އެމްޓީސީސީގެ 2020 ވަނަ އަހަރުގެ ފައިދާއިން ހިއްސާއަކަށް 3 ރުފިޔާ ބަހަން ކުންފުނީގެ ބޯޑުން ނިންމައިފިއެވެ.
މިދިޔަ އަހަރު އެމްޓީސީސީއަށް ސާފު ފައިދާގެ ގޮތުގައި ލިބިފައިވަނީ 224.7 މިލިއަން ރުފިޔާއެވެ.
އެމްޓީސީސީން ބުނީ 2020 ވަނަ އަހަރަކީ އެ ކުންފުންޏަށް 40 އަހަރުގެ ދިގު މުއްދަތުގައި އެންމެ ބޮޑު ފައިދާއެއް ލިބުނު އަހަރުކަމަށެވެ. ކުންފުނީގެ ފައިދާއިން 24.11 މިލިއަން ރުފިޔާ ހިއްސާދާރުންނަށް ބެހުމަށް އެމްޓީސީސީގެ ބޯޑުން ވަނީ ނިންމާފައެވެ. މިއީ ހިއްސާއަކަށް 3 ރުފިޔާއެވެ.
އެމްޓީސީސީއިން ބުނީ މިއީ ހިއްސާގެ ފައިދާގެ ގޮތުގައި މިހާބޮޑު އަދަދެއް ހިއްސާދާރުންނަށް ބަހާ ފުރަތަމަ ފަހަރުކަމަށެވެ. 2019 ވަނަ އަހަރު ހިއްސާގެ ފައިދާގެ ގޮތުގައި އެ ކުންފުނިން ބަހާފައިވަނީ ހިއްސާއަކަށް 2 ރުފިޔާއެވެ.
ކޯވިޑް-19ގެ ހާލަތައް ބަލާ ފަރުވާތެރިކަމާއެކު ވިޔަފާރިތަކަށް މިހާލަތުގައި ގެންނަންޖެހޭ ބަދަލުތަށް ގެނެސް، ވިޔަފާރި ކުރިއަރުވާ، ކުންފުނީގެ މަޤްޞަދުތައް ޙާޞިލްކުރުމަށް ޙިކުމަތްތެރިކަމާއެކު ފިޔަވަޅުތައް އަޅައި، މިފިޔަވަޅުތަކުގެ ނަތީޖާ ޙާޞިލްކުރެވިފައިވާކަމުގެ ޔަޤީންކަން އެމްޓީސީސީން ވަނީ ޙިއްޞާދާރުންނަށް އަރުވާފައެވެ.