ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާއާ ގުޅިގެން، މަޖިލީހުން ކުރިއަށްގެންދިޔަ ޕާލިމަންޓްރީ އިންކުއަރީގެ ރިޕޯޓު ސަލާމަތީ ޚިދުމަތްތަކާ ބެހޭ ކޮމިޓީން ފާސްކޮށްފިއެވެ.
ރައްޔިތުންގެ މަޖިލީހުގެ ރައީސަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް މަޖިލީހުގެ 241 ކޮމިޓީން ކުރިއަށް ގެންދިޔަ ޕާލަމެންޓަރީ އިންކުއަރީ ނިންމުމަށް ބޭއްވި ކޮމިޓީ ބައްދަލުވުމުގައި އިންކުއަރީގެ ރިޕޯޓު ފާސްކުރީ ކޮމިޓީގެ ހުރިހާ މެންބަރުންގެ އަޣްލަބިއްޔަތުންނެވެ. އިންކުއަރީގެ މަސައްކަތް ސަލާމަތީ ޚިދުމަތްތަކާބެހޭ ކޮމިޓީން ސިއްރުކޮށްގެން ކުރިއަށްގެންދިޔަ ނަމަވެސް އިންކުއަރީގެ މަސައްކަތް ނިންމާލުމަށް ބޭއްވި ބައްދަލުވުން ކުރިއަށްގެންދިޔައީ ހުޅުވާލައިގެންނެވެ.
މިބައްދަލުވުމުގައި 241 ކޮމިޓީގެ މުޤައްރިރު ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވީ އިންކުއަރީގެ ރިޕޯޓުގައި ޤައުމީ ސަލާމަތާއި ގުޅުހުން ހުރި އަދި ހިންގަމުންދާ ތަޙުޤީގާއި ގުޅުހުން ހުރި މަޢުލޫމާތުތަކެއް ހިމެނޭތީ އެ ރިޕޯޓުން ހާމަކުރާނީ އެފަދަ މައުލޫމާތު އުނިކުރުމަށްފަހުކަމަށެވެ. ނަމަވެސް މުޅި ރިޕޯޓުގައި ހިމެނޭ ޤައުމީ ސަލާމަތާއި ގުޅުހުން ހުރި ކަންކަމުގެ މައުލޫމާތުތަކާއި ތަޙުޤީގާއި ގުޅޭ ކަންކަން ހިމެނޭގޮތަށް ރިޕޯޓް ރައީސުލްޖުމްހޫރިއްޔާއާއި ރައްޔިތުންގެ މަޖިލީހުގެ ރައީސްގެ އިތުރުން އުއްތަމަ ފަނޑިޔާރާ ހިއްސާކުރުމަށް ސަލާމަތީ ޚިދުމަތްތަކާބެހޭ ކޮމިޓީން ވަނީ ނިންމާފައެވެ.
މި ރިޕޯޓުގައި ރައީސް ނަޝީދަށް ޙަމަލާދިން ގޮތް ހިމެނުމުގެ ގޮތުން އެމަނިކުފާނުގެ ޕްރޮފައިލަކާއި، ތްރެޓް ލެވަލް އޮތް މިންވަރުގެ އިތުރުން ތްރެޓް ހިސްޓްރީއާއި، އިންކުއަރީން ބެލި ކަންކަން ވަނީ ހިމަނާފައެވެ.
ރައީސް ނަޝީދަށް ދިން ހަމާލާއާއި ގުޅޭގޮތުން ރިޕޯޓުގައި ހިމަނާފައިވާ ބައިތައް:
- ހަމަލާދިން ވަގުތު ކަން ހިނގާފައިވާގޮތް
- ރައީސް ނަޝީދަށް ލިބިވަޑައިގެންފައިވާ ޒަޚަމްތަކާއި، ޑޮކްޓަރުންގެ ޓީމުގެ މަސައްކަތް
- ރައީސް ނަޝީދަށް ހަމަލާދިން ދުވަހު ކަންހިނގާފައިވާ ގޮތް
- ހަމަލާދިނުމަށްފަހު ކަންހިގާފައިވާގޮތް ބަލައި އެބައިގައި 19 ކަމެއްވަނީ ހިމަނާފައި
- އޭޑީކޭ ހޮސްޕިޓަލުގެ ފާޚާނައެއްގެ ތެރެއިން ފެނުނު ފިސްތޯލައާ ގުޅޭ 4 ކަމެއް
- އިންޓަލިޖެންސް މައުލޫމާތު އެއްކުރުމާއި، އެމައުލޫމާތު ޙިއްސާކޮށްފައިވާ ކަންކަން
މި ރިޕޯޓު ފާސްކޮށްފައިވަނީ ޖުމަލް 45 ހުށަހެޅުމަކާއެކުގައެވެ.
