ރެސިޑެންޝަލް ޓްރީޓްމަންޓް ސެންޓަރުތަކާއެކު ރާއްޖޭގައި އެތައް އަހަރެއްވަންދެން ޙައްލުނުވެ ހުރި އިޖުތިމާޢީ ބައެއް މައްސަލަތައް ޙައްލުވެގެންދާނެކަމަށް މިނިސްޓަރ އޮފް ހޯމް އެފެއާޒް އިމްރާން ޢަބްދުالله ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ސަރުކާރުން ހަދާ ފުރަތަމަ ރެސިޑެންޝަލް ޓްރީޓްމަންޓް ސެންޓަރުގެ ބިންގާ އަޅުއްވައިދެއްވުމަށްފަހު ދެއްކެވި ވާހަކަފުޅުގައެވެ. މިސެންޓަރު ހަދަނީ ދ.ކުޑަހުވަދޫގައެވެ.
ރެސިޑެންޝަލް ޓްރީޓްމަންޓް ސެންޓަރަކީ ކުށުގެ ވެއްޓަށް ހުށަހެޅިފައިވާ ކުޑަކުދިންގެ ތެރެއިން މުޖުތަމަޢުން އެކަހެރިކޮށްގެން, އިސްލާޙުކޮށް މުޖުމަތަޢަށް، އެކުދިން އަނބުރާ ނެރުމަށްޓަކައި ބޭނުންވާ ޕްރޮގްރާމްތައް ހިންގުމަށް ސަރުކާރުން ޢިމާރާތްކުރާ ސެންޓަރެކެވެ. މީގެއިތުރުން ކޯޓު އަމުރުގެ ދަށުން ވަކި މުއްދަތަކަށް އެކަހެރިކޮށް ރައްކާތެރިކަން ދޭންޖެހޭ ކުދިން އިސްލާހުކޮށް އަނބުރާ މުޖުތަމައަށް ގެނައުމުގެ އިންތިޒާމްވެސް މިމަރުކަޒުގައި ހަމަޖެހިގެން ދާނެއެވެ.
މިނިސްޓަރ އިމްރާން ވިދާޅުވީ، މިއަދު ރާއްޖޭގެ އެކިކަންކޮޅުތަކަށް ބަލާލާއިރު ޤައުމުގައި ކުރިއަރައި ތަރައްޤީވެ ކުރިއަށްގެންދިއުމުގެ ގިނަ ވިސްނުންތައް އެބަހުރިކަމަށެވެ. ނަމަވެސް އޭގެތެރެއިން އެންމެބޮޑަށް ޤަބޫލުކުރެވެނީ އިޤްތިޞާދީ ތަނަވަސްކަމާއި, މާލީ ފުދުންތެރިކަމާއި ތިޔާގިކަން އޮތުން އެއީ ހިތްހަމަޖެހުމާއި އުފާ ލިބުމުގެ އެންމެ މުހިއްމު ސަބަބެއްކަމުގައި ކަމަށެވެ.
މިއަދު މިކުރިމަތިލާ މައްސަލަތަކަށް ހައްލު ހޯދޭނީ ހުރިހާ އެންމެން އެކުވެ, ގުޅި ލާމެހިގެންކަމަށާ، ރާއްޖޭގެ ވީރާނާވެ ހަލާކުވެފައިވާ އިޖުތިމާއީ ވެށި އަނބުރާ ރަނގަޅު ޙާލަތަކަށް ރުޖޫއަކުރެވޭނީ ސަރުކާރާއި ރައްޔިތުންނާއި ޖަމްޢިއްޔާ ޖަމާއަތްތަކާއި, މުޅި ދައުލަތުގައި ހިމެނޭ ހުރިހާ އެންމެން އެކުވެ ގުޅި ލާމެހިގެންކަން މިނިސްޓަރ ފާހަގަކުރެއްވިއެވެ.
"ހަރުދަނާ މުޖުތަމަޢެއް ބިނާކުރުމަށް އެންމެ ފުރަތަމަ ބޭނުންވަނީ ރަނގަޅު ފަރުދެއް ބިނާކުރުން. އެއަށްފަހު އެފަރުދުގެ މައްޗަށް ބިނާވާ ހެޔޮލަފާ ރަނގަޅު ޢާއިލާއެއް ބިނާކުރުން. އެއާއެކު ބަދަހި ދުޅަހެޔޮ އިޖުތިމާޢީ ރަނގަޅު މުޖުތަމައެއް ބިނާކުރުން. އޭގެ މައްޗަށް ޤައުމެއް ބިނާވެގެންދާނީ." މިނިސްޓަރ ވިދާޅުވިއެވެ.
ދެބުރި ޢިމާރާތެއްގެ ގޮތުގައި ދ.ކުޑަހުވަދޫގައި ޢިމާރާތްކުރާ ސެންޓަރުގެ މަސައްކަތް ޙަވާލުކޮށްފައިވަނީ "ވީ.އަވާ، އިންވެސްޓްމަންޓް ޕްރައިވެޓް ލިމިޓެޑް"އާ އެވެ. މަސައްކަތް ޙަަވާލުކޮށްފައިވަނީ 450 ދުވަހުގެ ތެރޭގައި ނިންމާގޮތަށެވެ. މިއީ އެކާވީސް މިލިއަން ހަލައްކަ އަށްވުރެ ގިނަ ރުފިޔާގެ މަޝްރޫޢެކެވެ.
ކުޑަހުވަދޫގައި ޢިމާރާތްކުރާ ރެސިޑެންޝަލް ޓްރީޓްމަންޓް ސެންޓަރުގެ މަސައްކަތް ހަވާލުކުރުމުގެ އެއްބަސްވުމުގައި މިނިސްޓްރީ އޮފް ހޯމް އެފެއާޒާއި ވީ. އަވާ އިންވެސްޓްމަންޓް ޕްރައިވެޓް ލިމިޓެޑާ ދެމެދު ސޮއިކުރީ މިދިޔަ ސެޕްޓެމްބަރ 27ވަނަ ދުވަހުއެވެ.