ކާބޯތަކެތީގެ ނިޒާމްތައް އިސްލާހުކުރުމުގައި ޒުވާނުންގެ ބައިވެރިވުން ބޭނުންވޭ: މިނިސްޓަރ ހުސައިން
ކާބޯތަކެތީގެ ނިޒާމްތައް އިސްލާހުކުރުމުގައި ޒުވާނުންގެ ބައިވެރިވުން ބޭނުންވާކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރ ހުސައިން ރަޝީދު މިހެން ވިދާޅުވީ، ޒުވާނުންގެ ދުވަސް ފާހަގަކުރުމަށް އއ. ރަސްދޫގައި ބޭއްވި ޖަލްސާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ.
މިއަހަރުގެ ޒުވާނުންގެ ދުވަހުގެ ޝިއާރަކީ "ޓްރާންސްފޯމިންގ ފުޑް ސިސްޓަމް" ނުވަތަ "ކާބޯތަކެތީގެ ނިޒާމްތައް އިސްލާހުކުރުން"މެވެ. ޖަލްސާގައި ވާހަކަދައްކަވަމުން މިނިސްޓަރ ޑރ. ހުސައިން ރަޝީދު ހަސަން ވިދާޅުވީ، މިއަހަރުގެ އޭޕްރީލްމަހު އދ ގެ އިޤްތިސާދީ އަދި އިޖްތިމާއީ ކައުންސިލްގެ ޔޫތު ފޯރަމްގައި ޒުވާނުންނަށް ކުރިމަތިވެފައިވާ ގޮންޖެހުންތަކާއި ބެހޭގޮތުން ވާހަކަދައްކާފައިވާކަމަށެވެ.
ކާބޯތަކެތީގެ ނިޒާމަށް ދިމާވާ ގޮންޖެހުންތައް ހައްލުކުރުމަށް ޒުވާނުންގެ ބައިވެރިވުން ބޭނުންވާކަމަށް ފޯރަމްގައި ފާހަގަކޮށްފައިވާކަމަށް މިނިސްޓަރ ވިދާޅުވިއެވެ. އެގޮތުން މިއަހަރުގެ ޒުވާނުންގެ ދުވަހުގެ މަޤްސަދަކީ ދުނިޔޭގެ ކާބޯތަކެތީގެ ނިޒާމްތައް މިހާރު ހުރިގޮތް ނޫން އެހެންގޮތަކަށް ބަދަލުކުރަން ޖެހޭކަން އދ އިން ފާހަގަކޮށްފައިވާތީ އެކަން އެމަގަށް ގެންދިއުމަށް އަދި އިންސާނުންގެ ސިއްހަތާއި ދުނިޔޭގެ ރައްކާތެރިކަމަށް ކާބޯތަކެތީގެ ނިޒާމްތައް އިސްލާހުކުރުމުގައި ޒުވާނުންގެ ބައިވެރިވުން ހޯދުންކަން މިނިސްޓަރ ފާހަގަކުރެއްވިއެވެ.
"މިއަދު މި ޖަލްސާ މި ބާއްވަނީ ޔޫތު ފޯރަމުން ނިންމި ގޮތުގެ މަތިން ދުނިޔޭގެ ކާބޯތަކެތީގެ ނިޒާމްތަކަށް ދިމާވާ މައްސަލަތައް ހައްލުކުރުމުގެ ނިޔަތުގައި. އެކަމުގައި ޒުވާނުންގެ އެއްބާރުލުން ހޯދުމަށްޓަކައި. ޒުވާނުންގެ ފޯރަމުން ނިންމި ކަންތައްކަކީ ހަމަހަމަ ކާބޯތަކެތީގެ ނިޒާމެއް ދުނިޔެއަށް ހޯދައިދިނުމަކީ ވަރަށް މުހިންމު ކަމެއްކަމަށް. މީގެއިތުރުން ސިއްހީގޮތުން އަދި ތިމާވެށީގެ ގޮތުން ބަލާއިރު އެންމެ ރަނގަޅު ކާބޯތަކެއްޗަކީ ކޮބައިކަން ފާހަގަކޮށް އެކަން ތައުލީމާއި މައުލޫމާތުގެ ތެރެއިން އާންމުންނަށް ފޯރުކޮށްދީ ޒުވާނުން އެކަމުގައި އިސް ދައުރެއް އަދާކުރުން. މިއަހަރު ޒުވާނުންގެ ދުވަހުގެ އެއް