ކުރީގެ މެންބަރު މަރުޙޫމް ޒާހިރު އާދަމްގެ ހަނދާނުގައި ރައްޔިތުންގެ މަޖިލީހުގެ މިއަދުގެ ޖަލްސާގައި ހަމަހިމޭންކަމުގެ ސުކޫތެއް ގެނެސްފިއެވެ.
މިއަދު ކުރިއަށްދާ ރައްޔިތުންގެ މަޖިލީހުގެ މިދައުރުގެ 3ވަނަ ޖަލްސާ ފައްޓަވަމުން މަޖިލީހުގެ ނާއިބު ރައީސް އީވާ އަބްދުﷲވަނީ ކުރީގެ މެންބަރު ޒާހިރު އާދަމް ރޭގެ ވަގުތެއްގައި ނިޔާވުމާއިގުޅިގެން އެމަނިކުފާނުގެ ޢާއިލާއަށް ތަޢުޒިޔާ ދަންނަވާފައެވެ.
އަދި ޒާހިރު ޢާދަމްގެ ހަނދާނުގައި މެންބަރުންވަނީ ހަމަހިމޭންކަމުގެ ސުކޫތަކަށް ތެދުވެވަޑައިގެންފައެވެ.
ޒާހިރު ޢާދަމްއަކީ ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގެ މެންބަރުކަން ކުރެއްވި ބޭފުޅެއްކަން ފާހަގަކުރައްވައި، މަރްޙޫމަށް ސުވަރުގޭގެ މަތިވެރި ނިޢުމަތް މިންވަރުކުރެއްވުން އެދި މަޖިލީހުގެ ނާއިބު ރައީސްވަނީ ދުޢާކުރައްވާފައެވެ.
މަރުހޫމް ޒާހިރު ޢާދަމްވަނީ 27 ފެބްރުއަރީ 2005އިން ފެށިގެން 27 މެއި 2014ފެ ނިޔަލަށް ގދ. އަތޮޅު މެންބަރުކަމާއި ގައްދޫ ދާއިރާގެ މެންބަރުކަން ކުރައްވާފައެވެ.
ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެމްބަރު ޒާހިރު އާދަމް ނިޔާވީ ކޯވިޑް-19އަށް ޕޮޒިޓިވްވެގެން ހޮސްޕިޓަލުގައި ފަރުވާހޯއްދެވުމަށްފަހު ގެއަށްބަދަލުކޮށް ގޭގައި ފަރުވާ ހޯދަމުންދަނިކޮށެވެ.
ވަރަށް ކުރިއްސުރެ ސިޔާސީ ދާއިރާއަށް ނުކުންނެވި ޒާހިރު އާދަމް ވަނީ، ޖުމްހޫރީ ޕާޓީގެ މެމްބަރެއްގެ އިތުރުން، އެމްޑީޕީގެ މެމްބަރެއްގެ ގޮތުގައިވެސް މަސައްކަތް ކުރައްވާފައެވެ. ސިޔާސީ ދާއިރާގައި މަސައްކަތް ކުރެއްވުމުގެ އިތުރުން އޭނާއަކީ މަޝްހޫރު ވިޔަފާރި ވެރިއެއްވެސްމެއެވެ.