ރިޕޯޓު ފާސްކޮށްފައިވާ މުހިންމު ބައެއް ހުށަހެޅުންތައް:
- ރައީސް ނަޝީދު އުޅުއްވާ ވަގުތުތަކާއި ނޫޅުއްވާ ވަގުތުގައި ވެސް އެ މަނިކުފާނުގެ ގެކޮޅުގެ ސެކިއުރިޓީ ކޮންޓްރޯލްކޮށް،ހަތިޔާރާ އެކު 24 ގަޑި އިރު ފޯރިމެރުން
- ހަމާލާއާއި ގުޅޭ ކަންކަމުގައި އިހުމާލުވި މީހުންނާއި ޒިންމާ އަދާނުކުރި ފަރާތްތައް ވަކިކޮށް ފިޔަވަޅު އެޅުން
- ރައީސް ނަޝީދުގެ ސަލާމަތީ ކަންކަން ބަލަހައްޓާ އޮފިސަރުން އަަހަރަކު އެއް ފަހަރު އެމީހުންގެ މައްސަޢޫލިއްޔަތު އަދާކުރެވޭ ފެންވަރުހުރިތޯ ދެނެގަތުން
- އިންޓެލިޖެންސާ ބެހޭ އެކްޓެއް ނުވަތަ ޚާއްސަ ގާނޫނެއް އެކުލަވާލުން
- ޤައުމީ ސަލާމަތާ ބެހޭ ކަންކަމުގައި ސިފައިންނާއި ފުލުހުންނާ މަޝްވަރާކޮށް، ރައީސަށް ލަފާދޭ ނެޝަނަލް ސެކިއުރިޓީ އެޑްވައިޒަރެއް ހަމަޖެއްސުން
- ޓެރަރިޒަމާއި ހަރުކަށި ފިކުރު ފެތުރުމުގައި ބައިވެރިވާ މީހުންގެ މައުލޫމާތު ހިމެނޭ ޑާޓާ ބޭސްއެއް ގާއިމްކުރުން
- އިންޓެލިޖެންސް މައުލޫމާތު ރައްކާތެރިކަމާ އެކު ބަލަހައްޓަން، ޓެރަރިޒަމް މަނާކުރުމުގެ ގާނޫނުން ލާޒިމްކުރާ އޮނިގަނޑު ގާއިމްކުރުން
- ޤައުމީ ސަލާމަތަށް ނުރައްކާ ވާނެކަމަށް ބެލެވޭ އިންޓެލިޖެންސް މައުލޫމާތު ސަލާމަތީ ޚިދުމަތްތަކުގެ ތެރޭގައި ދައުރުކުރާނެ ނިޒާމެއް އަވަސް މުއްދަތެެއްގެ ތެރޭގައި އެކުލަވައިލުން
- ޓެރިރަޒަމް ހުއްޓުވަން މަސައްކަތްކުރާ އިދާރާތަކުގެ ދައުރު ސާފުކޮށް ބަޔާންކުރުން
- ހަރުކަށި ފިކުރު ފެތުރުނަ ނުދިނުމަށްޓަކައި ސަރުކާރާއި މުޖުތަމަޢު ޝާމިލްވާ "ހޯލް އޮފް ގަވަމެންޓް: ހޯލް އޮފް ސޮސައިޓީ އެޕްރޯޗް" އަވަހަށް ތަންފީޒުކުރުން
ރައީސް ނަޝީދުގެ ސެކިއުރިޓީ ބްރީޗްވި ގޮތާއި ގުޅޭގޮތުން ހެދި އިންކުއަރީއަށް ޑިފެންސް މިނިސްޓަރާއި، ހޯމް މިނިސްޓަރުގެ އިތުރުން، ސިފައިންގެ އިސްވެރިންނާއި ރައީސް ނަޝީދުގެ ސެކިއުރިޓީ ބަލަހައްޓާ އެސްޕީޖީގެ ސިފައިންނާއި ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ވެސް ހާޒިރުކޮށް ސުވާލުކުރިއެވެ. އަދި ކޮމިޝަނަރ އޮފް ޕޮލިސް މުޙައްމަދު ޙަމީދާއި ފުލުހުންގެ މުއައްސަސާގެ އިސްވެރިންވެސް ކޮމިޓީއަށް ޙާޒިރުކޮށްފައިވެއެވެ. މީގެ އިތުރުން ޕްލޭނިން މިނިސްޓަރ މުޙައްމަދު އަސްލަމާއި މާލެސިޓީގެ ކުރީގެމޭޔަރު ސިފާ މުޙައްމަދުވެސް ކޮމިޓީއަށް ޙާޒިރުކޮށްފައިވެއެވެ.
241 ކޮމިޓީން އިންކުއަރީ ރިޕޯޓު ފާސްކުރަން ބޭއްވި ބައްދަލުވުމުގައި އެކޮމިޓީގައިވެސް ހިމެނިވަޑައިގަންނަވާ މަޖިލީހުގެ ނާއިބް ރައީސް އިވާ އަބްދުﷲ ވަނީ އިންކުއަރީގެ މަސައްކަތަކީ މީގެކުރިން މަޖިލީހުން ނުކުރާ އަދި މުޅިން އަލަށް ކުރި މަސައްކަތެއްކަމަށާއި، އިންކުއަރީގެ މަސައްކަތަށް ކޮމިޓީގައި ހިމެނޭ ހުރިހާ ސިޔާސީ ޕާޓީއެއް ތަމްސީލުކުރާ މެންބަރުންގެ ފަރާތުންވެސް ބޮޑު އެއްބާރުލުމެއް ލިބިގެންދިޔަކަމަށެވެ.