އެކްސްޕޯ ދެހާސްފަނަރައަށް އެކި ދާއިރާތަކުން
ގިނަބަޔަކު ތައްޔާރީތައް ވަމުންދާއިރު
ނުކުޅެދުންތެރިކަން ހުންނަ ފަރާތްތަކުންވެސް ދަނީ މިއެކްސްޕޯއަށް ތައްޔާރުވުމުގެ
މަސައްކަތް އަވަދިނެތިކުރަމުންނެވެ.
އެކްސްޕޯ ދެހާސް ފަނަރައިގައި ހިމެނޭ މައިގަނޑު 6 ދާއިރާގެ
ތެރެއިން، އެއް ދާއިރާކަމަށްވާ ނުކުޅެދުންތެރިކަން ހުންނަ ފަރާތްތަކުގެ ދާއިރާއިން
ތަކެތި ވާދަކުރުމަށް ނުކުޅެދުންތެރިކަން ހުންނަ ކުދިން އެދަނީ ވަރަށްބުރަކޮށް މަސައްކަތްކުރަމުންނެވެ.
އިމާދުއްދީން ސްކޫލްގެ ދަށުން ހިނގަމުންދާ ޖުވެލް
ސެންޓަރުގައި ހަރަކާތްތެރިވާ ބާރަކުދިން ތައްޔާރުކުރާ ތިނޯހުގެ މަސައްކަތްތަކާ
އެހެން އުފެއްދުންތައް އެކްސްޕޯގައި
ދައްކާލުމަށް ތައްޔާރުވަމުންދާއިރު މިކުދިންގެ ފަރާތުންވެސް ހުނަރުވެރި
އުފެއްދުންތަކެއް ފެނިގެންދާނެކަމަށް ޖުވެލްސެންޓަރުންބުނެއެވެ.
ޖުވެލް ސެންޓަރުން ބުނީ މިކުދިންގެ މަސައްކަތްތައް
އެކްސްޕޯގައި ދައްކާލުމުގެ މައިގަނޑު މަޤްޞަދަކީ މިކުދިންނަކީވެސް ހުނަރުވެރި
ކުދިންތަކެއްކަން މުޖްތަމައަށް ހާމަކޮށްދިނުންކަމަށެވެ.
އެކްސްޕޯ 2015ގައި
މިއަހަރު ދިވެހި ކޮންމެ އުފެއްދުމަކަށްވެސް ހުޅުވާލެވިފައިވާއިރު މިފަހަރުގެ
އެކްސްޕޯގައި ރާއްޖޭގެ ވަޑާމުގެ މަސައްކަތްތަކާ އަތްތެރިމަސައްކަތްތަކާ އަދި
ސައިންސާ ޓެކްނޮލޮޖީގެ ދާއިރާގެ ރާއްޖޭގެ އުފެއްދުންތައް ފެނިގެންދާނެކަމަށް
މައުރަޒު އޮފީހުން މައުލޫމާތުދޭ. މައުރަޒުގައި ބައިވެރިވުމުގެ ފުރުސަތު ޑިސެންބަރު އެކަކާ ހަމައަށް ހުޅުވިފައިވާއިރު މައުރަޒު
ބޭއްވުމަށް ހަމަޖެހިފައިވަނީ ޑިސެންބަރު 22 ން 28 އަށް ދަރުބާރުގޭގައެވެ.