ޔޫތު މިނިސްޓްރީން ހަފްތާ ބަންދަށް ހާއްސަކޮށްގެން ކުރިއަށްގެންދާ "ހަފްތާ ރެސް" ދ.ކުޑަހުވަދޫގައި ބާއްވައިފިއެވެ. މިއީ މާރުކޭޓަކާއި މުނިފޫހިފިލުވުމުގެ ހަރަކާތްތައް އެކުލެވޭ ގޮތަށް އާއިލީ ހަވީރެއްގެ ގޮތުގައި ބާއްވާ ހަރަކާތެކެވެ.
އެންމެ ފުރަތަމަ މާލޭގައި ބާއްވަން ފެށި ހަފްތާރެސް ޕްރޮގްރާމް ފުޅާކޮށް މިހާރު ޔޫތު މިނިސްޓްރީން ވަނީ މި ހަރަކާތް ރާއްޖޭގެ މީހުން އުޅޭ ރަށްރަށުގައިވެސް ބާއްވަން ފަށާފައެވެ.
މި ހަފްތާގެ "ހަފްތާ ރެސް" ކުރިއަށްގެންގޮސްފައި ވަނީ ދ. ކުޑަހުވަދޫގައެވެ. ކުޑަހުވަދޫގައި ބޭއްވި ހަފްތާރެސް ޕްރޮގްރާމްއަށް ގިނަ އަދަދެއްގެ ބަޔަކު ވަނީ ޒިޔާރަތްކޮށްފައެވެ. އެގޮތުން އެކި އުމުރުފުރާގެ މީހުން ހިމެނެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ޔޫތު މިނިސްޓްރީގެ ޑެޕިއުޓީ މިނިސްޓަރ މުޙައްމަދު ނާސިހް ރަޝީދު ވިދާޅުވީ، ހަފްތާރެސް ޕްރޮގްރާމްގެ އަމާޒަކީ ހުނަރުތައް ދައްކާލުމާއި، އެއްތަނަކުން އެންމެން ބައްދަލުވެ ގުޅުންތައް ބަދަހިކުރުންކަމަށެވެ. ޔޫތު މިނިސްޓްރީން މިހާރު ގިނަ ރަށްރަށެއްގައި ހަފްތާރެސް ކުރިއަށްގެންދެވުނުކަން ފާހަގަކުރައްވައި ނާސިހް ވިދާޅުވީ މި ޕްރޮގްރާމަށް ވަރަށް ރަނގަޅު ތަރުހީބެއް ލިބެމުންދާކަމަށެވެ.
"އަޅުގަނޑުމެންގެ ޒުވާނުން ހޭލުންތެރި ކުރުވުމާއި، ބެލެނިވެރިން ހޭލުންތެރިކުރުވުމާއި، އަދި ޒުވާނުން ކަންކަމުގައި ޖޯޝު އިތުރުކުރުމަށްޓަކައި ކުރަންޖެހޭ ބައެއްކަހަލަ ހަރަކާތްތައް އަޅުގަނޑުމެން މީގެ ތެރޭގައި ހިމެނިގެންދާނެ. ޒުވާނުން އެކަންޏެއް ނޫން ކޮންމެ ރަށެއްގައިވެސް ހަފްތާރެސް އަށް ރައްޔިތުންގެ ވަރަށް ބޮޑު އެއްބާރުލުމެއް ލިބިގެންދޭ" ޑެޕިއުޓީ މިނިސްޓަރ ނާސިހް ވިދާޅުވިއެވެ.
ކުޑަހުވަދޫގައި ބޭއްވި ހަފްތާރެސްއަށް ކުޑަކުދިންނާއި އެކުދިންގެ އާއިލާތައް ޒިޔާރަތްކޮށް މަޖާ ވަގުތުކޮޅެއް ވަނީ ހޭދަކޮށްފައެވެ. ކުޑަހުވަދޫގައި ބޭއްވި ހަފްތާރެސް ޕްރޮގްރާމްގައި ހުނަރު ދައްކާލުމުގެ ހަރަކާތްތަކާއި، ތަކެތި ވިއްކުމަށް ސްޓޯލްތައް ވަނީ ބަހައްޓާފައެވެ. ހަފްތާރެސްގައި ބައިވެރިވި ފަރާތްތަކުން ބުނީ ވިއްކަން ބެހެއްޓި ތަކެއްޗަށް ވަރަށް ބޮޑު ތަރުހީބެއް ލިބިގެންދިޔަކަމަށެވެ.
ހަފްތާރެސް ޕްރޮގްރާމްގެ ތެރެއިން ކުޑަހުވަދޫގައި ވަނީ ހެނދުނުގެ ޙާއްސަ ސައެއްވެސް ބާއްވާފައެވެ. ޔޫތު މިނިސްޓްރީން ވިދާޅުވީ، ދެން ހަފްތާރެސް އޮންނާނީ ލ. އަތޮޅުގައިކަމަށެވެ. ކުޑަހުވަދޫގެ ކުރިން މި ޕްރޮގްރާމް ބާއްވާފައިވަނީ ބ.އޭދަފުށީގައެވެ.