ބަލްގޭރިއާގައި ރާއްޖޭގެ ފަތުރުވެރިކަން އިތުރަށް ޕްރޮމޯޓުކުރުމާ ގުޅޭގޮތުން މަޝްވަރާކުރައްވައިފި
ފޮރިން މިިނިސްޓަރ އަބްދުﷲ ޝާހިދު ބަލްގޭރިއާގެ ބައެއް ވަޒީރުންނާއި ބައްދަލުކުރައްވައި ރާއްޖޭގެ ފަތުރުވެރިކަން އިތުރަށް ޕްރޮމޯޓުކުރުމާއި ގުޅޭގޮތުން މަޝްވަރާކުރައްވަފިއެވެ.
ބަލްގޭރިއާއަށް ކުރެއްވި ރަސްމީ ދަތުރުފުޅެއްގައި އެޤައުމުގެ ވެރިރަށް ސޯފިއާގައި މިނިސްޓަރ އަބްދުﷲ ޝާހިދު ބަލްގޭރިއާގެ ފޮރިން މިނިސްޓަރ ސްވިޓްލާން ސްޓްއޭވްއާ، އެޤައުމުގެ ޓޫރިޒަމް މިނިސްޓަރ ޑރ. ސްޓެލަ ބަލްޓޯވާއާއެކު ވަކިވަކިން ބޭއްވެވި ބައްދަލުކުރެއްވުންތަކުގައިވަނީ ރާއްޖެއާ ބަލްގޭރިއާ ދެމެދު ގުޅުހުންހުރި ދާއިރާތަކުން އިތުރަށް ގުޅުން ބަދަހިކުރުމަށް މަޝްވަރާކުރައްވާފައެވެ.
މިނިސްޓަރ އަބްދުﷲ ޝާހިދު ބަލްގޭރިއާގެ ފޮރިން މިނިސްޓަރ ސްވިޓްލާން ސްޓްއޭވްއާ އެކު ބޭއްވި ބައްދަލުކުރެއްވުމުގައި ފަތުރުވެރިކަމުގެ ދާއިރާއިން ގުޅިގެން މަސައްކަތްކުރުމަށާއި، ދެ ޤައުމުންވެސް އެއްބަޔަކު އަނެއް ބަޔަކާއެކު އިޤްތިސާދީ ރޮނގުތަކުން ކުރިއަށްދިއުމުގެ މުހިއްމުކަމާ ގުޅޭގޮތުންވަނީ މަޝްވަރާކުރައްވާފައެވެ.
މިނިސްޓަރވަނީ ބަލްގޭރިއާގެ ޑެޕިއުޓީ ފޮރިން މިނިސްޓަރާވެސް ބައްދަލުކުރައްވައި ފަތުރުވެރިކަމުގެ ދާއިރާއާއި ވިޔަފާރީގެ ދާއިރާއިން ދެޤައުމުގެ ގުޅުން އިތުރަށް ބަދަހިކުރެންވެން ހުރި ގޮތްތަކާއި ގުޅޭގޮތުން މަޝްވަރާކުރައްވާފައެވެ. އަދި މި ބައްދަލުވުންތަކުންވެސް ދެ ޤައުމުގެ ދެމެދުގައިވާ ގުޅުމަށް އިތުރު ކުރިއެރުންތައް ލިބިގެންދާނެކަމުގެ ޔަޤީންކަން ލިބިގެންދާ ކަމަށްވެސް މިނިސްޓަރ ޝާހިދުވަނީ ފާހަގަކުރައްވާފައެވެ.
މިނިސްޓަރ ޝާހިދު ބަލްގޭރިއާގެ ޓޫރިޒަމް މިނިސްޓަރ ޑރ. ސްޓެލަ ބަލްޓޯވާއާއެކު ބޭއްވި ބައްދަލުކުރެއްވުމުގައި ވަނީ ދެޤައުމުގެ ދެމެދުގައި ގުޅުން އިތުރަށް ވަރުގަދަކޮށް، އެޤައުމުގައި ރާއްޖެ އިތުރަށް އިޝްތިހާރުކުރުމަށް ހުރި ފުރުސަތުތަކާއި ގުޅޭގޮތުން މަޝްވަރާކުރައްވާފައެވެ. ބަލްގޭރިއާގައި ރާއްޖޭގެ ފަތުރުވެރިކަން ޕްރޮމޯޓުކުރުމާއި ގުޅޭގޮތުން މަޝްވަރާކޮށްފައިވާއިރު، އެޤައުމު ފާހަގަކުރެވެނީ ރާއްޖެއަށް ފަތުރުވެރިން ޒިޔާރަތްކުރުން އިތުރުވަމުންދާ ޤައުމެއްގެ ގޮތުގައެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ކޯވިޑްގެ ކުރިން 2019 ވަނަ އަހަރު ބަލްގޭރިއާއިން ރާއްޖެއަށް 3800އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، 2020ވަނަ އަހަރު ކޯވިޑްގެ ހާލަތާއެކުވެސް އެޤައުމުން ވަނީ 2300އެއްހާ ފަތުރުވެރިން ޒިޔާރަތްކޮށްފައެވެ. އަދި މިއަހަރުގެ މިހާތަނަށް 6300އަށްވުރެ ގިނަ ފަތުރުވެރިން ބަލްގޭރިއާއިން ރާއްޖެއަށްވަނީ ޒިޔާރަތްކޮށްފައެވެ.
މިނިސްޓަރ އަބްދުﷲ ޝާހިދުގެ މި ދަތުރުފުޅުގައި އދ.ގެ 76 ވަނަ އާއްމު މަޖިލީހުގެ ރައީސްގެ ޙައިސިއްޔަތުން އެމަނިކުފާނު އެންމެ ބޮޑު އިސްކަމެއްދެއްވާނެ ކަންތައްތަކާއި، އެމަނިކުފާނުގެ ރިޔާސަތުގެ ތެރެއިން ޙާޞިލުކުރަން ބޭނުންވާ ކަންކަމާއި ގުޅޭގޮތުންވެސް ބަލްގޭރިއާގެ އިސްބައެއް ފަރާތްތަކާއެކު ބޭއްވެވި ބައްދަލުކުރެއްވުންތަކުގައިވަނީ މަޢުލޫމާތު ހިއްސާކުރައްވާފައެވެ.