އައްޑޫ ސިޓީގެ ބިން ހިއްކުމުގެ ބޮޑު މަޝްރޫއު ކުރިއަށްގެންދިޔުމަށްޓަކައި މިއަހަރުގެ ތެރޭގައި ބަޔަކާ ހަވާލުކުރަން ނިންމައިފިއެވެ. އައްޑ ސިޓީގެ ތަރައްޤީގެ މަޝްޜޫޢުގެ ދަށުން ކުރިއަށްގެންދާ އައްޑޫ ސިޓީގެ ބިން ހިއްކުމުގެ މިމަޝްރޫޢަކީ ގާތްގަޑަކަށް 75 މިލިޔަން ޑޮލަރުގެ މަޝްރޫއެކެވެ.
މިމަޝްރޫޢު ކުރިއަށް ގެންދިއުމަށް ހަމަޖެހިފައިވަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުންނެވެ. 2 އަހަރު ދުވަހުގެ ތެރޭ މަސައްކަތް ނިންމުމަށް ހަމަޖެހިފައިވާ މިމަޝްރޫޢުގެ މަސައްކަތަށް ގާތްގަޑަކަށް 70 އާއި 75 މިލިޔަން ޑޮލަރު ޚަރަދުވާނެ ކަމަށްވަނީ ލަފާކޮށްފައެވެ.
ރާއްޖޭގައި ހުންނަ އިންޑިއަން ހައިކޮމިޝަނުން ވިދާޅުވީ ރާއްޖޭގެ މިނިސްޓްރީ އޮފް ފިނޭންސްއިން ހުޅުވާލާފައިވާ ޓެންޑަރަށް ބީލަން ހުށައެޅުމުގެ އެންމެ ފަހުގެ ތާރީޚަކީ މިމަހުގެ 15 ވަނަ ދުވަސްކަމަށެވެ. ބައިނަލްއަޤްވާމީ ހަތަރު ޑްރެޖިން ކުންފުންޏަކުން އެ ކުންފުނިތަކުގެ އިންޑިއާގެ ސަބްސިޑިއަރީތައް މެދުވެރިކޮށް ބިޑް ހުށައަޅާނެ ކަމަށް އިންޑިޔަން ހައިކޮމިޝަނުން ވިދާޅުވެއެވެ. އަދި މިމަޝްރޫޢަށް ކުންފުނި ހޮވުމުގެ ކުރިން ބިޑްތަކުގެ ޓެކްނިކަލް އަދި ފައިނޭންޝަލް އިވޭލުއޭޝަން ކުރިއަށް ގެންދާނީ ދިވެހި ސަރުކާރުން ކަމަށާއި ބިޑް ހުށައަޅާ ނިމުމުން 4 އެއް ނުވަތަ 5 ހަފްތާ ތެރޭގައި ކޮންޓްރެކްޓަރއާ ހަވާލުކުރާނެ ކަމަށް ހައިކޮމިޝަނުން ވިދާޅުވެއެވެ.
މި މަޝްރޫޢުގެ ތެރޭގައި އައްޑޫގެ ގުދުރަތީ ތިމާވެށި ހިމާޔަތްކޮށް ރައްކާތެރިކުރުމުގެ ގޮތުން، 228 ހެކްޓަރުގެ ބިމުގެ ސަރަޙައްދެއް ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢެއް ވަނީ ހިމަނާފައެވެ. މީގެ ތެރޭގައި ރެޒިޑެންޝަލް، ކޮމާޝަލް، އަދި އިންޑަސްޓްރިއަލް ބޭނުންތަކަށް އައްޑޫ ސިޓީގެ ހިތަދޫ، ހުޅުދޫ/މީދޫ އިން 38 ހެކްޓަރު ހިއްކުމަށްވަނީ ހަމަޖެހިފައެވެ. އަދި 5 ހެކްޓަރުގެ 2 ރިޒޯޓް ރަށް ހެދުމަށްވެސްވަނީ ހަމަޖެހިފައެވެ. މީގެ އިތުރުން މަރަދޫ/ މަރަދޫފޭދޫއިން 75 ހެކްޓަރުގެ ސަރަޙައްދެއް ހިއްކުމަށްވެސް ވަނީ ހަމަޖެހިފައެވެ.
އާންމުގޮތެއްގައި އިންޑިއާގެ ލައިން-އޮފް-ކްރެޑިޓް މަޝްރޫއުތަކުގެ ކޮމްޕޮނެންޓް ތަކުގެ ތެރެއިން އާންމުކޮށް ފޯރުކޮށްދެނީ 65 އާއި 75 އިންސައްތަ ދެމެދެވެ. އެހެންނަމަވެސް ސަރުކާރުގެ އެދުމުގެ މަތިން އިންޑިއާއިން ވަނީ މި މަޝްރޫއަށް އިންޑިއާއިން ފޯރުކޮށްދޭ ކޮމްޕޮނެންޓްތަކުގެ އިންސައްތަ 55އަށް ކުޑަކޮށްފައި ކަމަށް ހައިކޮމިޝަނުން ވިދާޅުވެއެވެ.
ބިން ހިއްކުމުގެ މަޝްރޫއުގެ ޕްލޭންތަކުގެތެރޭގައި މިހާރު ހުރި ހާބަރު ފްރަންޓް ފެސިލިޓީތައް އަޕްގްރޭޑް ކޮށް، ވިޔަފާރި އާއި މުޖުތަމައުގެ ބޭނުން ތަކަށާއި، އައްޑޫ ސިޓީގެ ރަށްރަށުގެ ރައްޔިތުންގެ ރެޒިޑެންޝަލް ބޭނުންތަކަށްވެސް ބިން ދޫކުރުުމަށްވަނީ ނިންމާފައެވެ. މީގެ އިތުރުން ޕްރައިވެޓް ސެކްޓަރގެ އިންވެސްޓަރުން ރިސޯޓް ތަރައްގީ ކުރުމަށް ރަށްތައް އުފެއްދުމަށްޓަކައި ގާތްގަނޑަކަށް 25 ހެކްޓަރުގެ ބިން ހިއްކާ ގޮނޑުދޮށް ހިމާޔަތްކުރުމަށް ވަނީ ހުށައަޅާފައެވެ.
އައްޑޫގެ މަގުތައް ތަރައްގީކޮށް، ބިން ހިއްކުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވައުދުފުޅެކެވެ. މިއަމާޒަށް ވާޞިލްވުމަށްޓަކައި އައްޑޫ ޑިވެލޮޕްމެންޓް ޕްރޮޖެކްޓް (އޭޑީޕީ)ގެ ނަމުގައި ބޮޑު މަޝްރޫއުއެއްވެސް ވަނީ ފަށާފައެވެ. އެގޮތުން އައްޑޫ ސިޓީ ތަރައްގީކުރުމަށް ފުރިހަމަ ރޯޑްމެޕެއް އެކުލަވާލާ އައްޑޫގައި މިހާރު ހުރި މަގުތައް ތަރައްގީކޮށް، ފެން ހިންދާ ނިޒާމު ވަރުގަދަކޮށް، ގާތްގަނޑަކަށް 228 ހެކްޓަރުގެ ބިން ހިއްކުމަށްވަނީ ކަނޑައަޅާފައެވެ.
މިމަޝްރޫއުގެ ސަބަބުން އައްޑޫ ސިޓީއަކީ އިގްތިސާދީގޮތުން ވަރުގަދަ ހަބަކަށާއި، މަގުބޫލު ފަތުރުވެރިކަމުގެ މަންޒިލަކަށް ވެގެންދާނެ ކަމަށް ސަރުކާރުން ދެކެއެވެ.