މަޤްސަދަކީ ޒުވާނުން ހޭލުންތެރިކުރުވުމަށާއި، އެމީހުންގެ ބައިވެރިވުން ހޯދުމަށާއި، އައު ހައްލުތަކާއިއެކު ވިޔަފާރީގެ ހުނަރުވެރިކަމުގެ ޒަރިއްޔާއިން މިއަހަރުގެ ފަހުކޮޅު މިބާއްވާ ދުނިޔޭގެ އިސްވެރިންގެ ކާބޯތަކެއްޗާއިބެހޭ ހާއްސަ ސަމިޓަށް ތައްޔާރުވުމަށްޓަކައި ޒުވާނުންގެ އެއްބާރުލުންވެސް ހޯދުން." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ދުނިޔޭގެ އާބާދީ އެއްދުވަހުން އަނެއްދުވަހަށް އިތުރުވަމުންދާއިރު އެންމެބޮޑަށް ކުރިމަތިލާންޖެހޭނެ ކަންބޮޑުވުމަކީ ރައްކާތެރި ކާބޯތަކެތި ލިބުމުގައި ކުރިމަތިލާންޖެހޭ ގޮންޖެހުންތައްކަމަށެވެ. ސަބަބަކީ އިތުރުވަމުން މިދާ އިންސާނީ އާބާދީއަށް ބޭނުންވާ ރައްކާތެރި ކާބޯތަކެތި ދަނޑުތަކުގައި ހެއްދުމަކީ މިހާރު މިކުރާގޮތަށް ކުރެވޭ ކަމަކަށް ނުވާނެތީކަމަށެވެ. އެހެންކަމުން ކާބޯތަކެތި އުފައްދާ ގޮތަށާއި ކާބޯތަކެތި ފޯރުކޮށްދޭ ގޮތައް ވިސްނައި ރާއްޖޭގައި ހެއްދެން ހުރި ބާވަތްތައް ރާއްޖޭގައި ހެއްދުމަށް މަސައްކަތްކުރަންޖެހޭކަން މިނިސްޓަރ ފާހަގަކުރެއްވިއެވެ.
"ރާއްޖޭގައި ހެއްދެންހުރި ތަކެތި ރާއްޖޭގައި ހައްދަން އެބަޖެހޭ. މިހާރުވެސް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ވަނީ ރާއްޖޭގައި ވާދަވެރިގޮތެއްގައި 17 ބާވަތެއް ހެއްދިދާނެކަމަށް ކަނޑައަޅާފައި. އެހެންކަމުން މިނިސްޓްރީން މިހާރުވެސް ދަނީ އެތަކެތި ރާއްޖޭގައި ހެއްދުމަށް ބާރުއަޅައި އެކަމަށް ކޮށްދެވެންހުރި ކަންތައް ކޮށްދެމުން." މިނިސްޓަރ ވިދާޅުވިއެވެ.
ކާބޯތަކެއްޗާއި ގުޅިގެން ވަކިކަހަލަ ބަލިމަޑުކަން އަންނަކަން ފާހަގަކުރައްވައި މިނިސްޓަރ ވިދާޅުވީ، ސިއްހީގޮތުން ރައްކާތެރި ކާތަކެތި ހައްދައި ބޭނުންކުރަން ޖެހޭކަމަށެވެ. މިނިސްޓަރ ވަނީ މިއަދު ރާއްޖޭގެ ހުރިހާ ދާއިރާއެއްގައިވެސް ޒުވާނުންނަށް ތަމްރީނާއި ތަޖުރިބާ ހޯދުމުގެ ފުރުސަތު ފަހިކޮށްދީފައިވާކަން ފާހަގަކުރައްވާފައެވެ. އަދި މި ފުރުސަތުތަކުގެ ބޭނުން ޒުވާނުން ހިފުމަކީ ސަރުކާރުގެ އެންމެ ބޮޑު އެއް އެދުންކަމަށް މިނިސްޓަރ ވިދާޅުވިއެވެ.
މި ޖަލްސާގައި ތޮއްޑޫ ދާއިރާގެ މަޖިލިސް މެންބަރާއި، މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއާއި ޔޫތު މިނިސްޓްރީއާއި ރަސްދޫ ކައުންސިލްގެ އިސްވެރިން ވަނީ ބައިވެރިވެވަޑައިގަންނަވާފައެވެ.