ސްރީލަންކާގައި ކުޑަ ކުއްޖަކު ލައްވައި ހަށި ވިއްކުވި މައްސަލައެއްގެ ތުހުމަތުގައި ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރު މުޙައްމަދު އަޝްމަލީ ހައްޔަރުކޮށްފިއެވެ.
ދިރާގުގެ ޗެއާމަންކަންވެސް ކުރިން ކުރައްވާފައިވާ އަޝްމަލީ މިމައްސަލައިގައި ހައްޔަރުކޮށްފައިވާކަން ޕީއެސްއެމް ނިއުސްއަށްވަނީ ކަށަވަރުވެފައެވެ. ސްރީ ލަންކާގެ ނޫސްތަކުގައި ރިޕޯޓް ކޮށްފައިވާ ގޮތުގައި 15 އަހަރުގެ ކުއްޖަކު ލައްވައި ހަށިވިއްކުވާފައިވާ މައްސަލައެއްގައި 4 މީހަކު ހައްޔަރުކޮށްފައިވެއެވެ.
އަޝްމަލީ ފިޔަވައި ދެން މިމައްސަލާގައި ހައްޔަރުކޮށްފަވަނީ މުޅިންވެސް ލަންކާ މީހުންނެވެ.
މައުލޫމާތު ލިބިފައިވާގޮތުން ސްރީ ލަންކާގެ މައުންޓް ލެވީނިއާ ސަރަހައްދުގައި ކުޑަ އަންހެން ކުއްޖަކު ލައްވައި އެތައް ދުވަހެއް ވަންދެން ހަށިވިއްކުވާފައިވަނީ ވެބްސައިޓްތަކަކާއި ސޯޝަލް މީޑިއާ ޕްލެޓްފޯމްތައް ބޭނުންކޮށްގެންނެވެ. އަދި ތިން މަސް ވަންދެން، އުމުރުން 15 އަހަރުގެ އެ ކުއްޖާ ލައްވައި ހަށިވިއްކުވި މައްސަލައިގެ ތުހުމަތުގައި ލަންކާ ފުލުހުން މިހާތަނަށް 32 މީހަކު ހައްޔަރުކޮށްފައިވާކަމަށް އެޤައުމުގެ ފުލުހުންނާއި ހަވާލާދީ މީޑިއާތަކުގައިވަނީ ރިޕޯޓުކޮށްފައެވެ.