ކޯވިޑް19 ކޮންޓްރޯލްކުރުމަށް އެޅި ފިޔަވަޅުތަކާއެކު މާލެ ސަރަހައްދުގައި ޚިދުމަތްދޭ ކެފޭ ރެސްޓޯރަންޓްތައް ވަނީ ބަންދުކޮށްފައެވެ. ކެފޭ ރެސްޓޯރަންޓްތަކުން މިހާރު ޚިދުމަތްދެމުންގެންދަނީ ހަމައެކަނި ޓޭކްއަވޭ އުސޫލުންނެވެ. މިއާއިއެކު މި ސިނާއަތައް ވަނީ ބޮޑު ގެއްލުމަކާއި ކުރިމަތިލާންޖެހި އާމްދަނީއަށް އަސަރުކޮށްފައެވެ.
އިންހައުސް ޚިދުމަތް މެދުކަނޑާލާ ހަމައެކަނި ޓޭކްއަވޭ އުސޫލުން ޚިދުމަތްދޭން ޖެހުމުގެ ސަބަބުން ރެސްޓޯރަންޓްތަކަށް ލިބޭ އާމްދަނީގެ %10 އާމްދަނީވެސް ނުލިބޭކަމަށް ރެސްޓޯރަންޓް އެސޯސިއޭޝަން އޮފް މޯލްޑިވްސްއިން ވަނީ ބުނެފައެވެ.
އާމްދަނީއަށް އަސަރުކުރުމުގެ ސަބަބުން ރެސްޓޯރަންޓްތަކުން ދައްކަންޖެހޭ ކުލިވެސް ގިނަ ތަންތަނަށް ވަނީ ނުދެއްކިއެވެ.
ވިޔަފާރިކުރާ ތަންތަނުގެ ކުއްޔާއި މުވައްޒަފުންގެ އެކޮމޮޑޭޝަން ތަންތަނުގެ ކުލި ހިމެނޭގޮތުން 15 މަސްދުވަހުގެ ކުލި ނުދެއްކި ގިނަ ރެސްޓޯރަންޓްތަކުން ދަރަނިވެރިވެފައިވާކަމަށް ރޭމްއިން ވަނީ ބުނެފައެވެ. މީގެއިތުރުން ގިނަ ވިޔަފާރިތަކަކީ ކްރެޑިޓް ފެސިލިޓީ ހިމެނޭގޮތަށް ކުރަމުންދާ ވިޔަފާރިތަކެއް ކަމުން ބާޒާރު ސަޕްލަޔަރުންގެ ބިލްތައް ނުދެއްކި 2 އަހަރާއި 3 އަހަރާއި ދެމެދުގެ މުއްދަތަކަށް ދަރަނިވެރިވެފައިވާކަމަށްވެސް ރޭމްއިން ވަނީ ބުނެފައެވެ.
ކެފޭ ރެސްޓޯރަންޓްތަކުގެ ވިޔަފާރިއަކީ ގިނަ އަދަދެއްގެ ދިވެހި އަދި ބިދޭސީ މުވައްޒަފުން މަސައްކަތް ކުރަމުން އަންނަ ސިނާއަތެކެވެ. މި މުވައްޒަފުންގެ ދިރިއުޅުމަށްވެސް ކެފޭ ރެސްޓޯރަންޓްތައް ބަންދުކުރަން ޖެހުމުގެ ސަބަބުން ވަނީ ބޮޑެތި ގެއްލުންތަކަކާއި ކުރިމަތިލާން ޖެހިފައެވެ.
ތަފާސް ހިސާބުތައް ދައްކާގޮތުން ގްރޭޓަރ މާލެ ސަރަހައްދުގައި 1800 ކެފޭ، ރެސްޓޯރެންޓް، ޓޭކްއަވޭ އައުޓްލެޓް، ބޭކަރީ އަދި ހެދިކާ ހަދާ ގޭބީސީތައް ހިމެނެއެވެ. މި ސިނާއަތުގައި ސީދާގޮތުންނާއި ނުސީދާގޮތުން 25000 މުވައްޒަފުން ދަނީ މަސައްކަތްކުރަމުންނެވެ. މީގެތެރެއިން %10 ނުވަތަ 2500 މީހުންނަކީ ދިވެހިންނެވެ. ކޯވިޑާއިހެދި މި ސިނާއަތުގައި މަސައްކަތްކުރާ މުވައްޒަފުންގެ މުސާރަ ނުދެވި 1 އަހަރަށްވުރެ ގިނަދުވަސް ވޭތުވެފައިވާކަމަށް ރޭމްއިން ވަނީ ބުނެފައެވެ.
ކެފޭ ރެސްޓޯރަންޓްތަކުގެ ވިޔަފާރިއަކީ އެހެނިހެން ގިނަ ސިނާއަތްތަކާއިވެސް ގުޅިފައިވާ ދާއިރާއެކެވެ. އެގޮތުން ހޯލްސޭލް ސްޕްލަޔަރުން، ރީޓެއިލް ފިހާރަތައް، މަސްވެރިން، ދަނޑުވެރިން، ފޯއްކޮށާ މީހުން، ލޯންޑްރީތައް، ޕިކަޕް ދުއްވާ މީހުން އަދި ގޭގައި ތިބެގެން އޯޑަރަށް ތަކެތި ހަދާ މީހުން ހިމެނެއެވެ.
ރެސްޓޯރަންޓްތަކުގެ ބޭނުންތަކަށް އެވްރެޖްކޮށް ދުވާލެއްގެ މައްޗަށް 11 މިލިއަން ރުފިޔާގެ ތަކެތި ބާޒާރުން ސަޕްލައި ކުރެވޭނެކަމަށް ލަފާކުރެވޭކަމަށް ރޭމްއިން ބުނެއެވެ. މިއީ މަހަކަށް ބަލާއިރު 354 މިލިއަން ރުފިޔާއެވެ.
ރެސްޓޯރަންޓްތަކުންދޭ ޚިދުމަތްތައް ގިނަ ފަރާތްތަކާއި ގުޅިފައިވާއިރު ކެފޭ ރެސްޓޯރަންޓްތައް ބަންދުކޮށްފައި ހުރުމުގެ ސަބަބުން އޭގެ އަސަރު މުޅި މުޖްތަމައުއަށް ދަނީ ކުރަމުންނެވެ. އެހެންކަމުން ރައްކާތެރިކަމުގެ ފިޔަވަޅުތަކާއިއެކު ވީހާވެސް އަވަހަކަށް ރެސްޓޯރަންޓްތައް އަލުން ހުޅުވުމުގެ ހުއްދަ ދިނުމަކީ މުހިންމު ކަމެއްކަމަށް ރޭމްއިން ބުނެއެވެ. ރޭމްއިން ބުނީ ކޯވިޑްގެ ބަލިމަޑުކަމާއި ގުޅިގެން ކެފޭ ރެސްޓޯރަންޓްތަކަށް ދިމާވެފައިވާ އިޤްތިޞާދީ ހީނަރުކަމުން އަރައިގަތުމަށް މަދުވެގެން 3 ނުވަތަ 5 އަހަރު ނަގާނެކަމަށެވެ.