އިނގިރޭސިވިލާތުގެ ކޯވިޑް "ރެޑް ލިސްޓު"ގައި މިހާރު ރާއްޖެ އޮންނަންޖެހޭ ސަބަބެއް ނެތްކަމަށް ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ. ފަރަހަނާޒް ފައިސަލް ވިދާޅުވެއްޖެއެވެ.
އިނގިރޭސިވިލާތުގެ ކޯވިޑް ރެޑް ލިސްޓަށް ރާއްޖެ ހިމަނާފައިވާއިރު، އެކަމުގެ ސަބަބުން ރާއްޖެއަށް އިނގިރޭސި ފަތުުވެރިން އައުމަށް ވަނީ ދަތިތަކެއް ކުރިމަތިވެފައެވެ. އަދި އިނގިރޭސިވިލާތުގެ ކޯވިޑް ރެޑް ލިސްޓުގައި ރާއްޖެ ހިމަނާފައި އޮތް ސަބަބަކީ، ރާއްޖޭގެ ޖީނޯމް ސީކުއެންސިންގ ޑޭޓާ އެއްކުރެވިފައިނުވާތީކަމަށްވެސް ބައެއް ފަރާތްތަކުން ދިޔައީ ބުނަމުންނެވެ.
އިނގިރޭސިވިލާތަށް ރާއްޖެއިން ކަނޑައަޅާފައި ހުންނަވާ ސަފީރު ޑރ. ފަރަހަނާޒް ފައިސަލް ވިދާޅުވީ، އިނގިރޭސިވިލާތުން ކަނޑައަޅާފައިވާ ގޮތަށް ޖީނޯމް ސީކުއެންސިންގ ޑޭޓާ އަޕްޑޭޓްކޮށްފައިވާކަމަށެވެ. އަދި ރާއްޖެއިން ކޯވިޑް ކޭސްތައް ފެންނަ މިންވަރު ވަރަށް ބޮޑަށް މަދުވެފައިވާއިރު، ރާއްޖެއިން ވެކްސިން ފުރިހަމަކުރާ މީހުންގެ އަދަދު ވަރަށް ބޮޑަށް އިތުރުވެފައިވާއިރު، އިނގިރޭސިވިލާތުގެ ރެޑްލިސްޓުގައި ރާއްޖެ އިތުރަށް އޮންނަންޖެހޭ ސަބަބެއް މިހާރު ނެތްކަމަށް ފަރަހަނާޒް ވިދާޅުވިއެވެ.
GISAID website has now been updated with Genome sequencing data as required by the UK. I believe there is no longer a valid reason for Maldives to remain on the red list. We also have low case numbers and extremely high vaccine rates compared to most countries. pic.twitter.com/Owsk5ZSAWy
— Farah Faizal ??? (@DrFarahFaizal) August 21, 2021
އިނގިރޭސި ސަރުކާރުން ކޯވިޑުން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން އެ ޤައުމުން ވަނީ ރެޑް، އެމްބަރ އަދި ގްރީން ލިސްޓެއް އެކުލަވާލާފައެވެ.
މީގެތެރެއިން ފިޔަވަޅުތައް އެންމެ ހަރުކަށިކޮށްފައިވަނީ ރެޑް ލިސްޓުގައި ހިމެނޭ ޤައުމުތަކަށެވެ. ރެޑް ލިސްޓުގައި ހިމެނޭ ޤައުމުތަކުން އިނގިރޭސިވިލާތަށް ދަތުރުކުރެވޭނީ އިނގިރޭސި ރައްޔިތުންނާއި އައިރިޝް ރައްޔިތުންގެ އިތުރުން، އިނގިރޭސިވިލާތުގައި ދިރިއުޅޭ އެހެން ޤައުމުތަކުގެ ރައްޔިތުންނަށް އެކަންޏެވެ. އަދި ރެޑް ލިސްޓުގައި ހިމެނޭ ޤައުމަކަށް އިނގިރޭސިވިލާތަށް ދަތުރުކުރާނަމަ 10 ދުވަހުގެ ކަރަންޓީނެއް ފުރިހަމަކުރަންޖެހެއެވެ.
އިނގިރޭސިވިލާތަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. 2019 ވަނަ އިނގިރޭސިވިލާތް ހިމެނެނީ ރާއްޖެއަށް 5 ވަނައަށް އެންމެ ގިނަ ފަތުރުވެރިން އައި ޤައުމެވެ. 2020 ވަނަ އަހަރު 3 ވަނައިގައި އޮތުމަށްފަހު މިއަހަރުގެ މިހާތަނަށް އިނގިރޭސިވިލާތް ހިމެނެނީ 9 ވަނަ އަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ. އެއީ 17،031 ފަތުރުވެރިންނެވެ.