޗާ ހަވާލުވެވަޑައިގަތީ މިނިސްޓަރ އޮފް އެޑިއުކޭޝަން ޑރ.އައިޝަތު އަލީއެވެ.
ކޮމްޕިއުޓަރ ސިސްޓަމްތައް ހަދިޔާ ކުރުމަށްފަހު މީޑިޔާއަށް މަޢުލޫމާތު ދެއްވަމުން އެމްޕީއެލްގެ ސީއީއޯ ޝާހިދު އަލީގެ ވިދާޅުވީ އެކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން ތައުލީމީ ދާއިރާއަށް އެހީތެރިކަން އަބަދުވެސް ފޯރުކޮށްދެމުން އަންނަކަމަށާއި. ކުރިމަގުގައިވެސް މިއެހީތެރިކަން ފޯރުކޮށް ދެއްވަމުން ގެންދަވާނެ ކަމަށެވެ.
" އާންމުގޮތެއްގައި އަޅުގަނޑުމެންނަށް، އަޅުގަނޑުމެންގެ ބަޖެޓު ތަންދިން މިންވަރަކުން ސްކޫލްތަކުގެ ބޭނުންތަކަށް އަޅުގަނޑުމެންނަށް ކޮށްދެވުނު ކަންތައްތަކެއް ކޮށްދެން. ކުރިމަގުގަވެސް ސީއެސްއާރު ގެ ދަށުން އަޅުގަނޑުމެން ތަޢުލީމީ ދާއިރާއަށް ކޮށްދެވުނު އެހީތަކެއް ކޮށްދޭނަން." އެމްޕީއެލްގެ ސީއީއޯ ޝާހިދު އަލީ ވިދާޅުވިއެވެ.
އެޑިއުކޭޝަން މިނިސްޓަރ އާއިޝަތު އަލީ ވިދާޅުވީ އެމްޕީއެލް އަކީ، ތަޢުލީމީ ދާއިރާގެ އެކި ކަންކަމުގައި އެހީތެރިކަން ފޯރުކޮށްދެމުން އަންނަ ފަރާތެއް ކަމަށެވެ. އެގޮތުން އެކި ސްކޫލްތަކަށް ޓީވީ ހަދިޔާކުރުމުގެ އިތުރުން ސްކޫލްތަކުގައި ބެލެނިވެރިންގެ ހިޔާ ހެދުން ފަދަ ކަންކަމުގައި ވެސް އެ ކުންފުނިން ވަނީ އެހީތެރިކަން ފޯރުކޮށްދީފައި ކަމަށް މިނިސްޓަރ ވިދާޅުވިއެވެ.
މިއީ އެމްޕީއެލްއިން އެޑިއުކޭޝަން ދާއިރާއަށް ކޮމްޕިއުޓަރ ސިސްޓަމްތަކެއް ހަދިޔާކުރި ދެވަނަފަހަރުއެވެ.