ގްރޭޓަރ މާލެ ކަނެކްޓިވިޓީ ބްރިޖް މަޝްރޫޢުގެ ޓެންޑަރުގައި ބައިވެރިވުމަށް އިންޑިއާގެ އެގްޒިމް ބޭންކުން އެޤައުމުގެ 4 ކުންފުންޏެއް ޕްރީކޮލިފައި ކޮށްފިއެވެ.
ގްރޭޓާ މާލެ ކަނެކްޓިވިޓީ މަޝްރުޢު (ޖީ.އެމް.ސީ.ޕީ) ނުވަތަ މާލެ-ތިލަފުށި ލިންކް (އެމް.ޓީ.އެލް) މަޝްރޫޢަށް ބިޑް ހުށައެޅުމުގެ އެންމެ ފަހު ތާރީޚަކީ މިމަހުގެ 5 ވާ ބުދަ ދުވަހެވެ.
ޕްލޭނިންގ މިނިސްޓްރީން ވިދާޅުވީ ބްރިޖް މަޝްރޫއަށް ފިނޭންސް މިނިސްޓްރީން ހުޅުވާލައިފާވާ ޓެންޑަރުގައި ބައިވެރިވުމަށް އިންޑިއާގެ އެގްޒިމް ބޭންކްގެ ފަރާތުން އިންޑިއާގެ 4 ކުންފުންޏެއް ޕްރީކޮލިފައި ކޮށްފައިވާކަމަށާއި އެ 4 ކުންފުންޏަކީވެސް މިފަދަ މަޝްރޫއު ތަކުގެ މަސައްކަތުގެ ތަޖުރިބާއާއި މަޝްރޫއުއަށް ބޭނުންވާ ޓެކްނިކަލް އަދި އެކްސްޕަޓީޒްއާއި ޤާބިލިއްޔަތުކަމުގެ އިތުރުން މާލީ ތަނަވަސްކަން ލިބިފައިވާ ކުންފުންޏެއްކަމަށެވެ.
މާލެ-ވިލިމާލެ-ގުޅިފަޅު އަދި ތިލަފުށި ގުޅާލާ ބްރިޖް ޕްރޮޖެކްޓަކީ މިހާތަނަށް ދިވެހިރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫޢެވެ. އަދި މި މަޝްރޫއުގެ މަސައްކަތް ނިމި، ގްރޭޓާ މާލެ ކަނެކްޓިވިޓީ ބްރިޖް ބޭނުން ކުރެވެން ފެށުމުން، މާލެއާއި ވިލިމާލެއާއި ގުޅިފަޅު އަދި ތިލަފުށި އިންޑަސްޓްރިއަލް ޒޯން ގުޅާލަދޭ މި ބްރިޖް، ވެގެންދާނީ ދިވެހިރާއްޖޭގެ އިގްތިސާދު ކުރިއެރުވުމަށް މަގުފަހި ކުރުވާނެ އިންޖީނެއްގެ ގޮތުގައިކަމަށް ބެލެވެއެވެ.
މިއީ އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓް ފެސިލިޓީއެއްގެ ދަށުން ތަރައްގީ ކުރެވެމުންދާ ގުޅީފަޅު ޕޯޓްގެ ބޭނުން އެންމެ އެކަށޭނަ ގޮތުގައި ހިފުމަށްޓަކައި ކޮންމެހެން މުހިންމު ކޯސްވޭ ލިންކެކެވެ.
މި މަޝްރޫއުގެ ކޮންސަލްޓެންޓަކީ ދިވެހި ސަރުކާރުން ޙިޔާރުކޮށްފައިވާ އިނގިރޭސި ވިލާތާއި ހޮންގްކޮންގް ގެ ކުންފުންޏެކެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ސަރުކާރުގެ އެދިވަޑައިގަތުމުގެ މަތިން، މި މަޝްރޫއުއަށް ބޭނުންވާ ފައިނޭންސް ހަމަޖައްސައިފާވަނީ އިންޑިއާ ސަރުކާރުން ފޯރުކޮށްދީފައިވާ 400 މިލިއަން ޑޮލަރުގެ ލައިން އޮފް ކްރެޑިޓްއަކާއި 100 މިލިއަން ޑޮލަރުގެ ގްރާންޓެއްގެ ދަށުންނެވެ.
މި މަޝްރޫއުގެ މަސައްކަތް ގާތްގަނޑަކަށް ދެ އަހަރުދުވަހުގެ ތެރޭގައި ފުރިހަމަކުރެވޭނެ ކަމަށް ސަރުކާރުންވަނީ ވިދާޅުވެފައެވެ. މި ބްރިޖަކީ 6.7 ކިލޯމީޓަރުގެ ބްރިޖެކެވެ.